ಬೆಳ್ತಂಗಡಿ : ಕಾಜೂರು ಉರುಸ್‌ನಲ್ಲಿ ಸರ್ವ ಧರ್ಮ ಸಮ್ಮೇಳನ

ಬೆಳ್ತಂಗಡಿ : ದಕ್ಷಿಣ ಕನ್ನಡದ ಬೆಳ್ತಂಗಡಿ ತಾಲ್ಲೂಕಿನ ಪ್ರಖ್ಯಾತ ಕಾಜೂರು ದರ್ಗಾ ಉರೂಸ್‌ ಭಾನುವಾರ ವಿಜೃಂಭಣೆಯಿಂದ ನಡೆಯಿತು.

ಪಶ್ಚಿಮ ಘಟ್ಟದ ತಪ್ಪಲಿನಲ್ಲಿ ಹರಿಯುವ ನೇತ್ರಾವತಿ ನದಿ ದಡದಲ್ಲಿರುವ ಕಾಜೂರು ದರ್ಗಾ ದಕ್ಷಿಣ ಕನ್ನಡದ ಪ್ರಖ್ಯಾತ ದರ್ಗಾಗಳಲ್ಲೊಂದು. ಉಳ್ಳಾಲ ಮತ್ತು ಕಾಜೂರು ದರ್ಗಾ ಉರೂಸ್‌ ದಕ್ಷಿಣ ಕನ್ನಡದ ಬ್ಯಾರಿ ಜನಾಂಗದವರಿಗೆ ಮಾತ್ರವಲ್ಲದೆ ಕೇರಳದ ಮಲಯಾಳೀ ಮುಸ್ಲಿಮರಿಗೂ ಪವಿತ್ರವಾದುದು. ಜಾತಿಯ ಬೇಲಿಯಿಲ್ಲದೆ, ಭಕ್ತಾದಿಗಳು ಬಂದು ಇಲ್ಲಿ ಹರಕೆ ಸಲ್ಲಿಸುತ್ತಾರೆ. ಯಾಸೀನ್‌ ಪಾರಾಯಣ ಮಾಡುತ್ತಾರೆ.

ಈ ಬಾರಿಯ ಉರೂಸಿನ ಅಂಗವಾಗಿ ಭಾನುವಾರ ರಾತ್ರಿ ಸರ್ವಧರ್ಮಿಯರ ಸಮ್ಮೇಳನ ಆಯೋಜಿಸಲಾಗಿತ್ತು. ಸಮ್ಮೇಳನವನ್ನು ಬೆಳ್ತಂಗಡಿ ಶಾಸಕ ಪ್ರಭಾಕರ್‌ ಬಂಗೇರಾ ಉದ್ಘಾಟಿಸಿ, ಧಾರ್ಮಿಕ ಸಹಿಷ್ಣುತೆ ಇಂದಿನ ಕಾಲದಲ್ಲಿ ಅತೀ ಅಗತ್ಯ ಎಂದರು.

ಶಾಸಕ ಕೆ. ಎಂ. ಇಬ್ರಾಹಿಂ , ಫಾದರ್‌ ಎಫ್‌. ಎಕ್ಸ್‌ . ಗೇಮ್ಸ್‌, ಬಿ. ಇಬ್ರಾಹಿಂ , ಸಂಸದ ಡಿ. ಸಿ. ಶ್ರೀ ಕಂಠಪ್ಪ ಪಾಲ್ಗೊಂಡು ಮಾತನಾಡಿ ಪರಸ್ಪರ ಪ್ರೀತಿ ಅನ್ಯೋನ್ಯತೆಯಿಂದ ಹೊಂದಿಕೊಂಡು ಹೋಗುವುದೇ ಧರ್ಮ . ಮುಸಲ್ಮಾನರಲ್ಲಿ ಶಿಕ್ಷಣ ಕಡಿಮೆ. ಅವರು ಸುಶಿಕ್ಷಿತರಾಗಬೇಕು. ಕಾಜೂರಿನಲ್ಲೊಂದು ಸೌಹಾರ್ದ ಭವನ ನಿರ್ಮಾಣವಾಗಬೇಕು ಎಂದರು.

ಬುದ್ಧ ಪ್ರತಿಮೆ ನಾಶಕ್ಕೆ ಇಸ್ಲಾಂನ ಬೆಂಬಲವಿಲ್ಲ

ಹಾಜಿ ಬಿ.ಎಂ. ಉಮರ್‌ ಕುಂಞಿ ಮಸ್ಲಿಯಾರ್‌ ಅವರು ತಾಲಿಬಾನ್‌ಗಳು ಧರ್ಮದ ತಿರುಳು ಅರಿಯದವರು. ಬುದ್ಧನ ಪ್ರತಿಮೆ ನಾಶ ಮಾಡಿದ ಅವರಿಗೆ ಧರ್ಮದ ಬೆಂಬಲ ಇಲ್ಲ ಎಂದರು. ಬುದ್ಧವ ಪ್ರತಿಮೆ ನಾಶಕ್ಕೆ ಇಸ್ಲಾಂ ಧರ್ಮ ಕಾರಣವಲ್ಲ. ಅದು ವಿಗ್ರಹಾರಾಧನೆಯನ್ನು ಖಂಡಿಸುತ್ತದೆಯಾದರೂ ವಿಗ್ರಹಾರಾಧನೆ ಮಾಡುವವರನ್ನು ಗೌರವಿಸಬೇಕು ಎನ್ನುತ್ತದೆ. ನೀತಿ ಧರ್ಮವಿಲ್ಲದ ರಾಜಕೀಯದಿಂದಾಗಿ ಇಂದು ಕ್ಷೋಭೆ ಉಂಟಾಗುತ್ತಿದೆ ಎಂದರು. ಮಾಜಿ ಶಾಸಕ ಕೆ. ಗಂಗಾಧರ ಗೌಡ, ಪ್ರದೀಪ್‌ ಕುಮಾರ್‌ ಕಲ್ಕೂರ ಮಾತನಾಡಿ ಎಲ್ಲರೂ ಸಹೋದರರು ಎಂಬ ಭಾವನೆ ಬೆಳೆಯಲು ಧರ್ಮಗಳು ಕಾರಣವಾಗಬೇಕು ಎಂದರು.

ಕಾಜೂರು ದರ್ಗಾ ಶರೀಫ್‌ ಆಡಳಿತ ಸಮಿತಿಯ ಅಧ್ಯಕ್ಷ ಹಾಜಿ ಕೆ. ಎಂ. ಉಸ್ಮಾನ್‌ ಅಧ್ಯಕ್ಷತೆ ವಹಿಸಿದ್ದರು. ಹಾಜಿ ಉಸ್ತಾದ್‌ ನೇತೃತ್ವದಲ್ಲಿ ದಪ್ಪು ಕಾರ್ಯಕ್ರಮ ನಡೆಯಿತು.

(ಮಂಗಳೂರು ಪ್ರತಿನಿಧಿಯಿಂದ)