ಬ್ಯಾಂಕ್‌ ಸಾಲದ ಮೇಲಿನ 252 ಕೋಟಿ ರು. ಸುಸ್ತಿ ಬಡ್ಡಿ ಮನ್ನಾ

ಬೆಂಗಳೂರು : ರೈತರು, ರಾಜ್ಯದ ವಿವಿಧ ಪ್ರಾಥಮಿಕ ಕೃಷಿ ಹಾಗೂ ಭೂ ಬ್ಯಾಂಕ್‌ನಿಂದ ಪಡೆದಿರುವ ದೀರ್ಘಾವಧಿ ಸಾಲವನ್ನು ಇನ್ನು ಒಂದು ತಿಂಗಳ ಅವಧಿಯಾಳಗೆ - ಒಂದೇ ಕಂತಿನಲ್ಲಿ ಮರುಪಾವತಿಸಿದರೆ ಸುಸ್ತಿ ಬಡ್ಡಿ ಮನ್ನಾ ಮಾಡುವುದಾಗಿ ರಾಜ್ಯ ಸರಕಾರ ಪ್ರಕಟಿಸಿದೆ.

ರಾಜ್ಯದ ಮೂರು ಲಕ್ಷಕ್ಕೂ ಹೆಚ್ಚು ರೈತರು, ವಿವಿಧ ಸಹಕಾರಿ ಕೃಷಿ ಬ್ಯಾಂಕ್‌ಗಳಿಂದ ಪಡೆದಿರುವ 1,031 ಕೋಟಿ ರುಪಾಯಿ ಸಾಲವನ್ನು ಮರು ಪಾವತಿ ಮಾಡಲು ಸರಕಾರ ಒಂದು ತಿಂಗಳ ಕಾಲಾವಕಾಶ ನೀಡಿದೆ. ಈ ಸಂಬಂಧ 252 ಕೋಟಿ ರುಪಾಯಿಗಳ ಭಾರಿ ಮೊತ್ತದ ಸುಸ್ತಿ ಬಡ್ಡಿಯನ್ನು ಮನ್ನಾ ಮಾಡುವುದಾಗಿಯೂ ಸರಕಾರ ಘೋಷಿಸಿದೆ.

ನಬಾರ್ಡ್‌ ಜಾರಿಗೆ ತಂದಿರುವ ಒಂದೇ ಕಂತಿನ ಸಾಲ ತೀರುವಳಿ ಯೋಜನೆ ಅನ್ವಯ ಸರಕಾರ ಈ ಮಹತ್ವದ ನಿರ್ಧಾರ ಪ್ರಕಟಿಸಿದೆ. ಮೂರು ಲಕ್ಷ ರೈತರಿಗೆ ನೆರವಾಗಲು ಈ ಯೋಜನೆ ಪ್ರಕಟಿಸಲಾಗಿದೆ. ರೈತರು ಇದರ ಲಾಭ ಪಡೆದರೆ, ಸುಲಭವಾಗಿ ಋಣಮುಕ್ತರಾಗಬಹುದು ಎಂದೂ ಸರಕಾರ ಪ್ರಕಟಿಸಿದೆ.

ಈ ವಿಷಯವನ್ನು ರಾಜ್ಯದ ಸಹಕಾರಿ ಸಚಿವ ಡಿ.ಕೆ. ಶಿವಕುಮಾರ್‌ ಪ್ರಕಟಿಸಿದ್ದಾರೆ. 5 ಲಕ್ಷ ರುಪಾಯಿಗಳವರೆಗೆ ದೀರ್ಘಾವಧಿ ಸಾಲ ಪಡೆದಿರುವ ರೈತರಿಗೆ ಈ ಯೋಜನೆಯ ಲಾಭ ದೊರೆಯಲಿದೆ. ಇವರು ಸರಳ ಬಡ್ಡಿಯ ಲೆಕ್ಕಾಚಾರದಲ್ಲಿ ತಮ್ಮ ಸಾಲ ಮರುಪಾವತಿ ಮಾಡಬಹುದು ಎಂದೂ ಅವರು ತಿಳಿಸಿದರು.

(ಯು.ಎನ್‌.ಐ)