ಉಸ್ತಾದ್‌ ಝಾಕಿರ್‌ ಹುಸೇನ್‌ರಿಂದ ತಬಲಾಗೆ ಗುಡ್‌ಬೈ?

ನವದೆಹಲಿ : ತಬಲಾ ಮಾಂತ್ರಿಕ ನಲವತ್ತನಾಲ್ಕು ವರ್ಷಗಳ ಉಸ್ತಾದ್‌ ಝಾಕಿರ್‌ ಹುಸೇನ್‌ ಶಾಸ್ತ್ರೀಯ ಸಂಗೀತ ಕ್ಷೇತ್ರದಿಂದ ವಿರಮಿಸುವ ದಾರಿಯಲ್ಲಿದ್ದಾರಾ? ಸಮೀಪವರ್ತಿಗಳು ಹೌದೆನ್ನುತ್ತಾರೆ.

ಮಿತಿ ಮೀರಿದ ವಾಣಿಜ್ಯೀಕರಣಕ್ಕೊಳಗಾಗುತ್ತಿರುವ ಸಂಗೀತ ಕ್ಷೇತ್ರ ಝಾಕಿರ್‌ ಅವರನ್ನು ಹತಾಶರಾಗಿಸಿದೆಯಂತೆ. ತಬಲಾ ವಾದನ ಕೈ ಬಿಡಲು ಮತ್ತೊಂದು ಕಾರಣ ಉಸ್ತಾದರ ಬೆರಳುಗಳ ನೋವು. ಈ ವಿಷಯವನ್ನು ಉಸ್ತಾದರ ಸಮೀಪದ ಮೂಲಗಳನ್ನು ಉಲ್ಲೇಖಿಸಿ ಪಿ.ಟಿ.ಐ. ಸುದ್ದಿಸಂಸ್ಥೆ ವರದಿ ಮಾಡಿದೆ.

ಜುಲೈ ತಿಂಗಳ ಕೊನೆಯ ಭಾಗದಲ್ಲಿ ತಬಲಾಗೆ ಗುಡ್‌ಬೈ ಹೇಳುವ ವಿಷಯವನ್ನು ಝಾಕಿರ್‌ ಹುಸೇನ್‌ ಅವರು ಖುದ್ದಾಗಿ ಪ್ರಕಟಿಸುವರು ಎಂದು ಮೂಲಗಳು ತಿಳಿಸಿವೆ. ಅದರೆ, ಉಸ್ತಾದ್‌ರ ಮ್ಯಾನೇಜರ್‌ ಸನ್ನಿಧಿ ಪಟೇಲ್‌ ಅವರನ್ನು ಸಂಪರ್ಕಿಸಿದಾಗ, ಅವರು ಝಾಕಿರ್‌ ಅವರ ನಿವೃತ್ತಿಯನ್ನು ಖಚಿತಪಡಿಸಲೂ ಇಲ್ಲ ನಿರಾಕರಿಸಲೂ ಇಲ್ಲ ಎಂದು ಪಿ.ಟಿ.ಐ. ಹೇಳಿದೆ.

ಪ್ರಸಿದ್ಧ ತಬಲಾವಾದಕ ಅಲ್ಲಾ ರಖಾ ಅವರ ಪುತ್ರರಾದ ಝಾಕಿರ್‌ ಹುಸೇನ್‌, 12 ನೇ ವಯಸ್ಸಿನಲ್ಲಿಯೇ ತಮ್ಮ ಪ್ರಥಮ ತಬಲಾ ಕಚೇರಿ ನೀಡಿದ್ದರು. ಜಗತ್ತಿನಾದ್ಯಂತ ಲಕ್ಷಗಟ್ಟಲೆ ಅಭಿಮಾನಿಗಳನ್ನು ಹೊಂದಿರುವ ಝಾಕಿರ್‌ ಅವರ ತಬಲಾ ಹಾಗೂ ರವಿಶಂಕರ್‌ ಅವರ ಸಿತಾರ್‌ ಜುಗಲ್‌ಬಂದಿ ಸಂಗೀತ ಶ್ರೇಷ್ಠತೆಗೆ ಮತ್ತೊಂದು ಹೆಸರು.

ಝಾಕಿರ್‌ ಹುಸೇನ್‌ ಅವರು ಪ್ರಸ್ತುತ ತಮ್ಮ ಕುಟುಂಬದೊಂದಿಗೆ ಕ್ಯಾಲಿಫೋರ್ನಿಯಾದಲ್ಲಿ ವಾಸಿಸುತ್ತಿದ್ದಾರೆ.

(ಇನ್ಫೋ ವಾರ್ತೆ)