ಆಪ್ಘಾನಿಸ್ತಾನದ ಮೇಲೆ ದಾಳಿಗೆ ಪಾಕ್‌ನಲ್ಲಿ ವಾಯುನೆಲೆಗೆ ಅಮೆರಿಕದ ಯತ್ನ

ವಾಷಿಂಗ್ಟನ್‌ : ವಿಶ್ವ ವ್ಯಾಪಾರ ಕೇಂದ್ರದ ಅವಳಿ ಕಟ್ಟಡದ ಮೇಲಿನ ದಾಳಿಯ ಪ್ರಮುಖ ಸೂತ್ರಧಾರ ಎಂದು ಭಾವಿಸಲಾಗಿರುವ ಒಸಾಮ ಬಿನ್‌ ಲ್ಯಾಡೆನ್‌ ಅಡಗಿಕೊಂಡಿರುವ ಆಪ್ಘಾನಿಸ್ತಾನದ ಮೇಲೆ ದಾಳಿ ನಡೆಸುವ ಇಂಗಿತವನ್ನು ಅಮೆರಿಕ ವ್ಯಕ್ತಪಡಿಸಿದ್ದು , ಇದಕ್ಕಾಗಿ ವಾಯುನೆಲೆಯನ್ನು ಸ್ಥಾಪಿಸಲು ಅನುಮತಿ ನೀಡುವಂತೆ ಪಾಕಿಸ್ತಾನವನ್ನು ಕೇಳಿದೆ.

ಭಯೋತ್ಪಾದಕರ ಶಕ್ತಿಯನ್ನು ಹಾಗೂ ಅವರ ಮೇಲೆ ದಾಳಿ ನಡೆಸಬಹುದಾದ ಸಾಧ್ಯತೆಗಳನ್ನು ನಾವು ಅಂದಾಜು ಮಾಡುತ್ತಿದ್ದೇವೆ ಎಂದು ಅಮೆರಿಕ ಅಧ್ಯಕ್ಷ ಬುಷ್‌ ಆಡಳಿತದಲ್ಲಿನ ಪ್ರಭಾವಿ ಅಧಿಕಾರಿ ಪೊವೆಲ್‌ ತಿಳಿಸಿದ್ದಾರೆ. ಪಾಕ್‌ನಲ್ಲಿ ವಾಯುನೆಲೆ ಸ್ಥಾಪಿಸುವ ಬಗೆಗೆ ಪಾಕಿಸ್ತಾನದ ಅಧ್ಯಕ್ಷ ಮುಷರ್ರಫ್‌ ಅವರೊಂದಿಗೆ ಪೊವೆಲ್‌ ಮಾತುಕತೆ ನಡೆಸಿದ್ದಾರೆ. ಭಯೋತ್ಪಾದಕತೆಯನ್ನು ತಡೆಗಟ್ಟುವಲ್ಲಿ ಸಹಕಾರ ನೀಡುವುದಾಗಿ ಮುಷರ್ರಫ್‌ ಆಶ್ವಾಸನೆ ನೀಡಿದ್ದಾರೆ ಎನ್ನಲಾಗಿದೆ.

ಆಪ್ಘಾನಿಸ್ತಾನದೊಂದಿಗಿನ ಗಡಿಯನ್ನು ಮುಚ್ಚುವಂತೆ ಹಾಗೂ ಉಗ್ರರ ಗುಂಪುಗಳಿಗೆ ನಿಧಿ ಒದಗಿಸುವುದನ್ನು ನಿಲ್ಲಿಸುವಂತೆ ಕೂಡ ಪಾಕಿಸ್ತಾನವನ್ನು ಅಮೆರಿಕ ಒತ್ತಾಯಿಸಿದೆ. ಈ ನಡುವೆ ಭಯೋತ್ಪಾದಕರ ಬೇರನ್ನು ಹುಡುಕುವಲ್ಲಿ ಅಮೆರಿಕದ ತನಿಖಾ ತಂಡಗಳು ವಿವಿಧ ದೇಶಗಳಲ್ಲಿ ತೀವ್ರ ಹುಡುಕಾಟ ನಡೆಸುತ್ತಿವೆ ಹಾಗೂ ಅಪರಾಧದಲ್ಲಿ ಭಾಗಿಯಾಗಿದ್ದಾರೆ ಎನ್ನಲಾದ 50 ಮಂದಿಯ ಪಟ್ಟಿಯನ್ನು ಸಿದ್ಧಪಡಿಸಿವೆ.

(ಪಿಟಿಐ)