ಎಂಥ ಮಳೆಯಯ್ಯ ಇದು ಎಂಥ ಮಳೆಯೋ..

ಬೆಂಗಳೂರು : ಅಕಾಲದಲ್ಲಿ ಇದೆಂಥಾ ಮಳೇರೀ.. ಎಂದು ಜನ ಮಾತಾಡಿಕೊಳ್ಳುತ್ತಿದ್ದಾರೆ. ಅಲ್ಲ , ಯುಗಾದಿ ಕಳೆದ ಮೇಲೆ ಒಂದು ಹದ ಮಳೆ ಬರತ್ತೆ ನಿಜ, ಆದರೆ, ಹೀಗೆ 3 -4 ದಿನ ಜಡಿ ಮಳೆ ಉಂಟೆ? ಇದೇನು ಸ್ವಾತಿ ಮಳೆಯೇ ಎಂದು ಒಬ್ಬರನ್ನೊಬ್ಬರು ಪ್ರಶ್ನಿಸುತ್ತಿದ್ದಾರೆ.

ಬೆಂಗಳೂರಲ್ಲಿ ಈಹೊತ್ತು (ಸೋಮವಾರ ಮಧ್ಯಾಹ್ನ) ಮಳೆ ಸುರಿಯುತ್ತಿದೆ. ದೊರದಲ್ಲೆಲ್ಲೋ ಮಂಜು ಮುಸುಕಿದಂತೆ ಭಾಸವಾಗುತ್ತಿದೆ. ರಸ್ತೆಯೇ ಕಾಣದಂತೆ, ಗುಡುಗು ಸಹಿತ ಸುರಿಮಳೆ ಸುರಿಯುತ್ತಿದೆ. ಒಂದೆರಡು ತಿಂಗಳಿಂದ ಕಾದ ಹೆಂಚಾಗಿದ್ದ ಭೂಮಿ ಸಂಪೂರ್ಣ ತಣ್ಣಗಾಗಿದೆ.

ಭಾನುವಾರ ಬೆಳಗ್ಗೆ ಕೊಂಚ ಬಿಡುವುಕೊಟ್ಟಿದ್ದ ಮಳೆ ಮತ್ತೆ ಸಂಜೆಗೆಲ್ಲಾ ಶುರುವಾಯಿತು. ಹೆಚ್ಚೂ ಕಡಿಮೆ ರಾತ್ರಿ 11 ಗಂಟೆಯವರೆಗೂ ನಿಲ್ಲದೆ ಸುರಿಯಿತು. ಏಪ್ರಿಲ್‌ ತಿಂಗಳಿನಲ್ಲಿ ಬೆಂಗಳೂರಿನಲ್ಲಿ ಸುರಿದಿರುವ ದಾಖಲೆಯ ಮಳೆ ಇದು. ಕಳೆದ ನಾಲ್ಕು ದಿನಗಳಿಂದ ಬೆಂಗಳೂರಲ್ಲಿ ಹತ್ತಿರ ಹತ್ತಿರ 85 ಮಿಲಿ ಮೀಟರ್‌ ಮಳೆ ಆಗಿದೆ. ಯಲಹಂಕ ವಾಯುಪಡೆ ವಿಮಾನ ನಿಲ್ದಾಣದಲ್ಲಿ ಮೊನ್ನೆ 9 ಸೆಂಟಿ ಮೀಟರ್‌ನಷ್ಟು ಮಳೆ ಬಿದ್ದಿದೆ.

ಕಳೆದ 24 ಗಂಟೆಗಳ ಅವಧಿಯಲ್ಲಿ ದಕ್ಷಿಣ ಒಳನಾಡಿನ ಅಲ್ಲಲ್ಲಿ ಮಳೆ ಆಗಿದ್ದರೆ, ಉತ್ತರ ಒಳನಾಡು ಹಾಗೂ ಕರಾವಳಿಯಲ್ಲಿ ಒಣಹವೆ ಮುಂದುವರಿದಿದೆ. ಬಾಳೆ ಹೊನ್ನೂರಿನಲ್ಲಿ 6 ಸೆಂಟಿ ಮೀಟರ್‌, ಕೋಲಾರದಲ್ಲಿ 5, ಶಿರಾದಲ್ಲಿ 4, ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ 3 ಸೆಂಟಿ ಮೀಟರ್‌ ಮಳೆ ಬಿದ್ದಿದೆ. ರಾಜ್ಯದ ಗರಿಷ್ಠ ಉಷ್ಣಾಂಶದಲ್ಲಿ ಕೂಡ ಸ್ವಲ್ಪ ಬದಲಾವಣೆ ಆಗಿದೆ. ದಕ್ಷಿಣ ಒಳನಾಡಿನಲ್ಲಿ ಅದು ಸಾಮಾನ್ಯ ಮಟ್ಟಕ್ಕಿಂತಲೂ ಕಡಿಮೆ ಇತ್ತು. ಕರಾವಳಿಯಲ್ಲಿ ಸಾಮಾನ್ಯವಾಗಿತ್ತು.

ರಾಜ್ಯದ ಅತಿ ಹೆಚ್ಚಿನ ತಾಪಮಾನ 36 ಡಿಗ್ರಿ ಸೆಲ್ಸಿಯಸ್‌ ಗುಲ್ಬರ್ಗಾದಲ್ಲಿ ದಾಖಲಾಗಿತ್ತು. ಮುನ್ಸೂಚನೆಯ ರೀತ್ಯ ಮುಂದಿನ 36 ಗಂಟೆಗಳ ಅವಧಿಯಲ್ಲಿ ಕರಾವಳಿಯೂ ಸೇರಿದಂತೆ ರಾಜ್ಯದ ಅಲ್ಲಲ್ಲಿ ಚದುರಿದಂತೆ ಗುಡುಗು ಸಹಿತ ಸುರಿಮಳೆ ಬೀಳುವ ಸಂಭವ ಇದೆ. ಉತ್ತರ ಒಳನಾಡಿನಲ್ಲಿ ಒಣಹವೆ ಮುಂದುವರಿಯಲಿದೆ. ಬೆಂಗಳೂರು ಹಾಗೂ ಸುತ್ತಮುತ್ತ ಭಾಗಶಃ ಮೋಡ ಕವಿದಿದ್ದು, ಸಂಜೆ ಅಥವಾ ರಾತ್ರಿ ಗುಡುಗು ಸಹಿತ ಮಳೆ ಆಗಲಿದೆ. ಗರಿಷ್ಠ ತಾಪಮಾನ 31 ಡಿಗ್ರಿ ಸೆಲ್ಸಿಯಸ್‌ ತಲುಪುವ ಸೂಚನೆ ಇದೆ.