ರೋಟರಿಯಿಂದ ಗ್ರಾಮೀಣರಿಗೆ ಕಂಪ್ಯೂಟರ್‌ ಶಿಕ್ಷಣ ಯೋಜನೆ

ಬೆಂಗಳೂರು : ಕಂಪ್ಯೂಟರ್‌ ಕಲಿಯುವ ಆಸಕ್ತಿ ಇದ್ದೂ ಕಂಪ್ಯೂಟರ್‌ ಶಿಕ್ಷಣ ವಂಚಿತ ಗ್ರಾಮೀಣ ವಿದ್ಯಾರ್ಥಿಗಳಿಗೆ ಹೊಸ ಯೋಜನೆಯಾಂದನ್ನು ರೋಟರಿ ಪಶ್ಚಿಮ ಹಾಗೂ ಐಟೀಂ ಟೆಕ್ನಾಲಜೀಸ್‌ ಆರಂಭಿಸಿದೆ. ಗ್ರಾಮೀಣ ಪ್ರದೇಶದ ಜನರು ಎದುರಿಸುತ್ತಿರುವ ಕಂಪ್ಯೂಟರ್‌ ಶಿಕ್ಷಣದ ಕೊರತೆಯನ್ನು ನೀಗಲು ಈ ಯೋಜನೆ ರೂಪಿಸಲಾಗಿದೆ.

2001ನೇ ಸಾಲಿನಲ್ಲೇ 40 ಸಾವಿರ ಮಂದಿಗೆ ಕಂಪ್ಯೂಟರ್‌ ಕಲಿಸುವ ಗುರಿ ಹೊಂದಲಾಗಿದೆ. ರಾಜ್ಯಾದ್ಯಂತ ಇರುವ ರೋಟರಿ ಕ್ಲಬ್‌ ಶಾಖೆಗಳಲ್ಲಿ ಕಂಪ್ಯೂಟರ್‌ ತರಬೇತಿ ಕೇಂದ್ರಕ್ಕೆ ಸ್ಥಳ ಒದಗಿಸಲಾಗುವುದು ಎಂದು ಯೋಜನೆಯ ಸಂಚಾಲಕ ಸನತ್‌ಕುಮಾರ್‌ ತಿಳಿಸಿದ್ದಾರೆ.

ಈ ತರಬೇತಿಗೆ ಐಟೀಂ ಟೆಕ್ನಾಲಜೀಸ್‌ ನುರಿತ ಶಿಕ್ಷಕರು, ಸಾಫ್ಟ್‌ವೇರ್‌ ಪೂರೈಸಲಿದೆ. ಗ್ರಾಮೀಣ ವಿದ್ಯಾರ್ಥಿಗಳಿಗಾಗಿಯೇ ಮೀಸಲಾದ ಈ ಯೋಜನೆಯಲ್ಲಿ ಕಂಪ್ಯೂಟರ್‌ನ ಮೂಲಭೂತ ವಿಷಯಗಳು, ಎಂ.ಎಸ್‌. ಡಾಸ್‌, ವಿಂಡೋಸ್‌, ಪವರ್‌ ಪಾಯಿಂಟ್‌ ಹಾಗೂ ಇಂಟರ್‌ನೆಟ್‌ ಬಗ್ಗೆ ಶಿಕ್ಷಣ ನೀಡಲಾಗುವುದು ಎಂದೂ ಅವರು ಹೇಳಿದರು.

ಶನಿವಾರ ಸಂಜೆ 6 ಗಂಟೆಗೆ ಕನ್ನಡ ಭವನದ ನಯನ ಸಭಾಂಗಣದಲ್ಲಿ ಈ ಯೋಜನೆಯನ್ನು ಶಿಕ್ಷಣ ಸಚಿವ ಎಚ್‌. ವಿಶ್ವನಾಥ್‌ ಉದ್ಘಾಟಿಸುವರು. ಬರಗೂರು ರಾಮಚಂದ್ರಪ್ಪ, ಸಚಿವ ಡಾ. ಜಿ. ಪರಮೇಶ್ವರ್‌ ಸಮಾರಂಭದಲ್ಲಿ ಭಾಗವಹಿಸುವರು ಎಂದೂ ಅವರು ತಿಳಿಸಿದ್ದಾರೆ.