ಎಟಿಪಿ ಟೆನಿಸ್‌ ಟೂರ್ನಿ : ಪೇಸ್‌ - ಭೂಪತಿ ಜೋಡಿಗೆ ಸೋಲು

ಬೆಂಗಳೂರು : ಭಾರತದ ಟೆನಿಸ್‌ ಜೋಡಿ ಲಿಯಾಂಡರ್‌ ಪೇಸ್‌ ಹಾಗೂ ಮಹೇಶ್‌ ಭೂಪತಿ ಇಲ್ಲಿ ಭಾನುವಾರ ಮುಕ್ತಾಯಗೊಂಡ ಎಟಿಪಿ ವಿಶ್ವ ಡಬಲ್ಸ್‌ ಟೆನಿಸ್‌ ಚಾಂಪಿಯನ್‌ಷಿಪ್‌ನ ಫೈನಲ್‌ ಸೆಣಸಿನಲ್ಲಿ ಅಮೆರಿಕದ ಡೊನಾಲ್ದ್‌ ಜಾನ್ಸನ್‌ ಹಾಗೂ ದಕ್ಷಿಣ ಆಫ್ರಿಕಾದ ಪಿಯಟ್‌ ನಾರ್ವೆಲ್‌ ವಿರುದ್ಧ ಸೋಲನುಭವಿಸಿ ಅಪಾರ ಸಂಖ್ಯೆಯಲ್ಲಿ ನೆರೆದಿದ್ದ ಪ್ರೇಕ್ಷಕರಿಗೆ ನಿರಾಶೆಯನ್ನುಂಟು ಮಾಡಿದರು.

ಶನಿವಾರ ನಡೆದ ಪಂದ್ಯದಲ್ಲಿ ಅಪ್ರತಿಮ ಶೌರ್ಯ ಮೆರೆದು ಫೈನಲ್‌ ತಲುಪಿದ್ದ ಈ ಜೋಡಿ ಭಾರತಕ್ಕೆ 750,000 ಡಾಲರ್‌ ಮೊತ್ತದ ಗೋಲ್ಡ್‌ ಫ್ಲೇಕ್‌ ಎಟಿಪಿ ವಿಶ್ವ ಡಬಲ್ಸ್‌ ಪ್ರಶಸ್ತಿ ತಂದು ಕೊಡಲಿದೆ ಎಂಬ ನಿರೀಕ್ಷೆ ಹುಸಿಯಾಯಿತು.

ಇಲ್ಲಿನ ಕಬ್ಬನ್‌ ತೋಟದ ಕೆಎಸ್‌ಎಲ್‌ಟಿಎ ಕ್ರೀಡಾಂಗಣದಲ್ಲಿ ನಡೆದ ಫೈನಲ್ಸ್‌ ಪಂದ್ಯದಲ್ಲಿ ಜಾನ್ಸನ್‌ ಹಾಗೂ ನಾರ್ವೆಲ್‌ ಜೋಡಿ ಭಾರತದ ಭೂಪತಿ ಹಾಗೂ ಪೇಸ್‌ ಜೋಡಿಯನ್ನು 7-6 (10 -8), 6-3, 6-4ರಲ್ಲಿ ಸೋಲಿಸಿ ವೀರೋಚಿತವಾಗಿ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತು.

ಸುಮಾರು 2ಗಂಟೆ 18 ನಿಮಿಷಗಳಿಗೂ ಹೆಚ್ಚು ಕಾಲ ನಡೆದ ಪಂದ್ಯ ವೀಕ್ಷಕರನ್ನು ತುದಿಗಾಲಿನಲ್ಲಿ ನಿಲ್ಲಿಸಿತ್ತು. ಈ ಸೋಲಿನೊಂದಿಗೆ ಭಾರತದ ಪ್ರಶಸ್ತಿಯ ಕನಸು ನುಚ್ಚು ನೂರಾಯಿತು. 1997, 1999ರಲ್ಲಿ ಕೂಡ ಭಾರತೀಯ ಟೆನಿಸ್‌ ಪಟುಗಳು ಫೈನಲ್ಸ್‌ ತಲುಪಿಯೂ ಪ್ರಶಸ್ತಿ ಗೆಲ್ಲುವಲ್ಲಿ ವಿಫಲರಾಗಿದ್ದರು.