ಮಂಗಳೂರು : ಗುಂಡೇಟು ತಿಂದ ಬ್ಯಾಂಕ್‌ ಅಧಿಕಾರಿ ಸಾವು

ಮಂಗಳೂರು : ಕರ್ನಾಟಕ ಬ್ಯಾಂಕ್‌ನ ಕೊಡಿಯಾಲ ಬೈಲ್‌ ಪ್ರಧಾನ ಕಚೇರಿಯ ವಿಶೇಷ ಸಹಾಯಕ ಯು. ರಾಮಕೃಷ್ಣ ಅವರು ತಮ್ಮ ಸಹೋದ್ಯೋಗಿ ಹಾರಿಸಿದ ಗುಂಡಿಗೆ ಬಲಿಯಾಗಿದ್ದಾರೆ.

ಸೋಮವಾರ, ರಾಮಕೃಷ್ಣ ಅವರು ಕರ್ತವ್ಯ ನಿರತರಾಗಿದ್ದಾಗ, ಬ್ಯಾಂಕ್‌ ಶಾಖೆಯ ಭದ್ರತಾ ಸಿಬ್ಬಂದಿ ಸುಧಾಕರ ತನ್ನ ರೈಫಲ್‌ನಿಂದ ಗುಂಡು ಹಾರಿಸಿದ. ಕಿಬ್ಬೊಟ್ಟೆಗೆ ಗುಂಡು ತಗುಲಿದ ರಾಮಕೃಷ್ಣ ಅವರನ್ನು ತಕ್ಷಣವೇ ಆಸ್ಪತ್ರೆಗೆ ಸೇರಿಸಲಾಯಿತಾದರೂ, ತೀವ್ರವಾಗಿ ಗಾಯಗೊಂಡಿದ್ದ ಅವರನ್ನು ಬದುಕುಳಿಸಲು ವೈದ್ಯರು ನಡೆಸಿದ ಪ್ರಯತ್ನಗಳು ವಿಫಲವಾದವು.

ಗುಂಡು ಹಾರಿಸಿದ ಆರೋಪಿ ಸುಧಾಕರ ಪೊಲೀಸರಿಗೆ ಶರಣಾಗಿದ್ದಾರೆ. ಹತ್ಯೆಗೆ ಕಾರಣ ಈವರೆಗೆ ಸ್ಪಷ್ಟವಾಗಿಲ್ಲ . ಸೇನೆಯಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದ ಸುಧಾಕರ್‌, ಅನಂತರ ಕರ್ನಾಟಕ ಬ್ಯಾಂಕ್‌ನ ಭದ್ರತಾ ವಿಭಾಗದಲ್ಲಿ ಕೆಲಸ ನಿರ್ವಹಿಸುತ್ತಿದ್ದರು. ಇತ್ತೀಚೆಗೆ ಅವರು ಮಾನಸಿಕವಾಗಿ ಅಸ್ವಸ್ಥರಾಗಿದ್ದರು ಎಂದು ಕೆಲವರು ಹೇಳುತ್ತಿದ್ದಾರೆ, ತನಿಖೆ ಮುಂದುವರಿಯುತ್ತಿದೆ.

(ಮಂಗಳೂರು ಪ್ರತಿನಿಧಿಯಿಂದ)