ರಾಜ್ಯದ ಪಾಲಿಗೆ ನಿರಾಶಾದಾಯಕ ರೈಲ್ವೆ ಬಜೆಟ್‌ - ಎಸ್‌.ಎಂ.ಕೃಷ್ಣ

ಬೆಂಗಳೂರು : ಕೇಂದ್ರ ರೈಲ್ವೆ ಖಾತೆ ಸಚಿವೆ ಮಮತಾ ಬ್ಯಾನರ್ಜಿ ಸೋಮವಾರ ಸಂಸತ್ತಿನಲ್ಲಿ ಮಂಡಿಸಿದ 2001 ನೇ ಸಾಲಿನ ರೈಲ್ವೆ ಬಜೆಟ್‌ ರಾಜ್ಯದ ಪಾಲಿಗೆ ತೀವ್ರ ನಿರಾಶೆ ತಂದಿದೆ ಎಂದು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಹೇಳಿದ್ದಾರೆ.

ರಾಜ್ಯದ ಆಶೋತ್ತರಗಳನ್ನು ಈಡೇರಿಸುವಲ್ಲಿ ಬಜೆಟ್‌ ವಿಫಲವಾಗಿದೆ. ರಾಜ್ಯಕ್ಕೆ ಯಾವುದೇ ಹೊಸ ಯೋಜನೆಗಳನ್ನು ಪರಿಚಯಿಸುವಲ್ಲಿಯೂ ಬಜೆಟ್‌ ಯಶಸ್ವಿಯಾಗಿಲ್ಲ ಎಂದು ಸೋಮವಾರ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ಕೃಷ್ಣ ಆಪಾದಿಸಿದರು.

ಪಶ್ಚಿಮ ಬಂಗಾಳ ಗಾದಿಯ ಮೇಲೆ ಕಣ್ಣು : ಬಜೆಟ್‌ ತುಂಬಾ ರಾಜಕೀಯವೇ ಗೋಚರಿಸುತ್ತದೆ. ರೈಲ್ವೆ ಬಜೆಟ್‌, ಮಮತಾ ಅವರು ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿಯ ಕುರ್ಚಿಯ ಮೇಲೆ ಕಣ್ಣಿಟ್ಟಿರುವುದನ್ನು ಖಚಿತಪಡಿಸುತ್ತದೆ ಎಂದು ಭಾರೀ ಕೈಗಾರಿಕಾ ಸಚಿವ ಆರ್‌.ವಿ. ದೇಶಪಾಂಡೆ ರೈಲ್ವೆ ಬಜೆಟ್‌ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ. ಐಟಿ ಕ್ಷೇತ್ರವನ್ನು ಹೊರತುಪಡಿಸಿದರೆ ಉಳಿದೆಲ್ಲಾ ಕ್ಷೇತ್ರಗಳು ಸಂಕಷ್ಟದಲ್ಲಿರುವಾಗ ಆಕೆ ವಿವಿಧ ಯೋಜನೆಗಳಿಗೆ ಹಣ ತರುವುದಾದರೂ ಎಲ್ಲಿಂದ ಎಂದು ದೇಶಪಾಂಡೆ ಪ್ರಶ್ನಿಸಿದ್ದಾರೆ.

ಪ್ರಯಾಣಿಕರಿಗೆ ಅನುಕೂಲ : ಕರ್ನಾಟಕದ ಬಗ್ಗೆ ವಿಶೇಷ ಗಮನ ಹರಿಸದಿದ್ದರೂ, ಪ್ರಯಾಣಿಕರಿಗೆ ರೈಲ್ವೆ ಬಜೆಟ್‌ ಫ್ರೆಂಡ್ಲಿಯಾಗಿದೆ ಎಂದು ಫೆಡರೇಷನ್‌ ಆಫ್‌ ಚೇಂಬರ್ಸ್‌ ಆಫ್‌ ಕಾಮರ್ಸ್‌ ಅಂಡ್‌ ಇಂಡಸ್ಟ್ರಿ ಅಭಿಪ್ರಾಯಪಟ್ಟಿದೆ. ಅಪರೂಪದ ಸಂಪನ್ಮೂಲಗಳನ್ನು ಹಿತಕರವಾಗಿ ಬಳಸಿಕೊಳ್ಳುವ ಮಮತಾ ಅವರ ಉದ್ದೇಶವನ್ನು ಚೇಂಬರ್‌ ಮೆಚ್ಚಿಕೊಂಡಿದೆ.

(ಯುಎನ್‌ಐ)