ಬಿಜಾಪುರದ ಮಹಾಲಿಂಗಪುರ ಅಭಿವೃದ್ಧಿಗೆ ಕೇಂದ್ರದಿಂದ 2 ಕೋಟಿ

ಮಹಾಲಿಂಗಪುರ: ಬಿಜಾಪುರ ಜಿಲ್ಲೆಯ ಮಹಾಲಿಂಗಪುರ ತಾಲೂಕು ಕೊನೆಗೂ ಕೇಂದ್ರ ಸರಕಾರದ ಕಣ್ಣಿಗೆ ಬಿದ್ದಿದೆ. ಪಟ್ಟಣದ ಅಭಿವೃದ್ಧಿಗೆಂದು 2 ಕೋಟಿ ರೂಪಾಯಿ ಕೇಂದ್ರದ ನೆರವು ಬಂದಿರುವುದಾಗಿ ಜಮಖಂಡಿ ನಗರ ಸಭೆಯ ಅಧ್ಯಕ್ಷ ಸೈಯ್ಯದ್‌ ಮಸ್ತಾನ್‌ ಹೇಳಿದ್ದಾರೆ.

ಸಣ್ಣ ಹಾಗೂ ಮಧ್ಯಮ ನಗರ ಮತ್ತು ಪಟ್ಟಣಗಳ ಅಭಿವೃದ್ಧಿ ಯೋಜನೆಯಡಿಯಲ್ಲಿ ಮಹಾಲಿಂಗಪುರಕ್ಕೆ ಈ ಹಣ ದೊರೆತಿದ್ದು, 80 ಲಕ್ಷ ರೂಪಾಯಿ ವೆಚ್ಚದಲ್ಲಿ ವಾಣಿಜ್ಯ ಸಂಕೀರ್ಣ ಮತ್ತು 60 ಲಕ್ಷ ರೂಪಾಯಿ ವೆಚ್ಚದಲ್ಲಿ ರಸ್ತೆ ಮತ್ತು ಒಳಚರಂಡಿಗಳನ್ನು ಅಭಿವೃದ್ಧಿಗೊಳಿಸಲಾಗುವುದು. ಉಳಿದ ಹಣದಲ್ಲಿ ನಗರ ಸಭೆ ಕಟ್ಟಡ ಮತ್ತು ಸಮುದಾಯ ಭವನವೊಂದನ್ನು ನಿರ್ಮಿಸಲಾಗುವುದು ಎಂದು ಸೈಯ್ಯದ್‌ ಮಸ್ತಾನ್‌ ಹೇಳಿದ್ದಾರೆ.

ಇದರ ಜೊತೆಗೆ ಶಾಶ್ವತ ಕುಡಿಯುವ ನೀರು ಒದಗಿಸಲು ಕೇಂದ್ರವು 8 ಕೋಟಿ ರೂಪಾಯಿಗಳ ಅನುದಾನ ಬಿಡುಗಡೆ ಮಾಡಿದೆ ಎಂದು ಸೈಯ್ಯದ್‌ ಹೇಳಿದ್ದಾರೆ. ಮಳೆಗಾಲದಲ್ಲಿ ಆರಂಭವಾಗುವ ಕುಡಿಯುವ ನೀರಿನ ಮತ್ತು ಒಳಚರಂಡಿ ಕಾಮಗಾರಿ ಮುಂದಿನ ಮಳೆಗಾಲಕ್ಕಾದರೂ ಜನರ ಉಪಯೋಗಕ್ಕೆ ಬಂದೀತೇ ?

(ಇನ್ಫೋ ವಾರ್ತೆ)