ಇನ್ನು ಮುಂದೆ ಭಾರತದ ವಿರುದ್ಧ ಪಾಕಿಸ್ತಾನ ಕ್ರಿಕೆಟ್‌ ಆಡುವುದಿಲ್ಲ?

ದುಬೈ : ಪಾಕ್‌ ವಿರುದ್ಧ ಭಾರತ ತಂಡ ಶಾರ್ಜಾದಲ್ಲಿ ಆಡುವುದಿಲ್ಲ ಎಂದು ಭಾರತ ಸರ್ಕಾರ ಪಟ್ಟು ಹಿಡಿದಿರುವ ಸುದ್ದಿ ಕ್ರಿಕೆಟರ್ಸ್‌ ಬೆನಿಫಿಟ್‌ ಫಂಡ್‌ ಸೀರೀಸ್‌ (ಸಿಬಿಎಫ್‌ಎಸ್‌) ಗೆ ಆಶ್ಚರ್ಯ ಉಂಟುಮಾಡಿದೆ. ಸೇರಿಗೆ ಸವ್ವಾ ಸೇರು ಎಂಬಂತೆ ಈಗ ಭಾರತದ ವಿರುದ್ಧ ಆಡಲು ಪಾಕ್‌ ಕ್ರಿಕೆಟ್‌ ಮಂಡಲಿ ಕೂಡ ಒಲ್ಲೆ ಎನ್ನುತ್ತಿದೆ.

ಭಾನುವಾರ ಯಾವ ಸಚಿವಾಲಯವೂ ಕಾರ್ಯ ನಿರ್ವಹಿಸುವುದಿಲ್ಲ. ಇಂಥಾ ದಿನ ಭಾರತ ಶಾರ್ಜಾದಲ್ಲಿ ಆಡುವುದಿಲ್ಲ ಎಂಬ ವರದಿಗಳು ಹೊರಬಿದ್ದಿವೆ ಎಂದರೆ ನಮಗೆ ನಂಬಲಾಗುತ್ತಿಲ್ಲ. ಆದರೆ ಕ್ರೀಡಾ ಸಚಿವೆ ಉಮಾ ಭಾರತಿ ಈ ಕುರಿತು ಇನ್ನೂ ಅಧಿಕೃತ ಹೇಳಿಕೆ ಕೊಟ್ಟಿಲ್ಲವಾದ್ದರಿಂದ, ಅವರು ಈ ಬಾರಿ ನಿರಾಶೆ ಮಾಡುವುದಿಲ್ಲ ಎಂಬ ನಂಬುಗೆ ನಮ್ಮದು ಎಂದು ಸಿಬಿಎಫ್‌ಎಸ್‌ ಅಧ್ಯಕ್ಷ ಅಬ್ದುಲ್‌ ರೆಹಮಾನ್‌ ಬುಖಾತಿರ್‌ ಗಲ್ಫ್‌ ನ್ಯೂಸ್‌ಗೆ ತಿಳಿಸಿದ್ದಾರೆ.

ಏಪ್ರಿಲ್‌ 8ರಿಂದ ಶುರುವಾಗಲಿರುವ ಕೋಕಾ ಕೋಲಾ ಕಪ್‌ ಕ್ರಿಕೆಟ್‌ ಟೂರ್ನಿಯಲ್ಲಿ ಭಾರತ ಭಾಗವಹಿಸುವುದಿಲ್ಲ ಎಂದು ಅಧಿಕಾರಿಯಾಬ್ಬರು ತಿಳಿಸಿರುವ ವರದಿ ಮಾಧ್ಯಮಗಳಲ್ಲಿ ಪ್ರಕಟವಾಗಿದೆ. ರೆಹಮಾನ್‌ ಇದಕ್ಕೆ ಪ್ರತಿಕ್ರಿಯಿಸುತ್ತಾ ಈ ಮಾತನ್ನು ಹೇಳಿದ್ದಾರೆ.

ಭಾನುವಾರ ನಾನು ಬಿಸಿಸಿಐ ಅಧ್ಯಕ್ಷ ಎ.ಸಿ.ಮುತ್ತಯ್ಯ ಅವರೊಂದಿಗೆ ಫೋನಿನ ಮೂಲಕ ಮಾತಾಡಿದೆ. ಅವರೂ ಈ ನಿರ್ಣಯದ ಬಗ್ಗೆ ಏನೂ ಗೊತ್ತಿಲ್ಲ ಅಂದರು. ಈ ಮೊದಲು ಭಾರತ ಸರ್ಕಾರ ಟೊರಾಂಟೋ ಹಾಗೂ ಮಲೇಷಿಯಾದಲ್ಲಿ ನಡೆಯಲಿರುವ ಟೂರ್ನಿಗೆ ತಂಡವನ್ನು ಕಳುಹಿಸಲು ನಿರಾಕರಿಸಿತ್ತು. ಶಾರ್ಜಾ ಟೂರ್ನಿಯಲ್ಲಿ ಭಾಗವಹಿಸುವ ಬಗೆಗೆ ಎದ್ದಿರುವ ಜಿಜ್ಞಾಸೆಗೆ ಇನ್ನೂ ಅಂತಿಮ ಉತ್ತರ ಸರ್ಕಾರದಿಂದ ಸಿಗಬೇಕಿದೆ ಎಂದಿದ್ದಾರೆ.

ಈ ಹಿನ್ನೆಲೆಯಲ್ಲಿ ಬೇಸತ್ತಿರುವ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ ಇನ್ನು ಮುಂದೆ ತಮ್ಮ ತಂಡ ಭಾರತದ ವಿರುದ್ಧ ಎಲ್ಲೂ ಆಡುವುದಿಲ್ಲ ಎಂಬ ಐತಿಹಾಸಿಕ ನಿರ್ಣಯವನ್ನೂ ಕೈಗೊಂಡಿದೆ ಎಂದು ಕರಾಚಿಯಲ್ಲಿನ ಮೂಲಗಳು ದೃಢಪಡಿಸಿವೆ.

(ಯುಎನ್‌ಐ)