ರೈತರ ನೇತೃತ್ವದಲ್ಲಿ ಬಂಡಿ ಯಾತ್ರೆ ಬರುತ್ತಿದೆ... ದಾರಿ ಬಿಡಿ

ಬೆಳಗಾವಿ : ಜನಗಳ ಜಾತ್ರೆಯನ್ನು ಕೇಳಿ ಬಲ್ಲಿರಿ. ಕೆಲವರು ನೋಡಿರಲೂ ಬಹುದು. ಉಳಿದಂತೆ ದನಗಳ ಜಾತ್ರೆಯೂ ಸಂಪ್ರದಾಯ ತಪ್ಪಬಾರದು ಎಂದು ಅಲ್ಲಲ್ಲಿ ನಡೆಯುತ್ತಿವೆ. ಇನ್ನು ಕೆಲವು ಸಂಘಟನೆಗಳು ವಿವಿಧ ರಥಯಾತ್ರೆಗಳನ್ನೂ ನಡೆಸುವುದು ಈಚಿನ ವರ್ಷಗಳಲ್ಲಿ ಮಾಮೂಲು. ಇವೆಲ್ಲಕ್ಕಿಂಥ ಭಿನ್ನವಾಗಿ ರಾಜ್ಯ ರೈತ ಸಂಘ ಹೊಸದೊಂದು ಯಾತ್ರೆ ಆಯೋಜಿಸಿದೆ. ಹೆಸರು ಬಂಡಿ ಯಾತ್ರೆ.

ಸರ್ಕಾರದ ರೈತ ವಿರೋಧಿ ನೀತಿಯನ್ನು ವಿರೋಧಿಸಿ ಬಂಡಿ ಯಾತ್ರೆ ನಡೆಸಲಾಗುತ್ತಿದೆ. ಈ ಸಂದರ್ಭದಲ್ಲಿ ಸರ್ಕಾರದ ಶೋಷಣೆಯ ಕುರಿತು ಜನ ಜಾಗೃತಿ ಮೂಡಿಸಲಾಗುವುದು ಎಂದು ರೈತ ಸಂಘ ಹೇಳಿಕೊಂಡಿದೆ. ಕನ್ಯಾಕುಮಾರಿಯಿಂದ ಪ್ರಾರಂಭವಾಗುವ ಯಾತ್ರೆ ಕೇರಳ, ತಮಿಳುನಾಡು, ಆಂಧ್ರಪ್ರದೇಶ ಮುಂತಾದ ರಾಜ್ಯಗಳ ರಾಜಧಾನಿ ಪಟ್ಟಣಗಳಲ್ಲಿ ಸಂಚರಿಸುವುದು. ಯಾತ್ರೆಯ ಕಾಲಾವಧಿ ಜನವರಿ 26 ರಿಂದ ಫೆಬ್ರವರಿ 19.

ಯಥಾ ಪ್ರಕಾರ ರಾಜ್ಯ ರೈತ ಸಂಘದ ಅಧ್ಯಕ್ಷ ಪ್ರೊ. ನಂಜುಂಡ ಸ್ವಾಮಿ ಮುಖ್ಯಸ್ಥಿಕೆ ವಹಿಸುವರು. ಕಾರ್ಯಾಧ್ಯಕ್ಷ ಸುರೇಶ ಪಾಟೀಲ, ಆರ್‌.ವಿ. ಪೂಜಾರಿ, ಕಲ್ಯಾಣ ರಾವ್‌ ಮುಚಳಂಬಿ ಅವರೊಂದಿಗಿರುವರು.

(ಇನ್ಫೋ ವಾರ್ತೆ)