ಕುದುರೆಮುಖ ಗಣಿಗಾರಿಕೆ : ಕೋರ್ಟ್‌ ಆದೇಶ ಉಲ್ಲಂಘಿಸಿದ ಸರ್ಕಾರ

ಬೆಂಗಳೂರು : ಕುದುರೆಮುಖರಾಷ್ಟ್ರೀಯ ಉದ್ಯಾನವನವನ್ನು ರಕ್ಷಿಸಿ ಎಂದು ಪರಿಸರವಾದಿಗಳು ಬೊಬ್ಬಿರಿಯುತ್ತಿದ್ದಂತೆಯೇ, ರಾಷ್ಟ್ರೀಯ ಉದ್ಯಾನವನ ವ್ಯಾಪ್ತಿಯಲ್ಲಿ ಬರುವ 3703.55 ಹೆಕ್ಟೇರ್‌ ಅರಣ್ಯ ಭೂಮಿಯನ್ನು ಸರಕಾರ ಡಿನೋಟಿಫೈ ಮಾಡಿ ಗಣಿಗಾರಿಕೆಗೆ ಅನುವು ಮಾಡಿಕೊಟ್ಟಿದೆ.

ಕಳೆದ ಎರಡು ವರ್ಷಗಳ ಹಿಂದೆ ಗುತ್ತಿಗೆ ಅವಧಿ ಮುಗಿದು ಹೋಗಿದ್ದರೂ ಮತ್ತೆ ಕೆಐಓಸಿಎಲ್‌ಗೆ ಗಣಿಗಾರಿಕೆಗೆ ಅವಕಾಶ ಕಲ್ಪಿಸುವ ಉದ್ದೇಶದಿಂದ ರಾಜ್ಯ ಸರಕಾರ ಈ ಕ್ರಮ ಕೈಗೊಂಡಿದೆ. ಯಥಾವತ್ತಾಗಿ ಕುದುರೆಮುಖ ವೈಲ್ಡ್‌ ಲೈಫ್‌ ಫೌಂಡೇಷನ್‌ ಸರಕಾರದ ಈ ಕ್ರಮವನ್ನು ನ್ಯಾಯಾಂಗ ನಿಂದನೆಯ ಕ್ರಮವಾಗಿದೆ ಎಂದು ಆರೋಪಿಸಿದೆ.

ಕಳೆದ ನವೆಂಬರ್‌ 11ರಂದು ರಾಜ್ಯ ಸರಕಾರಕ್ಕೆ ಆದೇಶ ನೀಡಿ ಯಾವುದೇ ಕಾರಣಕ್ಕೂ ಕುದುರೆಮುಖ ರಾಷ್ಟ್ರೀಯ ಉದ್ಯಾನವನದ ವ್ಯಾಪ್ತಿಗೆ ಬರುವ ಭೂಮಿಯನ್ನು ಡಿನೋಟಿಫೈ ಮಾಡಬಾರದು ಎಂದು ನ್ಯಾಯಾಲಯ ಆದೇಶಿಸಿತ್ತು.

ಒಂದುವೇಳೆ ಭೂಮಿಯನ್ನು ಡಿನೋಟಿಫೈ ಮಾಡುವ ಪ್ರಸಂಗ ಎದುರಾದಲ್ಲಿ ಪ್ರಸ್ತಾಪವನ್ನು ವಿಧಾನಸಭೆ ಮುಂದಿಡಬೇಕು ಮತ್ತು ಅರಣ್ಯಜೀವಿ ಮಂಡಳಿಯ ಅಭಿಪ್ರಾಯವನ್ನು ಪರಿಗಣನೆಗೆ ತೆಗೆದುಕೊಳ್ಳಬೇಕು ಎಂದೂ ನ್ಯಾಯಾಲಯ ಹೇಳಿತ್ತು. ಆದರೆ ರಾಜ್ಯ ಸರಕಾರ ಕೋರ್ಟಿನ ಈ ಯಾವುದೇ ಆದೇಶಗಳಿಗೆ ಕಿವಿಗೊಡದೇ ರಾಷ್ಟ್ರೀಯ ಉದ್ಯಾನವನದ ಭೂಮಿಯನ್ನು ಡಿನೋಟಿಫೈ ಮಾಡಿದೆ ಎಂದು ಕುದುರೆಮುಖ ವೈಲ್ಡ್‌ ಲೈಫ್‌ ಫೌಂಡೇಷನ್‌ ಸರಕಾರದ ಕ್ರಮವನ್ನು ಖಂಡಿಸಿದೆ.

(ಇನ್ಫೋ ವಾರ್ತೆ)