ವೀರಪ್ಪನ್‌ನಿಂದ ಯಾವುದೇ ಕ್ಯಾಸೆಟ್‌ ಸರ್ಕಾರಕ್ಕೆ ಬಂದಿಲ್ಲ - ಖರ್ಗೆ

ಬೆಂಗಳೂರು : ವೀರಪ್ಪನ್‌ನಿಂದ ರಾಜ್ಯ ಸರ್ಕಾರಕ್ಕೆ ಯಾವುದೇ ಕ್ಯಾಸೆಟ್‌ ಬಂದಿಲ್ಲ ಎಂದು ಗೃಹ ಸಚಿವ ಮಲ್ಲಿಕಾರ್ಜುನ ಖರ್ಗೆ ಸ್ಪಷ್ಟಪಡಿಸಿದ್ದಾರೆ.

ಕ್ಷಮಾದಾನ ನೀಡಿದರೆ ಶರಣಾಗಲು ಸಿದ್ಧ ಎನ್ನುವ ಸಂದೇಶದ ಕ್ಯಾಸೆಟ್‌ ತಮಿಳು ರಾಷ್ಟ್ರೀಯವಾದಿ ನೆಡುಮಾರನ್‌ ಮೂಲಕ ಕರ್ನಾಟಕ ಸರ್ಕಾರಕ್ಕೆ ತಲುಪಿದೆ ಎನ್ನುವ ವರದಿಗಳ ಹಿನ್ನೆಲೆಯಲ್ಲಿ ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಖರ್ಗೆ ಸ್ಪಷ್ಟನೆ ನೀಡುತ್ತಿದ್ದರು. ನಮಗೆ ಯಾವುದೇ ಕ್ಯಾಸೆಟ್‌ ಬಂದಿಲ್ಲ . ನಾವುಗಳೂ ವದಂತಿಗಳನ್ನು ಕೇಳುತ್ತಿದ್ದೇವೆ. ಆದರೆ, ಯಾವುದೇ ಅಧಕೃತ ಮಾಹಿತಿ ಸರ್ಕಾರಕ್ಕೆ ತಲುಪಿಲ್ಲ ಎಂದು ಖರ್ಗೆ ಹೇಳಿದರು.

ಕರ್ನಾಟಕ ಹಾಗೂ ತಮಿಳುನಾಡು ಪಡೆಗಳು ಶಿಕಾರಿಯಲ್ಲಿ ತೊಡಗಿರುವಾಗ ವೀರಪ್ಪನ್‌ಗೆ ಕ್ಷಮಾದಾನ ನೀಡುವ ಪ್ರಶ್ನೆಯೇ ಉದ್ಭವಿಸುವುದಿಲ್ಲ ಎಂದು ಪ್ರಶ್ನೆಯಾಂದಕ್ಕೆ ಅವರು ಉತ್ತರಿಸಿದರು. ಕ್ಷಮಾದಾನ ನೀಡುವಂತೆ ಒತ್ತಾಯಿಸಿರುವ ನೆಡುಮಾರನ್‌ ಹೇಳಿಕೆ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಮೂರನೇ ವ್ಯಕ್ತಿಯ ಮಾತಿಗೆ ಸರ್ಕಾರ ಪ್ರತಿಕ್ರಿಯಿಸಬೇಕಾದ ಅಗತ್ಯವಿಲ್ಲ ಎಂದರು.

(ಇನ್ಫೋ ವಾರ್ತೆ)

ಮುಖಪುಟ / ವೀರಪ್ಪನ್‌ ಶಿಕಾರಿ