ಸ್ಥಳೀಯ ಸಂಸ್ಥೆ ಚುನಾವಣೆ : 13,731 ಅಭ್ಯರ್ಥಿಗಳು ಕಣದಲ್ಲಿ

ಬೆಂಗಳೂರು : ಮೇ 3ರಂದು ರಾಜ್ಯದ 148 ಸ್ಥಳೀಯ ಸಂಸ್ಥೆಗಳಿಗೆ ನಡೆಯಲಿರುವ ಚುನಾವಣೆಯ ಕಾವು ರಾಜ್ಯದೆಲ್ಲೆಡೆ ಕಾಣಿಸಿಕೊಳ್ಳುತ್ತಿದೆ. 3,722 ಸ್ಥಾನಗಳಿಗೆ ನಡೆಯುವ ಈ ಚುನಾವಣೆಯ ಕಣದಲ್ಲಿ 13,731 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ.

ನಾಮಪತ್ರ ಹಿಂದಕ್ಕೆ ತೆಗೆದುಕೊಳ್ಳಲು ಕೊನೆಯದಿನವಾಗಿದ್ದ ಶನಿವಾರ ಒಟ್ಟು 5,444 ನಾಮಪತ್ರಗಳನ್ನು ವಾಪಸ್‌ ಪಡೆಯಲಾಗಿದ್ದು, ಬಹುತೇಕ ಎಲ್ಲೆಡೆ ಕಾಂಗ್ರೆಸ್‌, ಜನತಾದಳ (ಯು), ಜನತಾದಳ (ಎಸ್‌), ಬಿ.ಜೆ.ಪಿ ಹಾಗೂ ಪಕ್ಷೇತರರ ನಡುವೆ ಬಹುಕೋಣ ಸ್ಪರ್ಧೆ ಏರ್ಪಟ್ಟಿದೆ.

ಈವರೆಗೆ ಒಟ್ಟು 142 ಸ್ಥಾನಗಳಿಗೆ ಅವಿರೋಧ ಆಯ್ಕೆ ನಡೆದಿದೆ. ಮಹಾನಗರ ಪಾಲಿಕೆ, ನಗರಸಭೆ, ಪಂಚಾಯ್ತಿಗಳಿಗೆ ನಡೆಯುತ್ತಿರುವ ಈ ಚುನಾವಣೆಯಲ್ಲಿ ಕಾಂಗ್ರೆಸ್‌ನ 3223, ಸಂಯುಕ್ತ ದಳದ 1474, ಬಿಜೆಪಿಯ 1657, ಜಾತ್ಯತೀತ ದಳದ 1,312, ಬಿಎಸ್‌ಪಿಯ 182, ಸಿಪಿಎಂನ 27, ಸಿಪಿಐನ 49, ಎನ್‌ಸಿಪಿಯ 3 ಹಾಗೂ 5803 ಪಕ್ಷೇತರ ಅಭ್ಯರ್ಥಿಗಳು ಗೆಲುವಿಗೆ ಹೋರಾಟ ನಡೆಸಲಿದ್ದಾರೆ.

ಹತ್ತಿರ ಹತ್ತಿರ ಒಂದು ಸಾವಿರ ಕ್ಷೇತ್ರಗಳಲ್ಲಿ ಕಾಂಗ್ರೆಸ್‌ನ ಬಂಡಾಯ ಅಭ್ಯರ್ಥಿಗಳು ಕಣದಲ್ಲಿದ್ದು, ಕಾಂಗ್ರೆಸ್‌ಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಒಟ್ಟಿನಲ್ಲಿ ಸ್ಥಳೀಯ ಸಂಸ್ಥೆಗಳ ಚುನಾವಣೆಯ ಹಿನ್ನೆಲೆಯಲ್ಲಿ ರಾಜ್ಯದಲ್ಲೂ ಚುನಾವಣೆ ಕಾವು ಏರುತ್ತಿದೆ.