ಚಳಿಗೆ ಸೆಡ್ಡು ಹೊಡೆದ ಹೆಂಗಳೆಯರು

ನೆನ್ನೆ ಸಂಜೆಯವರೆಗೂ ಚಳಿ.. ತಾ ಕಂಬಳಿ ಎಂದು ಮುಸುಕು ಎಳೆಯುತ್ತಿದ್ದ ಹೆಣ್ಣು , ಚಳಿ.. ನಿನ್ನಾಟ ನಡೆಯಾಲ್ಲ ನಂ ಬಳಿ ಎಂದು ಶನಿವಾರ ಮುಂಜಾವು ಚಳಿಯನ್ನು ಲೆಕ್ಕಕ್ಕಿಡಲಿಲ್ಲ . ಮನೆ ಮಕ್ಕಳೆಲ್ಲ ದುಪ್ಪಟಿಯಲ್ಲಿ ಮೈ ಹಿಡಿಯಾಗಿಸಿ ಮುದುಡಿಕೊಂಡಿದ್ದರೆ ಮನೆಯಾಕೆ ನಸುಕಿಗೇ ಮಿಂದು ಪೂಜಾಕಾರ್ಯದಲ್ಲಿ ಮಗ್ನ. ದೇಗುಲಗಳ ತುಂಬಾ ಹೆಂಗಳೆಯರ ಹಿಂಡು.

ಚಳಿಗಾಲದ ಮುಂಜಾವಿನ ಸೊಗಸೇ ಬೇರೆ. ದಪ್ಪ ಹೊದ್ದಿಕೆಯಾಳಗೆ ಮರೆಸಿಕೊಳ್ಳುವ ದೇಹಕ್ಕೆ ಬೆಳಗಾಗುವುದೂ ಬೇಡ, ಏಳುವುದೂ ಬೇಡ . ಆದರೆ, ಪೂಜೆ ಪುನಸ್ಕಾರದ ಎದುರು ಯಾವ ಚಳಿ ನಿಂತೀತು. ಧನುರ್ಮಾಸಕ್ಕೆ ಶನಿವಾರದಿಂದ ಚಾಲನೆ ದೊರೆತಿದೆ. ಹಿಂದೂ ನಂಬಿಕೆಗಳ ಪ್ರಕಾರ, ಧನುರ್ಮಾಸ ಕಾಲದ ಮುಂಜಾವಿನ ಪೂಜೆ ದೇವರ ಕರೆಯುವ ಅಮೃತ ಗಳಿಗೆ. ಆ ಅಪರೂಪದ ಮುಹೂರ್ತದ ಸಂದರ್ಭದಲ್ಲಿ ಮನೆ ಮಂದಿಗೆಲ್ಲ ಒಳ್ಳಿತಾಗಲಿ ಎಂದು ಸದಾ ಹಾರೈಸುವ ಹೆಣ್ಣು ಯಾವ ಚಳಿ ತನ್ನ ಆಟ ಕಟ್ಟಲು ಅವಕಾಶ ಮಾಡಿಕೊಟ್ಟಾಳು. ಒಟ್ಟಿನಲ್ಲಿ ಹಳ್ಳಿ- ಪಟ್ಟಣ ಬೇಧವಿಲ್ಲದೆ ಬಹುತೇಕ ಹೆಂಗಳೆಯರು ಚಳಿಗೆ ಸೆಡ್ಡು ಹೊಡೆದು ನಿಂತಿದ್ದಾರೆ.

ಧನುರ್ಮಾಸ ಹೊಸ್ತಿಲ ದಾಟುವ ಹೊತ್ತಿನಲ್ಲಿ ಒಣಹವೆ ರಾಜ್ಯದ್ಯಾಂತ ಮುಂದುವರಿದಿದೆ ಎಂದು ಹವಾಮಾನ ಇಲಾಖೆಯ ವರದಿ ತಿಳಿಸಿದೆ. ಉಷ್ಣಾಂಶದಲ್ಲಿ ಏರಿಕೆಯಾಗುವ ನಿರೀಕ್ಷೆಗಳಿಲ್ಲ . ಬೆಂಗಳೂರಿನಲ್ಲಿ ಭಾನುವಾರದ ರಜೆಗೆ ಅನುಕೂಲವಾಗುವಂತೆ ಶುಭ್ರಆಕಾಶವಿರುತ್ತದೆ. ಕನಿಷ್ಠ ತಾಪಮಾನ 14 ಡಿಗ್ರಿ ಸೆಲ್ಷಿಯಸ್‌ ಆಸುಪಾಸಿನಲ್ಲಿರುತ್ತದೆ.