11 ಜಿಲ್ಲೆಗಳಲ್ಲಿ ರುಡ್‌ಸೆಟ್‌ ಶಾಖೆ ಸ್ಥಾಪನೆಗೆ ರಾಜ್ಯದಿಂದ ನೆರವು

ಮಂಗಳೂರು : ರಾಜ್ಯದ 11 ಜಿಲ್ಲೆಗಳಲ್ಲಿ ರುಡ್‌ಸೆಟ್‌ ಶಾಖೆ ಸ್ಥಾಪಿಸಲು ರಾಜ್ಯ ಸರಕಾರ ನೆರವು ನೀಡಲಿದೆ ಎಂದು ಸಣ್ಣ ಕೈಗಾರಿಕಾ ಸಚಿವ ಎಸ್‌. ಆರ್‌. ಕಾಶಪ್ಪನವರ್‌ ಹೇಳಿದ್ದಾರೆ.

ದಕ್ಷಿಣ ಕನ್ನಡ ಜಿಲ್ಲೆಯ ಉಜಿರೆಯಲ್ಲಿ ಅವರು ರುಡ್‌ ಸೆಟ್‌ ಸಂಸ್ಥೆಯ ವಿವಿಧೋದ್ಧೇಶ ತರಬೇತಿ ಕಟ್ಟಡ ಉದ್ಘಾಟಿಸಿ ಮಾತನಾಡುತ್ತಿದ್ದರು. ಗ್ರಾಮೀಣ ಭಾಗದ ಯುವಕ ಯುವತಿಯರು ರುಡ್‌ಸೆಟ್‌ಲ್ಲಿ ಸ್ವ ಉದ್ಯೋಗದ ತರಬೇತಿ ಪಡೆಯುವಂತಾಗಲು ಧನಸಹಾಯ ಮಾಡುವಂತೆ ಅವರು ಇದೇ ಸಂದರ್ಭದಲ್ಲಿ ಗ್ರಾಮೀಣಾಭಿವೃದ್ಧಿ ರಾಜ್ಯ ಸಚಿವ ಎಂ. ದಿವಾಕರ ಬಾಬು ಅವರನ್ನು ಒತ್ತಾಯಿಸಿದರು.

ಮುಖ್ಯ ಅತಿಥಿ ಸ್ಥಾನದಿಂದ ಮಾತನಾಡಿದ ದಿವಾಕರ ಬಾಬು, ರುಡ್‌ ಸೆಟ್‌ ರಾಜ್ಯದ ಇತರ ಜಿಲ್ಲೆಗಳಲ್ಲಿ ಸ್ಥಾಪಿಸಲು ಉದ್ದೇಶಿಸಿರುವ ಶಾಖೆಯ ಕಟ್ಟಡಗಳಿಗೆ ನೆರವು ನೀಡುವಂತೆಯಾ ಸರಕಾರಕ್ಕೆ ಶಿಫಾರಸು ಮಾಡುವುದಾಗಿ ಭರವಸೆ ನೀಡಿದರು. ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರಹೆಗ್ಗಡೆ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು.

(ಮಂಗಳೂರು ಪ್ರತಿನಿಧಿಯಿಂದ)