ನಾಡು ನುಡಿ ಪ್ರಗತಿಗೆ ನೀವೂ ಕೈ ಜೋಡಿಸಿ

ಮೈಸೂರು : ಕನ್ನಡ ಸಾಹಿತ್ಯ ಹಾಗೂ ಸಾಂಸ್ಕೃತಿಕ ವಾತಾವರಣವನ್ನು ಬೆಳೆಸುವ ಕೆಲಸವನ್ನು ಸರ್ಕಾರವೇ ಮಾಡಲಿ ಎಂದು ಸುಮ್ಮನಾಗುವ ಬದಲು ಕನ್ನಡ ಕೆಲಸಕ್ಕೆ ಜನರೇ ಮುಂದಾಗಬೇಕು ಎಂದು ಕನ್ನಡ ಮತ್ತು ಸಂಸ್ಕೃತಿ ಖಾತೆ ಸಚಿವೆ ರಾಣಿ ಸತೀಶ್‌ ಅಭಿಪ್ರಾಯ ಪಟ್ಟಿದ್ದಾರೆ.

ನಾಡು ನುಡಿಯ ಬೆಳವಣಿಗೆಗಾಗಿ ತಾಲ್ಲೂಕಿಗೊಂದು ಕನ್ನಡ ಭವನವನ್ನು ನಿರ್ಮಿಸುವ ಅಗತ್ಯವಿದೆ. ಇದರಿಂದಾಗಿ ತಾಲ್ಲೂಕು ಮಟ್ಟದಲ್ಲಿ ಸಾಹಿತ್ಯ ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಅವಕಾಶ ಮಾಡಿಕೊಟ್ಟಂತಾಗುತ್ತದೆ. ಕನ್ನಡ ಭವನಗಳ ನಿರ್ಮಾಣಕ್ಕೆ ಪ್ರತಿಯಾಬ್ಬರೂ ಮುಂದಾಗಬೇಕು. ಕನ್ನಡ ಭವನಗಳು ಜನ ಭವನಗಳಾಗಬೇಕು ಎಂದು ರಾಣಿ ಸತೀಶ್‌ ಹೇಳಿದರು. ಭಾನುವಾರ, ಜಿಲ್ಲಾ ಕಸಾಪದ ಸಾಹಿತ್ಯ ಭವನದ ಕಾರ್ಯಾಲಯ, ಮಿನಿ ಸಭಾಂಗಣ, ಬರಹಗಾರರ ವಸತಿ ಗೃಹ ಹಾಗೂ ನೀರಿನ ಟ್ಯಾಂಕ್‌ ಉದ್ಘಾಟನಾ ಸಮಾರಂಭದಲ್ಲಿ ಅವರು ಮಾತನಾಡುತ್ತಿದ್ದರು.

ಉದ್ಘಾಟನಾ ಭಾಷಣ ಮಾಡಿದ ಶಿಕ್ಷಣ ಸಚಿವ ಎಚ್‌. ವಿಶ್ವನಾಥ್‌ ಅವರು, ಸಾಹಿತ್ಯಿಕವಾಗಿ ಮಾತ್ರವಲ್ಲದೆ ಸಾಮಾಜಿಕ ಹಾಗೂ ಶೈಕ್ಷಣಿಕ ಪ್ರಗತಿಗೂ ಕನ್ನಡಭವನಗಳ ನಿರ್ಮಾಣ ಅಗತ್ಯ ಎಂದರು. ಹಣಕಾಸು ಖಾತೆ ರಾಜ್ಯ ಸಚಿವ ಎಂ. ಶಿವಣ್ಣ , ಹಿರಿಯ ಸಾಹಿತಿ ದೇ.ಜವರೇಗೌಡ, ಶಾಸಕರಾದ ಎಚ್‌.ಎಸ್‌. ಶಂಕರಲಿಂಗೇಗೌಡ ಹಾಗೂ ಎ.ಎಸ್‌. ಗುರುಸ್ವಾಮಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

(ಇನ್ಫೋ ವಾರ್ತೆ)