ಮಂಗಳೂರು : ಏ. 21 ರಂದು ಕೆ.ಕೆ. ಶೆಟ್ಟಿ ಜನ್ಮ ಶತಾಬ್ಧಿ ಕಾರ್ಯಕ್ರಮ

ಮಂಗಳೂರು : ಮಹಾತ್ಮಗಾಂಧಿ ಶಾಂತಿ ಪ್ರತಿಷ್ಠಾನ , ದೇಶಭಕ್ತಿ ಕಾರ್ನಾಡ್‌ ಸದಾಶಿವರಾವ್‌ ಸ್ಮಾರಕ ಟ್ರಸ್ಟ್‌ ಸೇರಿದಂತೆ ಹಲವು ಸಂಘ ಸಂಸ್ಥೆಗಳನ್ನು ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಕಟ್ಟಿ ಬೆಳೆಸಿದ ಖ್ಯಾತಿಯ ದಿವಂಗತ ಕೆ.ಕೆ. ಶೆಟ್ಟಿ ಅವರ ಜನ್ಮ ಶತಾಬ್ಧಿ ವರ್ಷ ಆಚರಣೆಗೆ ಸಿದ್ಧತೆಗಳು ಭರದಿಂದ ನಡೆದಿವೆ.

ಕಾರ್ನಾಡ್‌ ಸದಾಶಿವರಾವ್‌ ಸ್ಮಾರಕ ಟ್ರಸ್ಟ್‌ನ ಆಡಳಿತ ಮಂಡಳಿ ಜನ್ಮ ಶತಾಬ್ಧಿ ಆಚರಣೆಗೆ ಯೋಜನೆಯನ್ನು ರೂಪಿಸಿದ್ದು , ಇದಕ್ಕಾಗಿ ಕೆ.ಕೆ. ಶೆಟ್ಟಿ ಜನ್ಮ ಶತಾಬ್ಧಿ ಆಚರಣಾ ಸಮಿತಿ ಅಸ್ತಿತ್ವಕ್ಕೆ ಬಂದಿದೆ. ಏಪ್ರಿಲ್‌ 21 ರಂದು ನಡೆಯಲಿರುವ ಕೆ.ಕೆ. ಶೆಟ್ಟಿ ಜನ್ಮ ಶತಾಬ್ಧಿ ಕಾರ್ಯಕ್ರಮದಲ್ಲಿ ಶೆಟ್ಟಿಯವರ ಕುಟುಂಬದ ಸದಸ್ಯರನ್ನು ಗೌರವಿಸಲು ತೀರ್ಮಾನಿಸಲಾಗಿದೆ. ಜನ್ಮ ಶತಾಬ್ಧಿ ಪ್ರಯುಕ್ತ ಸ್ಮಾರಕಭವನವನ್ನು ನಿರ್ಮಿಸಲು ಉದ್ದೇಶಿಸಲಾಗಿದ್ದು , ಈಗಾಗಲೇ ಕೆ.ಕೆ.ಶೆಟ್ಟಿ ಸ್ಮಾರಕ ಭವನಕ್ಕೆ ಶಿಲಾನ್ಯಾಸ ಜರುಗಿದೆ.

ವಿಚಾರಗೋಷ್ಠಿ : ಇಂದಿನ ರಾಜಕಾರಣಿಗಳಿಗೆ ಹಿಂದಿನ ರಾಜಕಾರಣಿಗಳ ಸಂದೇಶ ಎಂಬ ವಿಷಯದ ಬಗ್ಗೆ ಜಿಲ್ಲೆಯಾದ್ಯಂತ ವಿಚಾರಗೋಷ್ಠಿಗಳನ್ನು ಹಮ್ಮಿಕೊಳ್ಳಲಾಗುವುದು ಎಂದು ಜನ್ಮ ಶತಾಬ್ಧಿ ಆಚರಣಾ ಸಮಿತಿ ಗೌರವಾಧ್ಯಕ್ಷ ಕೆ.ಕೆ. ಪೈ ತಿಳಿಸಿದ್ದಾರೆ.

(ಮಂಗಳೂರು ಪ್ರತಿನಿಧಿಯಿಂದ)