ಮಕ್ಕಳಿಗಾಗಿಯೇ ಬೆಂಗಳೂರಲ್ಲೊಂದು ಐಟಿ ಪಾರ್ಕ್‌ ಆರಂಭ

ಬೆಂಗಳೂರು : ಬೆಂಗಳೂರಿನಲ್ಲಿ ಇನ್ನೊಂದು ಐ.ಟಿ. ಪಾರ್ಕ್‌ ಆರಂಭವಾಗಿದೆ. ಅದೂ ಮಕ್ಕಳಿಗಾಗಿ ಮಾತ್ರ. ಚೆನ್ನೈ ಮೂಲದ ಮಾಹಿತಿ ತಂತ್ರಜ್ಞಾನ - ಕಿಡ್ಸ್‌ ಸಂಸ್ಥೆ ಬೆಂಗಳೂರಿನ ರಾಜಾಜಿನಗರ ಬಡಾವಣೆಯಲ್ಲಿ ಶಿವರಾತ್ರಿಯ ದಿನವಾದ ಬುಧವಾರ ಕಿಡ್ಸ್‌ ಐಟಿ ಪಾರ್ಕ್‌ ಪ್ರಾರಂಭಿಸಿತು.

ನಾಲ್ಕು ವರ್ಷದಿಂದ 14ವರ್ಷದೊಳಗಿನ ಮಕ್ಕಳಿಗಾಗಿಯೇ ಈ ಕಿಡ್ಸ್‌ ಪಾರ್ಕ್‌ ರೂಪಿಸಲಾಗಿದೆ. ಮಾಹಿತಿ ತಂತ್ರಜ್ಞಾನದ ಮೂಲಭೂತ ಅಂಶಗಳ ಬಗ್ಗೆ ಮಕ್ಕಳಿಗೆ ತಿಳಿವಳಿಕೆ ಮೂಡಿಸುವುದು ಈ ಪಾರ್ಕ್‌ ಉದ್ದೇಶ. ಮೌಸ್‌ ಬಳಕೆ, ವರ್ಡ್‌ ಪ್ರೊಸೆಸಿಂಗ್‌, ಮಲ್ಟಿ ಮೀಡಿಯಾ, ಇಂಟರ್‌ನೆಟ್‌ ಬಳಕೆಯ ಬಗ್ಗೆ ಕಿಡ್ಸ್‌ ಕೋರ್ಸ್‌ನಲ್ಲಿ ಮಕ್ಕಳಿಗೆ ತಿಳಿಸಿಕೊಡಲಾಗುತ್ತದೆ.

ಈ ವಿಷಯವನ್ನು ಐ.ಟಿ. ಕಿಡ್ಸ್‌ ಪಾರ್ಕ್‌ನ ನಿರ್ದೇಶಕ ಸುರೇಶ್‌ ಕುಮಾರ್‌ ತಿಳಿಸಿದ್ದಾರೆ. ಮಕ್ಕಳ ವಯೋಮಾನಕ್ಕೆ ತಕ್ಕಂತೆ ಗಣಿತ, ವಿಜ್ಞಾನ, ಸಮಾಜ, ಕಲೆ, ಭಾಷೆಗಳ ಬಗ್ಗೆ ಕೂಡ ಇಲ್ಲಿ ಕಲಿಸಲಾಗುವುದು ಎಂದು ಹೇಳಿದ ಸುರೇಶ್‌, ಜೂನಿಯರ್‌ ಡಾಕ್ಟರ್‌, ಜೂನಿಯರ್‌ ಎಂಜಿನಿಯರ್‌, ಜೂನಿಯರ್‌ ಆರ್ಟಿಸ್ಟ್‌ ಮೊದಲಾದ ವಿಭಾಗಗಳ ಕೋರ್ಸ್‌ಗಳೂ ಇಲ್ಲಿವೆ ಎಂದರು.

ಒಟ್ಟು 42 ಸೆಷನ್‌ಗಳಲ್ಲಿ ಮಕ್ಕಳಿಗೆ ತಿಳಿವಳಿಕೆ ಮೂಡಿಸಲಾಗುವುದೆಂದ ಅವರು, ಪ್ರತಿ ಹಂತ ಪೂರೈಸಿದಾಗಲೂ ಮಕ್ಕಳಿಗೆ ಪ್ರತ್ಯೇಕ ಸರ್ಟಿಫಿಕೇಟ್‌ ನೀಡಲಾಗುವುದು ಎಂದು ತಿಳಿಸಿದರು. ಮಕ್ಕಳಿಗೆ ಸೂಕ್ತವಾದ ರೀತಿಯಲ್ಲಿ ಮಾಹಿತಿ ತಂತ್ರಜ್ಞಾನದ ಅರಿವು ಮೂಡಿಸಲೆಂದೇ ಪಠ್ಯ ಸಿದ್ಧಪಡಿಸಲು ಸಂಶೋಧನೆ ಮತ್ತು ಅಭಿವೃದ್ಧಿ ತಂಡ ರಚಿಸಲಾಗಿದೆ ಎಂದೂ ಅವರು ವಿವರಿಸಿದರು.

ಈ ಸಂಶೋಧನಾ ತಂಡದಲ್ಲಿ ಹೆಸರಾಂತ ಶಿಕ್ಷಣ ತಜ್ಞರು, ಮನೋ ವಿಜ್ಞಾನಿಗಳು ಮತ್ತು ಶಿಕ್ಷಕರಿದ್ದಾರೆ. ಬೆಂಗಳೂರಿನಲ್ಲಿ ಐ.ಟಿ. ಕಿಡ್ಸ್‌ ಪಾರ್ಕ್‌ಗೆ ಉತ್ತಮ ಪ್ರತಿಕ್ರಿಯೆ ದೊರೆತಿದೆ. ಕಿಡ್ಸ್‌ ಮಾಹಿತಿ ತಂತ್ರಜ್ಞಾನ ಕೋರ್ಸ್‌ಗೆ ತಗಲುವ ವೆಚ್ಚ 6,200 ರುಪಾಯಿಗಳು.