ಬೋ-ಡೊ ಮೂಲವಾಸಿ ಬಂಧನ : 35 ಲಕ್ಷ ರು. ಕದ್ದ ಮಾಲು ವಶ

ಬೆಂಗಳೂರು : ಪಶ್ಚಿಮ ಬಂಗಾಳದ ಜಲಪಾಯ್‌ಗುರಿ ಜಿಲ್ಲೆಯ ಜೋಥಪುಕಾರಿಯ ಗ್ರಾಮದ ಬೋ-ಡೊ ಮೂಲವಾಸಿಯಾಬ್ಬನನ್ನು ಬೆಂಗಳೂರು ಪೊಲೀಸರ ವಿಶೇಷ ತಂಡ ಬಂಧಿಸಿದ್ದು, ಆತನಿಂದ 35 ಲಕ್ಷ ರುಪಾಯಿ ಮೌಲ್ಯದ ಕಳವು ವಸ್ತುಗಳನ್ನು ವಶಪಡಿಸಿಕೊಂಡಿದೆ.

ಅಂತರರಾಷ್ಟ್ರೀಯ ಕಾರ್ಗೋ ಕಂಪನಿಯ ಕಾರ್ಯ ನಿರ್ವಾಹಕ ನಿರ್ದೇಶಕ ಪಿ.ರಾಮನಾಥನ್‌ ಅವರ ಸಂಜಯ್‌ ನಗರದ ಮನೆಯಿಂದ ವಜ್ರದುಂಗುರ, ಚಿನ್ನಾಭರಣ ಹಾಗೂ ಇಲೆಕ್ಟ್ರಾನಿಕ್‌ ಉಪಕರಣಗಳನ್ನು ಕದ್ದಿದ್ದ ಆಶಿಶ್‌ ಕುಮಾರ್‌ ಎಂಬುವನೇ ಆರೋಪಿ. ಆತನ ಗ್ರಾಮದಲ್ಲಿನ ಆದಿವಾಸಿಗಳು ಬಿಲ್ಲು ಬಾಣ ಹಿಡಿದು ಅಡ್ಡಗಟ್ಟಿದರೂ, ಬೆಂಗಳೂರು ಪೊಲೀಸರು ಸ್ಥಳೀಯ ಪೊಲೀಸರ ನೆರವಿನಿಂದ ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಕದ್ದ ಎಲ್ಲಾ ಮಾಲನ್ನೂ ವಶಪಡಿಸಿಕೊಳ್ಳಲಾಗಿದೆ.

ಸೆಕ್ಯೂರಿಟಿ ಗಾರ್ಡ್‌ ಆಗಿದ್ದ ಆಶಿಶ್‌, ಮನೆಯಲ್ಲಿ ಯಾರೂ ಇಲ್ಲದ ಸಮಯ ನೋಡಿಕೊಂಡು ಕಳವು ಮಾಡಿದ್ದ. ಮೊದಲು ಆತನನ್ನು ಜಲ್‌ಪಾಯ್‌ಗುರಿ ಮ್ಯಾಜಿಸ್ಟ್ರೇಟ್‌ ಮುಂದೆ ಹಾಜರು ಪಡಿಸಿ, ನಂತರ ಬೆಂಗಳೂರಿಗೆ ಕರೆ ತರಲಾಯಿತು. ಕದ್ದ ಮಾಲನ್ನು ಲಾರಿಯಲ್ಲಿ ಚೆನ್ನೈ ಮೂಲಕ ತನ್ನೂರಿಗೆ ಸಾಗಿಸುವ ಮುನ್ನ ಕೋಲಾರದ ತನ್ನ ಗೆಳೆಯನನ್ನು ಭೇಟಿ ಮಾಡಿದ್ದಾಗಿ ವಿಚಾರಣೆ ಸಮಯದಲ್ಲಿ ಆಶಿಶ್‌ ಹೇಳಿದ್ದಾನೆ.

(ಯುಎನ್‌ಐ)