ಕರ್ನಾಟಕದಲ್ಲಿ 13 ಜಲ್ದಿ ಚುಕ್ತಾ ಕೋರ್ಟುಗಳಿಗೆ ಚಾಲನೆ

ಬೆಂಗಳೂರು : ಕಳೆದ ಏಪ್ರಿಲ್‌ 1ರಿಂದ ಈವರೆಗೆ 500 ಜಲ್ದಿ ಚುಕ್ತಾ ಕೋರ್ಟುಗಳನ್ನು ದೇಶಾದ್ಯಂತ ಸ್ಥಾಪಿಸಲಾಗಿದೆ ಎಂದು ಕೇಂದ್ರ ಕಾನೂನು ಸಚಿವ ಅರುಣ್‌ ಜೈಟ್ಲಿ ತಿಳಿಸಿದ್ದಾರೆ.

ಕರ್ನಾಟಕದಲ್ಲಿ 13 ಜಲ್ದಿ ಚುಕ್ತಾ ಕೋರ್ಟುಗಳ ಕಲಾಪಗಳಿಗೆ ಚಾಲನೆ ನೀಡಿ, ಶನಿವಾರ ಅವರು ಮಾತಾಡುತ್ತಿದ್ದರು. ಕೊಳೆಯುತ್ತಿರುವ ಕ್ರಿಮಿನಲ್‌ ಪ್ರಕರಣಗಳ ಶೀಘ್ರ ವಿಲೇವಾರಿಗೆ ಕಳೆದ ಏಪ್ರಿಲ್‌ನಲ್ಲಿ ಫಾಸ್ಟ್‌ ಟ್ರ್ಯಾಕ್‌ (ಜಲ್ದಿ ಚುಕ್ತಾ ) ಕೋರ್ಟುಗಳ ಸ್ಥಾಪನೆ ಯೋಜನೆಯನ್ನು ಕೇಂದ್ರ ಸರ್ಕಾರ ಜಾರಿಗೆ ತಂದಿದೆ. ಇದರನ್ವಯ ಪ್ರತಿ ಜಿಲ್ಲೆಗೆ 5ರಂತೆ ಒಟ್ಟು 1734 ಶೀಘ್ರ ವಿಲೇವಾರಿ ಕೋರ್ಟುಗಳನ್ನು ಸ್ಥಾಪಿಸುವ ಪ್ರಸ್ತಾವನೆಯಿದೆ ಎಂದರು.

ದೇಶದ ಅಧೀನ ನ್ಯಾಯಾಲಗಳಲ್ಲಿ 2 ಕೋಟಿಗೂ ಹೆಚ್ಚು ಪ್ರಕರಣಗಳು ವಿಲೇವಾರಿಯಾಗದೆ ಉಳಿದಿವೆ. ಹೈಕೋರ್ಟಿನಲ್ಲೇ 34 ಲಕ್ಷ ಪ್ರಕರಣಗಳು ಕೊಳೆಯುತ್ತಿವೆ. ನ್ಯಾಯ ಇಷ್ಟು ವಿಳಂಬವಾಗಿ ದೊರೆತರೆ ಹೇಗೆ? ಈ ಕಾರಣಕ್ಕೇ ಜಲ್ದಿ ಚುಕ್ತಾ ಕೋರ್ಟುಗಳ ಸ್ಥಾಪನೆಗೆ ಸರ್ಕಾರ ಕೈ ಹಾಕಿದೆ. ಈ ಯೋಜನೆ ಪೂರ್ಣವಾದ ನಂತರ ನ್ಯಾಯಾಲಯ ಪ್ರಕರಣಗಳ ವಿಲೇವಾರಿ ಕ್ಷಿಪ್ರವಾಗಿ ನಡೆಯಲಿದೆ ಎಂದು ಜೈಟ್ಲಿ ಹೇಳಿದರು.

ಬೊಕ್ಕಸಕ್ಕೂ ಬೋನಸ್‌ : ಇತ್ಯರ್ಥವಾಗದ ಪ್ರಕರಣಗಳಿಗೆ ಸಂಬಂಧಿಸಿದ 1.68 ಲಕ್ಷ ಆರೋಪಿಗಳಿದ್ದಾರೆ. ಇವರಿಗಾಗಿ ರಾಜ್ಯ ಸರ್ಕಾರಗಳು ಪ್ರತಿ ವರ್ಷ 380 ಕೋಟಿ ರುಪಾಯಿ ಖರ್ಚು ಮಾಡುತ್ತಿವೆ. ಶೀಘ್ರ ವಿಲೇವಾರಿ ಕೋರ್ಟುಗಳ ಸ್ಥಾಪನೆಗೆ ಇನ್ನು 5 ವರ್ಷಗಳಲ್ಲಿ ಕೇಂದ್ರ ಸರ್ಕಾರ 500 ಕೋಟಿ ರುಪಾಯಿ ಮಾತ್ರ ಖರ್ಚು ಮಾಡಲಿದೆ. ಸರ್ಕಾರಗಳ ಬೊಕ್ಕಸಕ್ಕೂ ಈ ಯೋಜನೆ ಎಷ್ಟು ಮಹತ್ವದ್ದು ಎಂಬುದು ಇದರಿಂದ ಗೊತ್ತಾಗುತ್ತದೆ. ಕರ್ನಾಟಕದಲ್ಲಿ ಇಂಥಾ 93 ಕೋರ್ಟುಗಳನ್ನು ಸ್ಥಾಪಿಸುವ ಗುರಿಯಿದೆ ಎಂದರು.

ರಾಜ್ಯ ಹೈಕೋರ್ಟು ಎಷ್ಟು ಜಲ್ದಿ ಚುಕ್ತಾ ಕೋರ್ಟುಗಳು ಬೇಕೆನ್ನುತ್ತದೋ ಅಷ್ಟನ್ನೂ ಸ್ಥಾಪಿಸಲು ರಾಜ್ಯ ಸರ್ಕಾರ ಸಿದ್ಧ ಎಂದು ಶುಕ್ರವಾರದ ಸಚಿವ ಸಂಪುಟ ಸಭೆಯಲ್ಲಿ ಮುಖ್ಯಮಂತ್ರಿ ಕೃಷ್ಣ ತಿಳಿಸಿದ್ದಾರೆ ಎಂದು ಕಾನೂನು ಮತ್ತು ಸಂಸದೀಯ ವ್ಯವಹಾರಗಳ ಸಚಿವ ಡಿ.ಬಿ.ಚಂದ್ರೇಗೌಡ ತಿಳಿಸಿದರು.

(ಪಿಟಿಐ)