ಗಂಗೂಲಿಗೆ ಜೀವದಾನ!ದಕ್ಷಿಣ ಆಫ್ರಿಕಾ ಪ್ರವಾಸಕ್ಕೆ ನಾಯಕನಾಗಿ ಆಯ್ಕೆ

ಮುಂಬಯಿ : ಮುಂಬರುವ ದಕ್ಷಿಣ ಆಫ್ರಿಕಾ ಪ್ರವಾಸಕ್ಕೆ ಭಾರತ ಕ್ರಿಕೆಟ್‌ ತಂಡದ ನಾಯಕರಾಗಿ ಸೌರವ್‌ ಗಂಗೂಲಿ ಆಯ್ಕೆಯಾಗಿದ್ದಾರೆ. ಶ್ರೀಲಂಕಾ ಪ್ರವಾಸದಲ್ಲಿ ಕೆಟ್ಟ ಪ್ರದರ್ಶನ ನೀಡಿದರೂ ಮತ್ತೊಂದು ಅವಧಿಗೆ ಗಂಗೂಲಿ ಅವರನ್ನು ಮುಂದುವರಿಸಲು ಗುರುವಾರ ಇಲ್ಲಿ ಸಭೆ ಸೇರಿದ ಆಯ್ಕೆ ಸಮಿತಿ ನಿರ್ಧರಿಸಿತು.

ಸೆಪ್ಟಂಬರ್‌ 24 ರಂದು ದಕ್ಷಿಣ ಆಫ್ರಿಕಾಕ್ಕೆ ತೆರಳುವ ಭಾರತ ತಂಡ 66 ದಿನಗಳ ಪ್ರವಾಸ ಕೈಗೊಳ್ಳಲಿದೆ. ಮೂರು ಟೆಸ್ಟ್‌ ಹಾಗೂ ತ್ರಿಕೋಣ ಸರಣಿಯ ಒಂದು ದಿನದ ಪಂದ್ಯ ಸರಣಿಯಲ್ಲಿ ಭಾರತ ತಂಡ ಭಾಗವಹಿಸಲಿದೆ. ತ್ರಿಕೋಣ ಸರಣಿಯಲ್ಲಿ ಭಾರತ ಹಾಗೂ ದಕ್ಷಿಣ ಆಫ್ರಿಕಾ ಜೊತೆ ಭಾಗವಹಿಸುತ್ತಿರುವ ಮೂರನೇ ತಂಡ ಕೀನ್ಯಾ.

ದಕ್ಷಿಣ ಆಫ್ರಿಕಾ ಪ್ರವಾಸಕ್ಕೆ ತೆರಳುವ ಗಂಗೂಲಿ ಪಡೆಯ ಇತರ ಸದಸ್ಯರನ್ನು ಶುಕ್ರವಾರ ಮುಂಬಯಿಯಲ್ಲಿ ಆಯ್ಕೆ ಮಾಡಲಾಗುವುದು. ನಾಯಕನ ಆಯ್ಕೆ ಇತ್ಯರ್ಥಗೊಂಡ ನಂತರ, ಅನಿಲ್‌ ಕುಂಬ್ಳೆ ತಂಡಕ್ಕೆ ವಾಪ್ಸಸಾಗುವರೇ ಅನ್ನುವ ವಿಷಯ ಈಗ ಕುತೂಹಲ ಕೆರಳಿಸಿದೆ.

(ಇನ್ಫೋ ವಾರ್ತೆ)