ಕೊರಟಗೆರೆ ಆಸ್ಪತ್ರೆಗೆ ಜನರೇಟರ್‌: ಆಶ್ವಾಸನೆ

ಕೊರಟಗೆರೆ : ಕಲುಷಿತ ನೀರು ಕುಡಿದು ಕರುಳುಬೇನೆಗೆ ತುತ್ತಾಗಿ ಇಲ್ಲಿನ ಸಮುದಾಯ ಆರೋಗ್ಯ ಕೇಂದ್ರಕ್ಕೆ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿರುವ ರೋಗಿಗಳ ಯೋಗಕ್ಷೇಮ ವಿಚಾರಿಸಿದ ಜಿಲ್ಲಾ ಪಂಚಾಯ್ತಿ ಅಧ್ಯಕ್ಷೆ ಬಿ.ಎಸ್‌. ದಾಕ್ಷಾಯಿಣಿ ಅವರು, ಆಸ್ಪತ್ರೆಯ ಕಾರ್ಯವೈಖರಿಯನ್ನೂ ಪರಿಶೀಲಿಸಿದರು.

ಪಟ್ಟಣದಲ್ಲಿ ಕರುಳುಬೇನೆ ನಿಯಂತ್ರಣಕ್ಕೆ ಕೈಗೊಂಡಿರುವ ಕ್ರಮಗಳೇನು, ಶ್ರೀಸಾಮಾನ್ಯರು ಆಸ್ಪತ್ರೆಗೆ ಬಂದಾಗ ಔಷಧಿ ನೀಡದೆ, ಚೀಟಿ ಬರೆದುಕೊಟ್ಟು ಔಷಧದಂಗಡಿಗಳಿಗೆ ಹೋಗಿ ಎಂದು ಸೂಚಿಸುವುದೇಕೆ, ಔಷಧ ಕೊರತೆಗೆ ಕಾರಣವೇನು ಎಂಬಿತ್ಯಾದಿ ಪ್ರಶ್ನೆಗಳನ್ನು ಕೇಳಿದ ಅಧ್ಯಕ್ಷರು ಜಿಲ್ಲಾ ಪಂಚಾಯತ್‌ ಅಗತ್ಯವಾದ ಔಷಧ ಪೂರೈಸಲು ಸಿದ್ಧ ಎಂದೂ ತಿಳಿಸಿದರು.

ವಿದ್ಯುತ್‌ ಕಡಿತದ ಕಾರಣ ರೋಗಿಗಳಿಗೆ ಹಾಗೂ ಚಿಕಿತ್ಸಾ ವಿಧಾನಕ್ಕೆ ಆಗುವ ತೊಂದರೆ ತಪ್ಪಿಸಲು ಸಮುದಾಯ ಆರೋಗ್ಯ ಕೇಂದ್ರಕ್ಕೆ ಜನರೇಟರ್‌ ನೀಡಲು ವ್ಯವಸ್ಥೆ ಮಾಡಲಾಗುವುದು ಎಂದೂ ಅವರು ಆಶ್ವಾಸನೆ ನೀಡಿದರು. ಪಂಚಾಯತ್‌ ಸದಸ್ಯರಾದ ಎನ್‌. ಸುಕುಮಾರ್‌ ಹಾಗೂ ಕೆ.ವಿ. ಮಲ್ಲಯ್ಯ ಹಾಜರಿದ್ದರು.