ದಿವಂಗತ ಮಾಜಿ ರಾಷ್ಟ್ರಪತಿ ಜೈಲ್‌ಸಿಂಗ್‌ ಅವರ ಮನೆಯಲ್ಲಿ ಡಿ. 1ರಿಂದ ವಿದ್ಯುತ್‌ ಇಲ್ಲ

ನವದೆಹಲಿ : ವಿಐಪಿಗಳಿಗೆ ಎಲ್ಲ ಸೌಲಭ್ಯಗಳೂ ಸಿಗುವುದರಿಂದ ಸಾಮಾನ್ಯ ಜನರ ಕಷ್ಟ ಗೊತ್ತಾಗುವುದಿಲ್ಲ ಅಂತ ನೀವಿನ್ನು ಗೊಣಗುವಂತಿಲ್ಲ. ಏಕೆಂದರೆ ಹೊಸದಿಲ್ಲಿಯ ಮುನ್ಸಿಪಲ್‌ ಕಾನ್ಸಿಲ್‌, ಮಾಜಿ ರಾಷ್ಟ್ರಪತಿ ಗ್ಯಾನಿ ಜೈಲ್‌ಸಿಂಗ್‌ ಅವರ ಮನೆಯ ವಿದ್ಯುತ್‌ ಸರಬರಾಜನ್ನು ಸ್ಥಗಿತಗೊಳಿಸಿ ನಿಮ್ಮ ಊಹೆಯನ್ನು ಸುಳ್ಳು ಮಾಡಿದೆ. ಅಂದ ಹಾಗೆ ವಿದ್ಯುತ್‌ ಕೈಕೊಡುವ ಗೋಳು ಕೇವಲ ನಿಮ್ಮ ಮನೆಗೆ ಸಂಬಂಧಿಸಿದ್ದಲ್ಲ ಎಂಬುದು ಈಗಲಾದರೂ ಗೊತ್ತಾಯಿತೆ?

ಮಾಜಿ ರಾಷ್ಟ್ರಪತಿಗಳ ಮನೆಯಲ್ಲಿ ಕಳೆದ ಡಿಸೆಂಬರ್‌ 1ರಿಂದ ವಿದ್ಯುತ್‌ ಸರಬರಾಜು ಇಲ್ಲ. ಈ ಕುರಿತು ದಿವಂಗತ ಮಾಜಿ ರಾಷ್ಟ್ರಪತಿ ಜೈಲ್‌ಸಿಂಗ್‌ ಅವರ ವಿಧವಾ ಪತ್ನಿ ನೀಡಿರುವ ದೂರು ಲೋಕಸಭೆಯಲ್ಲಿ ಪ್ರತಿಧ್ವನಿಸಿದೆ. ಶೂನ್ಯ ವೇಳೆಯಲ್ಲಿ ವಿಷಯ ಪ್ರಸ್ತಾಪಿಸಿದ ಬಿಎಸ್‌ಪಿಯ ರಷೀದ್‌ ಆಲ್ವಿ, ಮಾಜಿ ರಾಷ್ಟ್ರಪತಿಗಳ ಮನೆಯಲ್ಲಿ ವಿದ್ಯುತ್‌ ಇಲ್ಲದ ಬಗ್ಗೆ ಆಘಾತ ವ್ಯಕ್ತಪಡಿಸಿದರಲ್ಲದೆ ಗೃಹ ಸಚಿವರಿಗೆ ದೂರು ನೀಡಿರುವುದಾಗಿಯೂ ತಿಳಿಸಿದ್ದಾರೆ. ದೂರು ಈವರೆಗೆ ತಮ್ಮ ಗಮನಕ್ಕೆ ಬಂದಿಲ್ಲ ಆದರೂ ಪರಿಶೀಲಿಸುವುದಾಗಿ ಗೃಹ ಸಚಿವರು ಭರವಸೆ ನೀಡಿದ್ದಾರೆ.