ಗುಲ್ಬರ್ಗಾದಲ್ಲಿ ಮತ್ತೆ 9 ಡಿಗ್ರಿ ಸೆಲ್ಸಿಯಸ್
ಬೆಂಗಳೂರು : ಮತ್ತೆ ಗುಲ್ಬರ್ಗಾದ ಕನಿಷ್ಠ ತಾಪಮಾನ 9 ಡಿಗ್ರಿ ಸೆಲ್ಸಿಯಸ್ಗೆ ಕುಸಿದಿದೆ. ಬೆಂಗಳೂರಿನಲ್ಲಿ ಕನಿಷ್ಠ ತಾಪಮಾನ 13 ಡಿಗ್ರಿಯಲ್ಲೇ ನಿಂತಿದೆ. ರಾಜ್ಯದ ಮೇಲೆ ಉತ್ತರ ಭಾರತದಿಂದ ಬೀಸುತ್ತಿರುವ ಶೀತ ಮಾರುತ ತನ್ನ ಕಾಯಕ ಮುಂದುವರಿಸಿದೆ.
ಬೆಂಗಳೂರಿನಲ್ಲಿ ಮಧ್ಯಾಹ್ನ ಬಿಸಿಲು ಹದವಾಗಿದ್ದರೂ ಕೂಡ ಬೀಸುತ್ತಿರುವ ಶೀತಗಾಳಿ ಚಳಿಯನ್ನು ಹೆಚ್ಚಿಸಿದೆ. ಈ ಬಾರಿಯಂತೂ ಅದೇನು ಚಳಿಯಪ್ಪ ಎನ್ನುವ ಮಾತು ಸಾಮಾನ್ಯವಾಗಿದೆ. ಈ ಮಧ್ಯೆ ರಾಜ್ಯಾದ್ಯಂತ ಒಣಹವೆ ಮುಂದುವರಿದಿದೆ. ಕನಿಷ್ಠ ತಾಪಮಾನ ರಾಜ್ಯದ ಬಹುತೇಕ ಕಡೆ ಕುಸಿದಿದೆ. ಕರಾವಳಿ ಹಾಗೂ ಉತ್ತರ ಒಳನಾಡಿನಲ್ಲಿಯೂ ತಾಪಮಾನದಲ್ಲಿ ಇಳಿಕೆ ಕಂಡುಬಂದಿದೆ. ಆದರೆ, ದಕ್ಷಿಣ ಒಳನಾಡಿನ ಕೆಲವೆಡೆ ತಾಪಮಾನ ಸಾಮಾನ್ಯಮಟ್ಟದಲ್ಲಿತ್ತು.
ಮುನ್ಸೂಚನೆಯಂತೆ ರಾಜ್ಯದಲ್ಲಿ ಒಣಹವೆ ಇರಲಿದ್ದು, ಉಳಿದಂತೆ ವಿಶೇಷ ಬದಲಾವಣೆಗಳೇನೂ ಕಂಡುಬಂದಿಲ್ಲ ಎನ್ನುತ್ತದೆ ಹವಾಮಾನ ವೀಕ್ಷಣಾಲಯದ ವರದಿ. ಸ್ಥಳೀಯ ಹವಾಮಾನ ಮುನ್ಸೂಚನೆಯ ಪ್ರಕಾರ ಬೆಂಗಳೂರು ಹಾಗೂ ಸುತ್ತಮುತ್ತಲ ಪ್ರದೇಶಗಳಲ್ಲಿ ಶುಭ್ರ ಆಕಾಶ ಇರಲಿದ್ದು, ಬೆಳಗಿನ ಜಾವದಲ್ಲಿ ಮಂಜು ಸುರಿಯುತ್ತದೆ. ಕನಿಷ್ಠ ತಾಪಮಾನ ಮತ್ತೆ 13 ಡಿಗ್ರಿಯಲ್ಲೇ ತಟಸ್ಥವಾಗಿ ನಿಲ್ಲಲಿದೆ.