ತಣ್ಣಗಾದ ತೆಹಲ್ಕಾ ಚಂಡಮಾರುತ, ಸಂಸತ್ತಿನಲ್ಲಿ ಇನ್ನು ತಂಗಾಳಿ !

ನವದೆಹಲಿ : ತೆಹಲ್ಕಾ ಹಗರಣಕ್ಕೆ ಸಂಬಂಧಿಸಿದಂತೆ ಸರ್ಕಾರದ ರಾಜೀನಾಮೆಗೆ ಪಟ್ಟು ಹಿಡಿದು ಸಂಸತ್‌ ಕಲಾಪಗಳನ್ನು ಬಹಿಷ್ಕರಿಸಿದ್ದ ಪ್ರತಿಪಕ್ಷಗಳು, ಮಂಗಳವಾರದಿಂದ ಉಭಯ ಸದನದ ಕಲಾಪಗಳಲ್ಲಿ ಭಾಗವಹಿಸಲು ನಿರ್ಧರಿಸಿವೆ.

ಲೋಕಸಭಾ ಸ್ಪೀಕರ್‌ ಜಿಎಂಸಿ ಬಾಲಯೋಗಿ ಅವರು ಸೋಮವಾರ ಬೆಳಿಗ್ಗೆ ಕರೆದಿದ್ದ ರಾಜಕೀಯ ಧುರೀಣರ ಸಭೆಯಲ್ಲಿ , ಮಂಗಳವಾರದಿಂದ ಕಲಾಪಕ್ಕೆ ಹಾಜರಾಗುವುದಾಗಿ ಹಾಗೂ ಕಲಾಪಗಳನ್ನು ಸುಗಮವಾಗಿ ನಡೆಸಿಕೊಂಡು ಹೋಗಲು ಅನುವು ಮಾಡಿಕೊಡುವುದಾಗಿ ರಾಜಕೀಯ ಪಕ್ಷಗಳ ಧುರೀಣರು ಬಾಲಯೋಗಿ ಅವರಿಗೆ ಭರವಸೆ ನೀಡಿದ್ದಾರೆ. ಸಭೆಯ ನಂತರ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವ ಪ್ರಮೋದ್‌ ಮಹಾಜನ್‌ ಈ ವಿಷಯವನ್ನು ಸ್ದುದಿಗಾರರಿಗೆ ತಿಳಿಸಿದರು.

ಈ ಮುನ್ನ ಮಾರ್ಚ್‌ 10 ರಿಂದ ಪ್ರಾರಂಭವಾಗಿದ್ದ ಅಧಿವೇಶನವನ್ನು 10 ದಿನಗಳ ಕಾಲ ಪ್ರತಿಪಕ್ಷಗಳ ಸದಸ್ಯರು ತಡೆಗಟ್ಟಿದ್ದರಿಂದ ಕಲಾಪಗಳನ್ನು ಮುಂದೂಡಲಾಗಿತ್ತು . ಪ್ರಸ್ತುತ, ಸಂಸತ್ತಿನಲ್ಲಿ ಯಾವುದೇ ಚರ್ಚೆಗೆ ಸಿದ್ಧ ಎಂದು ಸರ್ಕಾರವು ಘೋಷಿಸಿರುವುದರಿಂದ ಪ್ರತಿಪಕ್ಷಗಳು ತಮ್ಮ ಪಟ್ಟನ್ನು ಸಡಿಲಿಸಿವೆ.

ಈ ನಡುವೆ, ಬಾಲಯೋಗಿ ಅವರ ನೇತೃತ್ವದಲ್ಲಿ ಸೋಮವಾರ ನಡೆದ ರಾಜಕೀಯ ಪಕ್ಷಗಳ ಸಭೆಯಲ್ಲಿ ಎರಡನೇ ಹಂತದ ಅಧಿವೇಶನವನ್ನು ಬೇಗನೆ ಮುಗಿಸುವಂತೆ ಕೆಲವು ಸದಸ್ಯರು ಸಲಹೆ ಮಾಡಿದ್ದಾರೆ. ಮೇ 10 ರಂದು ಕೆಲವು ರಾಜ್ಯಗಳಲ್ಲಿ ನಡೆಯುವ ವಿಧಾನಸಭೆ ಚುನಾವಣೆಗಳ ಪ್ರಚಾರದಲ್ಲಿ ಭಾಗವಹಿಸುವ ಹಿನ್ನೆಲೆಯಲ್ಲಿ ಏಪ್ರಿಲ್‌ ಕೊನೆಗೆ ಅಧಿವೇಶನವನ್ನು ಮುಕ್ತಾಯಗೊಳಿಸಲು ಈ ಸದಸ್ಯರು ಸೂಚಿಸಿದ್ದಾರೆ.

(ಯುಎನ್‌ಐ)