ತ್ಯಾಗರಾಜನಗರದಲ್ಲಿ ನಾಳೆ- ನಾಡಿದ್ದು ಹಾಲು ಕರೆಯೋ ಸ್ಪರ್ಧೆ !

ಬೆಂಗಳೂರು : ದಿನ ನಿತ್ಯ ಹಾಲು ಕರೆಯೋದು, ಡೈರಿ- ವರ್ತನೆ ಅಂತ ಹಂಚಿ, ಹೊಟ್ಟೆ ಹೊರೆಯೋದು. ಮುಂಜಾನೆ ಹಾಗೂ ಸಂಜೆ ಇದು ತಪ್ಪುವಂತೆಯೇ ಇಲ್ಲ. ಊರಿಗ್ಹೋದರೂ ಹಾಲು ಕರೆಯೋ ಹೊತ್ತಿಗೆ ಸರಿಯಾಗಿ ಹಾಜರಾಗಬೇಕು. ಕೆಲವು ಹಸುಗಳೋ ಕರೆಯೋ ಕೈಗಳು ಬದಲಾದರೆ ಸುತರಾಂ ಹಾಲು ಕೊಡವು. ಈ ದಿನಚರಿಯಲ್ಲೇ ಕಳೆದುಹೊಗಿರುವ ಜನರಿಗೊಂದು ವಿಶೇಷ ಸ್ಪರ್ಧೆ. ಅದು ಯಾವುದೋ ಅಥ್ಲೆಟಿಕ್ಕೋ, ಪ್ರಬಂಧ ಬರೆಯೋದೋ ಅಲ್ಲ. ಹಾಲು ಕರೆಯುವುದೇ !

ವರುಷದ ಅಂಚಿನಲ್ಲಿ ನಿಂತು ಒಂದಿಷ್ಟು ಮಜಾ ಅನುಭವಿಸಿ, ಹೊಸ ವರ್ಷ ಬರಮಾಡಿಕೊಳ್ಳೋ ಉತ್ಸಾಹ ಏನೆಲ್ಲಾ ಆಟಗಳನ್ನು ನಡೆಸುತ್ತಿದೆ. ಶನಿವಾರ (ಡಿ.30) ಹಾಗೂ ಭಾನುವಾರ (ಡಿ.31) ಇಂಥ ಒಂದು ವಿಭಿನ್ನ ಮಜಾ ನಡೆಯಲಿದೆ. ನೋಡಸೇರುವ ಮಂದಿಯಲ್ಲಿ ನೀವೂ ಒಬ್ಬರಾಗಬಹುದು. ಎರಡೂ ದಿನ ಮುಂಜಾನೆ 6.30 ಹಾಗೂ ಸಂಜೆ 5.30ಕ್ಕೆ ರಾಜ್ಯ ಮಟ್ಟದ ಹಾಲು ಕರೆಯುವ ಸ್ಪರ್ಧೆ ನಡೆಯಲಿದೆ; ತ್ಯಾಗರಾಜ ನಗರದ ಹತ್ತಿರದ ನಾಗಸಂದ್ರದ ಮಹಾನಗರ ಪಾಲಿಕೆ ಮೈದಾನದಲ್ಲಿ.

ಬಹುಮಾನದ ಮೊತ್ತ ಕೇಳಿ ಕಣ್ಣ ರೆಪ್ಪೆಗಳು ಒಂದರಿಂದೊಂದು ಇನ್ನಷ್ಟು ದೂರ ಸರಿದಾವು. ಮೊದಲ ಬಹುಮಾನ 20,001 ರುಪಾಯಿ. 2ನೇ ಬಹುಮಾನ 15,001 ರು. 3ನೇ ಬಹುಮಾನ 10,000 ಹಾಗೂ 4ನೇ ಬಹುಮಾನ 5 ಸಾವಿರ ರುಪಾಯಿ ! ನೆಚ್ಚಿದ ಹಸುಗಳು ಹಾಲು ಕರೆಯಲಿ.

(ಇನ್ಫೋ ವಾರ್ತೆ)