ಕರ್ನಾಟಕ ಬ್ಯಾಂಕ್‌ ನೌಕರರ ಸಂಘದ ಅಧ್ಯಕ್ಷರ ಕೊಲೆ ಯತ್ನ

ಮಂಗಳೂರು : ಕರ್ನಾಟಕ ಬ್ಯಾಂಕ್‌ ನೌಕರರ ಸಂಘದ ಅಧ್ಯಕ್ಷ ಹಾಗೂ ಬ್ಯಾಂಕ್‌ನ ಕೊಡಿಯಾಲ ಬೈಲ್‌ ಶಾಖೆ ವಿಶೇಷ ಸಹಾಯಕ ಯು. ರಾಮಕೃಷ್ಣ ಅವರನ್ನು ಬ್ಯಾಂಕ್‌ನ ಪ್ರಧಾನ ಕಚೇರಿಯಲ್ಲಿಯೇ ಗುಂಡು ಹಾರಿಸಿ ಕೊಲ್ಲುವ ಪ್ರಯತ್ನವೊಂದು ಸೋಮವಾರ ಬೆಳಗ್ಗೆ ನಡೆದಿದೆ.

ರಾಮಕೃಷ್ಣ ಸೋಮವಾರ ಕರ್ತವ್ಯ ನಿರತರಾಗಿದ್ದಾಗ, ಬ್ಯಾಂಕ್‌ ಶಾಖೆಯ ಭದ್ರಾತಾ ಸಿಬ್ಬಂದಿ ಸುಧಾಕರ ತನ್ನ ರೈಫಲ್‌ನಿಂದ ಗುಂಡು ಹಾರಿಸಿದ. ಗುಂಡು ರಾಮಕೃಷ್ಣರ ಕಿಬ್ಬೊಟ್ಟೆಗೆ ತಗುಲಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರ ಸ್ಥಿತಿ ಚಿಂತಾಜನಕವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ಗುಂಡು ಹಾರಿಸಿದ ಆರೋಪಿ ಸುಧಾಕರ ಪೊಲೀಸರಿಗೆ ಶರಣಾಗಿದ್ದಾನೆ. ಹಿರಿಯ ಪೊಲೀಸ್‌ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡದ್ದರು. ಬ್ಯಾಂಕ್‌ನಲ್ಲಿ ಗುಂಡು ಹಾರಿದ್ದರಿಂದ ಬ್ಯಾಂಕ್‌ ಸಿಬ್ಬಂದಿ ದಿಗ್ಭ್ರಮೆಗೊಂಡ ಕಾರಣ ಸೋಮವಾರ ಕೋಡಿಯಾಲ ಬೈಲ್‌ ಶಾಖೆಯ ವ್ಯವಹಾರ ಸ್ಥಗಿತಗೊಂಡಿತ್ತು. ಮಂಗಳೂರಿನಲ್ಲೂ ಆತಂಕ ಮನೆ ಮಾಡಿತ್ತು.

ಈ ಹತ್ಯೆ ಪ್ರಯತ್ನಕ್ಕೆ ಕಾರಣ ಏನು ಎಂದು ತಿಳಿದುಬಂದಿಲ್ಲ. ರಾಮಕೃಷ್ಣ ಮಂಗಳೂರು ಶಾಖೆ ಸಿಬ್ಬಂದಿಯಾಗಿದ್ದು, ನೌಕರರ ಸಂಘದ ಪದಾಧಿಕಾರಿಯಾಗಿ ಉಳಿಯಬೇಕು ಎಂಬ ಕಾರಣಕ್ಕಾಗಿ ಅಧಿಕಾರಿ ಹುದ್ದೆಗೆ ದೊರೆತಿದ್ದ ಬಡ್ತಿಯನ್ನು ನಿರಾಕರಿಸಿದ್ದರು ಎಂದು ಬ್ಯಾಂಕ್‌ ನೌಕರ ಸಂಘದ ಮೂಲಗಳು ತಿಳಿಸಿವೆ.

(ಮಂಗಳೂರು ಪ್ರತಿನಿಧಿಯಿಂದ)