ಕತ್ತುಕೊಯ್ದು ಮಾವ-ಸೊಸೆ ಹತ್ಯೆ:ದಂಡುಪಾಳ್ಯ ಗುಂಪಿನ ಕೈವಾಡ?

ಬೆಂಗಳೂರು : 90 ವರ್ಷದ ವೃದ್ಧ ಹಾಗೂ ಅವರ 40 ವರ್ಷದ ಸೊಸೆಯನ್ನು ನಾಗರಬಾವಿ ಮುಖ್ಯರಸ್ತೆಯಲ್ಲಿನ ಬಾಪೂಜಿ ಬಡಾವಣೆಯ, ಜನ ನಿಬಿಡ ಸರಸ್ವತಿ ಜಂಕ್ಷನ್‌ನ ಮಹಡಿ ಮನೆಯಾಂದರಲ್ಲಿ ಗುರುವಾರ ಹಾಡುಹಗಲೇ ಕತ್ತು ಕೊಯ್ದು ಕೊಲೆ ಮಾಡಲಾಗಿದೆ. ಮೃತರನ್ನು ರಾಜ್ಯ ಖಜಾನೆ ಇಲಾಖೆಯ ನಿವೃತ್ತ ಅಧಿಕಾರಿ ಶಂಕರಯ್ಯ ಹಾಗೂ ಪದ್ಮಜಾ ಎಂದು ಗುರ್ತಿಸಲಾಗಿದೆ.

ಗುರುವಾರದ ಹತ್ಯೆ ಪ್ರಕರಣವನ್ನು ದಂಡುಪಾಳ್ಯದ ಹಂತಕರ ಕೆಲಸವೆಂದು ಪೊಲೀಸರು ಶಂಕಿಸಿದ್ದಾರೆ. ಜುಲೈ 26 ರಂದು ನಗರದ ಸುಭಾಷ್‌ ನಗರದಲ್ಲಿ ನಿವೃತ್ತ ವಿಜ್ಞಾನಿ ಜಿ.ಎನ್‌.ಚಂದ್ರಶೇಖರಯ್ಯ ಅವರನ್ನು ಇದೇ ರೀತಿ ಹತ್ಯೆ ಮಾಡಲಾಗಿತ್ತು . ಭೀಕರವಾಗಿ ಕತ್ತು ಕತ್ತರಿಸಿ ಹತ್ಯೆ ಮಾಡುವುದು ದಂಡುಪಾಳ್ಯ ಗ್ಯಾಂಗಿನ ಕೆಲಸ ಎನ್ನಲಾಗಿದೆ.

ಪದ್ಮಜಾ ಅವರ ಓಲೆಯನ್ನು ಹೊರತು ಪಡಿಸಿದರೆ ಹಂತಕರು ಇತರ ಯಾವುದೇ ಬೆಲೆ ಬಾಳುವ ವಸ್ತುಗಳನ್ನಾಗಲೀ, ನಗದನ್ನಾಗಲೀ ಮುಟ್ಟಿಲ್ಲ . ಮನೆಯಲ್ಲಿನ ವಸ್ತುಗಳು ಚೆಲ್ಲಾಪಿಲ್ಲಿಯಾಗಿದ್ದು , ಚಿಲ್ಲರೆ ಹಣದ ಚಿಕ್ಕ ಡಬ್ಬಿ ಸ್ನಾನದ ಕೊಠಡಿಯಲ್ಲಿ ಬಿದ್ದಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಕೊಲೆಗೆ ಕಾರಣ ತಿಳಿದುಬಂದಿಲ್ಲ .

ಎಂದಿನಂತೆ ಇಬ್ಬರು ಮಕ್ಕಳಾದ ಸುಷ್ಮಾ (11) ಹಾಗೂ ಸ್ನೇಹಾಳನ್ನು (7) ಸಮೀಪದ ಶಾಲೆಗೆ ಬಿಟ್ಟು ಮನೆಗೆ ವಾಪಸ್ಸಾದ ಪದ್ಮಜಾ ಅವರು 11 ಗಂಟೆ ಸುಮಾರಿಗೆ ಮಾರುಕಟ್ಟೆಗೆ ಹೋಗಿದ್ದರು. ತರಕಾರಿ ಕೊಂಡು ಮನೆಗೆ ವಾಪಸ್ಸಾದ ನಂತರ ಪದ್ಮಜಾ ಪುನಃ ಮನೆಯಿಂದ ಹೊರಗೆ ಹೋಗಿಲ್ಲ . ಸಂಜೆ ಶಾಲೆಯಿಂದ ಕರೆ ತರಲು ಪದ್ಮಜಾ ಶಾಲೆಗೆ ಬರದೆ ಹೋದದ್ದರಿಂದ, ಮಕ್ಕಳು ಮನೆಗೆ ಬಂದಾಗ ಮನೆಯ ಬಾಗಿಲು ತೆರೆದಿತ್ತು , ತಾತ ಹಾಗೂ ಅಮ್ಮ ಕೊಲೆಯಾಗಿದ್ದರು.

ಪದ್ಮಜಾ ಅವರು ತರಕಾರಿ ತರಲು ಹೋದಾಗ ಹಂತಕರು ಮಾರುಕಟ್ಟೆಯಿಂದಲೇ ಅವರನ್ನು ಹಿಂಬಾಲಿಸಿರಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ಘಟನೆ ನಡೆದ ಸ್ಥಳದ ಪಕ್ಕದ ಮನೆಯಲ್ಲಿ ಹುಟ್ಟುಹಬ್ಬದ ಪಾರ್ಟಿ ನಡೆಯುತ್ತಿದ್ದು, ಅಲ್ಲಿ ನೆರೆದಿದ್ದ ಜನರಿಗೆ ಈ ಬರ್ಬರ ಹತ್ಯೆಯ ಸುಳಿವು ಸಿಕ್ಕಿಲ್ಲ .

ನಗರದಲ್ಲಿ ಇಂಥ ಪ್ರಕರಣಗಳು ಪದೇ ಪದೇ ಸಂಭವಿಸುತ್ತಿರುವ ಹಿನ್ನೆಲೆಯಲ್ಲಿ ತನಿಖೆಗಾಗಿ ವಿಶೇಷ ಪೊಲೀಸ್‌ ಪಡೆಯಾಂದನ್ನು ರಚಿಸಲಾಗಿದೆ ಎಂದು ಪೊಲೀಸ್‌ ಆಯುಕ್ತ ಟಿ. ಮಡಿಯಾಳ್‌ ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)