ಕಮರ್ಷಿಯಲ್‌ ಸಿನಿಮಾಗಳಿಗೆ ಫೈನಾನ್ಸ್‌ಗೆ ಮುಂದಾಗಿರುವ ಐಡಿಬಿಐ

ಬೆಂಗಳೂರು : ಕಮರ್ಷಿಯಲ್‌ ಸಿನಿಮಾಗಳಿಗೆ ಧನ ಸಹಾಯ ಒದಗಿಸುವ ಯೋಜನೆಯಾಂದನ್ನು ಭಾರತೀಯ ಕೈಗಾರಿಕೆಗಳ ಅಭಿವೃದ್ಧಿ ಬ್ಯಾಂಕ್‌(ಐಡಿಬಿಐ) ಸದ್ಯದಲ್ಲಿಯೇ ಪರಿಚಯಿಸಲಿದೆ.

ಯೋಜನೆಯನ್ನು ಅಂತಿಮಗೊಳಿಸಲಾಗಿದ್ದು, ಅದನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌, ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವಾಲಯ ಹಾಗೂ ಬ್ಯಾಂಕುಗಳ ಸಲಹಾ ಮಂಡಳಿಗೆ ಕಳುಹಿಸಲಾಗಿದೆ. ಮಾರ್ಚ್‌ 16 ರಂದು ನಡೆಯುವ ಐಡಿಬಿಐನ ಬೋರ್ಡ್‌ ಮೀಟಿಂಗ್‌ನಲ್ಲಿ ಯೋಜನೆಯನ್ನು ಔಪಚಾರಿಕವಾಗಿ ಅಂಗೀಕರಿಸಲಾಗುವುದು. ಈ ವಿಷಯವನ್ನು ಐಡಿಬಿಐ ಅಧ್ಯಕ್ಷ ಎಸ್‌.ಕೆ. ಚಕ್ರವರ್ತಿ ಸೋಮವಾರ ಪ್ರಕಟಿಸಿದ್ದಾರೆ.

ಉತ್ತಮ ಹಿನ್ನೆಲೆಯನ್ನು ಹೊಂದಿರುವ ನಿರ್ಮಾಪಕರು ಹಾಗೂ ನಿರ್ದೇಶಕರನ್ನು ಹೊಂದಿರುವ ಸಿನಿಮಾಗಳಿಗೆ ಈ ಸೌಲಭ್ಯ ದೊರೆಯುವುದು. ಪ್ರಸಕ್ತ ಹಣಕಾಸಿನ ವರ್ಷದಲ್ಲೇ ಕನಿಷ್ಠ ಎರಡು ಸಿನಿಮಾಗಳಿಗೆ ಆರ್ಥಿಕ ನೆರವನ್ನು ನೀಡಲು ಉದ್ದೇಶಿಸಿರುವ ಯೋಜನೆ, ನಂತರದ ದಿನಗಳಲ್ಲಿ ಪ್ರಾದೇಶಿಕ ಸಿನಿಮಾ ಹಾಗೂ ಟಿವಿ ಧಾರಾವಾಹಿಗಳತ್ತಲೂ ತನ್ನ ಗಮನ ಹರಿಸುವುದು. ಸಂಸ್ಥೆಗಳ ಆರ್ಥಿಕ ಸಹಾಯದಿಂದಾಗಿ ಸಿನಿಮಾ ನಿರ್ಮಾಣದ ವೆಚ್ಚ ಗಣನೀಯವಾಗಿ ತಗ್ಗುವುದು ಎನ್ನುವ ವಿಶ್ವಾಸವನ್ನು ಚಕ್ರವರ್ತಿ ವ್ಯಕ್ತಪಡಿಸಿದ್ದಾರೆ.

(ಯುಎನ್‌ಐ)