ಕದ ಮುಚ್ಚಿದ ಚರ್ನೋಬಿಲ್‌ : ದುರಂತ ಅಧ್ಯಾಯಕ್ಕೊಂದು ಕೊನೆ

ಕೀವ್‌ : ಉಕ್ರೇನಿನಲ್ಲಿರುವ ಜಗತ್ತಿನ ಶಕ್ತಿಯುತ ನ್ಯೂಕ್ಲಿಯರ್‌ ಶಕ್ತಿ ಕೇಂದ್ರಕ್ಕಿನ್ನು ಬೀಗಮುದ್ರೆ. ಕೇಂದ್ರವನ್ನು ಶುಕ್ರವಾರದಿಂದ ಮುಚ್ಚಲಾಗುವುದು ಎಂದು ಶಕ್ತಿ ಕೇಂದ್ರದ ಪ್ರಕಟಣೆ ತಿಳಿಸಿದೆ.

ಶುಕ್ರವಾರದಂದು ಶಕ್ತಿ ಕೇಂದ್ರದ ಇಂಜಿನಿಯರ್‌ಗಳು ರ್ಯಾಪಿಡ್‌ ಎಮರ್ಜೆನ್ಸಿ ಡಿಫೆನ್ಸ್‌ ಬಟನ್‌ ಒತ್ತುವ ಮೂಲಕ ರಿಯಾಕ್ಟರಿನ ಕೆಲಸವನ್ನು ಸ್ಥಗಿತಗೊಳಿಸಲಾರಂಭಿಸುವರು. ಬಟನ್‌ ಒತ್ತಿದ ಕ್ಷಣದಿಂದ ಕೆಲಸ ನಿರ್ವಹಿಸುತ್ತಿರುವ ರಿಯಾಕ್ಟರಿನೊಳಗೆ ಕಂಟ್ರೋಲ್‌ ರಾಡ್‌ಗಳನ್ನು ನಿಧಾನವಾಗಿ ಇಳಿಯಲಾರಂಭಿಸಿ ನ್ಯೂಕ್ಲಿಯರ್‌ ವಿಭಜನೆಯನ್ನು ತಡೆಯುತ್ತವೆ. ಈ ಮೂಲಕ ಜಗತ್ತಿನ ಅತ್ಯಂತ ಭೀಕರ ಅಪಘಾತಕ್ಕೆ ಕಾರಣವಾದ ಶಕ್ತಿ ಕೇಂದ್ರ ಅಂತ್ಯ ಕಾಣುತ್ತದೆ.

1986ರಲ್ಲಿ ನಡೆದ ದುರಂತದಲ್ಲಿ 30 ಮಂದಿ ಸುಟ್ಟು ಹೋಗಿದ್ದು , ಚರ್ನೋಬಿಲ್‌ ಪ್ರದೇಶದಿಂದ 30 ಕಿಲೋ ಮೀಟರ್‌ ಆಸು ಪಾಸಿನಲ್ಲಿ ವಿಷ ತುಂಬಿಕೊಂಡಿತ್ತು. ಶತಮಾನಗಳ ಕಾಲ ಈ ಪ್ರದೇಶ ವಾಸಯೋಗ್ಯವಾಗಿರುವುದಿಲ್ಲ ಎಂದು ವಿಜ್ಞಾನಿಗಳು ಹೇಳಿದ್ದರು. ರಿಯಾಕ್ಟರಿನ ಒಂದು ಮತ್ತು ಎರಡನೇ ಘಟಕಗಳನ್ನು ಈಗಾಗಲೇ ಮುಚ್ಚಲಾಗಿದೆ.

ಕೊನೆಯ ರಿಯಾಕ್ಟರನ್ನು ಮುಚ್ಚುವಾಗ ನಡೆಯುವ ಸಮಾರಂಭಕ್ಕೆ ಶಕ್ತಿ ಕೇಂದ್ರದಲ್ಲಿ ಕೆಲಸ ಮಾಡುತ್ತಿರುವ ಕೆಲಸಗಾರರು ಹಾಜರಾಗುವುದಿಲ್ಲ ಎಂದಿದ್ದಾರೆ. ರಿಯಾಕ್ಟರನ್ನು ಮುಚ್ಚುವುದರಿಂದ ಆರು ಸಾವಿರ ನೌಕರರು ಕೆಲಸ ಕಳೆದುಕೊಳ್ಳುತ್ತಾರೆ. ಈ ಸಮಾರಂಭವನ್ನು ಅಲ್ಲಿನ ರೇಡಿಯೋ ನೇರ ಪ್ರಸಾರ ಮಾಡಲಿದೆ.

(ಇನ್ಫೋ ವಾರ್ತೆ)