ಮನಸ್ಸು ತಂಪು ಮಾಡಿದ ಮಳೆ ಬರುವ ಸುದ್ದಿ

ಬೆಂಗಳೂರು : ಬುಧವಾರ ರಾಜ್ಯದಲ್ಲಿ ಮಳೆ ಸುಳಿದಿಲ್ಲ. ಎಲ್ಲರೂ ಬಿಸಿಲ ಬಾಳೆಹಣ್ಣನ್ನೇ ಮೆಲ್ಲುತ್ತಿದ್ದಾರೆ. ಎಲ್ಲೆಲ್ಲೂ ಸೂರ್ಯನದೇ ಕಾರುಭಾರು. ತೆರೆದ ಬಾವಿಗಳಲ್ಲಿ ನೀರು ತಳ ಮುಟ್ಟಿದ್ದರೆ, ಕೊಳವೆ ಬಾವಿಗಳಲ್ಲಿ ನೀರಿಗಾಗಿ ಕೈಪೊಂಪಿನ ತಿದಿ ಒತ್ತಿ ಒತ್ತಿ ಜನ ಸುಸ್ತಾಗಿದ್ದಾರೆ.

ಮೊದಲಿನಂತೆ ಜಲ ಮಂಡಳಿ ಕೂಡ ಈಗ ಗಂಟೆಗಟ್ಟಲೆ ನೀರು ಬಿಡುತ್ತಿಲ್ಲ. ಸರಿ ಹೊತ್ತಿನಲ್ಲಿ ಬಿಡುವ ಹನಿ ನೀರಿಗೆ ಕಾಯುತ್ತಾ ಕುಳಿತುಕೊಳ್ಳುವ ಮಂದಿ, ನಿದ್ರೆಯನ್ನೂ ಹಾಳು ಮಾಡಿಕೊಳ್ಳುತ್ತಿದ್ದಾರೆ. ಬೇಸಿಗೆಯಲ್ಲೇ ಹೀಗೆ. ಜಲಾಶಯಗಳಲ್ಲಿ ನೀರಿನ ಮಟ್ಟ ಕಡಿಮೆ ಆಗುತ್ತದೆ. ಅಂತರ್ಜಲ ಮಟ್ಟವೂ ಕುಸಿಯುತ್ತದೆ. ಒಟ್ಟಿನಲ್ಲಿ ಬೇಸಿಗೆ ಬಂತೆಂದರೆ ನೀರಿಗೆ ಹಾಹಾಕಾರ.

ಗ್ರಾಮೀಣ ಪ್ರದೇಶದ ಜನ ಅದರಲ್ಲೂ ಉತ್ತರ ಕರ್ನಾಟಕದ ಕೆಲವು ಭಾಗಗಳಲ್ಲಿ ನೀರಿನ ಕ್ಷಾಮ ತೀವ್ರವಾಗಿದ್ದರೆ, ಇತ್ತ ಮಹಾ ನಗರಗಳಲ್ಲಿ ಪೆಪ್ಸಿ, ಕೋಲಾಗಳು ಸಾರ್ವಭೌಮತ್ವವನ್ನೇ ಮೆರೆಯುತ್ತಿವೆ.

ಈ ಮಧ್ಯೆ ರಾಜ್ಯದಲ್ಲಿ ಸಂಪೂರ್ಣವಾಗಿ ಒಣಹವೆ ಇತ್ತು. ರಾಜ್ಯದ ಗರಿಷ್ಠ ತಾಪಮಾನದಲ್ಲಿ ಸ್ವಲ್ಪ ಬದಲಾವಣೆ ಆಗಿತ್ತು. ದಕ್ಷಿಣ ಒಳನಾಡು, ಕರಾವಳಿಯಲ್ಲಿ ಅದು ಸಾಮಾನ್ಯ ಮಟ್ಟಕ್ಕಿಂತಲೂ ಹೆಚ್ಚಾಗಿತ್ತು. ರಾಜ್ಯದ ಅತಿ ಹೆಚ್ಚು ತಾಪಮಾನ ರಾಯಚೂರಿನಲ್ಲಿ 42 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿತ್ತು.

ಮುನ್ಸೂಚನೆಯ ಪ್ರಕಾರ ಒಳನಾಡಿನ ಕೆಲವೆಡೆ ಗುಡುಗಿನಿಂದ ಕೂಡಿದ ಸುರಿಮಳೆ ನಿರೀಕ್ಷಿತ. ಕರಾವಳಿಯಲ್ಲಿ ಒಣಹವೆ ಇರಲಿದೆ. ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಭಾಗಶಃ ಮೋಡ ಕವಿದ ವಾತಾವರಣ ಇದ್ದು, ಸಂಜೆ ಅಥವಾ ರಾತ್ರಿ ಮಳೆ ಆಗುವ ಸೂಚನೆ ಇದೆ ಎಂದಿದೆ ಕೇಂದ್ರ ಹವಾಮಾನ ವೀಕ್ಷಣಾಲಯದ ವರದಿ. ಈ ವರದಿ ಕೇಳಿದ ಬೆಂಗಳೂರಿಗರ ಮನಸ್ಸು ಕೊಂಚ ತಣ್ಣಗಾಗಿದೆ. ಆದಾಗ್ಯೂ ಗರಿಷ್ಠ ತಾಪಮಾನ 34 ಡಿಗ್ರಿ ಸೆಲ್ಸಿಯಸ್‌ ಇರುತ್ತದೆ ಎನ್ನುವುದು ಕೊಂಚ ಬೆವರಿಳಿಸಿದೆ ಅಷ್ಟೇ.