ರೇಸಿನಿಂದ ಹಿಂದೆ ಸರಿದ ಅಲ್‌ಗೋರ್‌, 43ನೇ ಅಧ್ಯಕ್ಷರಾಗಿ ಬುಷ್‌

ವಾಷಿಂಗ್ಟನ್‌ : ಅಮೆರಿಕಾದ ಅಧ್ಯಕ್ಷೀಯ ಚುನಾವಣೆ ರೇಸಿನ ಕಣದಿಂದ ಡೆಮಾಕ್ರೆಟಿಕ್‌ ಪಕ್ಷದ ಅಲ್‌ಗೋರ್‌ ಹಿಂದೆ ಸರಿದಿದ್ದು, ರಿಪಬ್ಲಿಕನ್‌ ಪಕ್ಷದ ಜಾರ್ಜ್‌ ಡಬ್ಲ್ಯೂ ಬುಷ್‌ ಅಮೆರಿಕಾದ 43 ನೇ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ.

ಬುಷ್‌ ಅವರಿಂದ, ಕಡಿಮೆ ಅಂತರದ ಮತಗಳಿಂದ ಸೋತಿರುವ ಅಲ್‌ ಗೋರ್‌ ಅಮೆರಿಕಾದ ಉಪಾಧ್ಯಕ್ಷರಾಗಿದ್ದಾರೆ. ಬುಧವಾರ ರಾತ್ರಿ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದ ಅಲ್‌ ಗೋರ್‌, ಕೆಲವೇ ಕ್ಷಣಗಳ ಹಿಂದೆ ತಾವು ಅಮೆರಿಕಾದ ಅಧ್ಯಕ್ಷ ಬುಷ್‌ ಅವರಿಗೆ ಅಭಿನಂದನೆ ತಿಳಿಸಿರುವುದಾಗಿ ಹೇಳಿದರು. ರಾಷ್ಟ್ರಾಧ್ಯಕ್ಷರಾಗಿ ಆಯ್ಕೆಯಾಗಿರುವ ಜಾರ್ಜ್‌ ಬುಷ್‌ ಟೆಕ್ಸಾಸ್‌ ಲೆಜಿಸ್ಲೇಚರ್‌ನ ಡೆಮಾಕ್ರೆಟಿಕ್‌ ಕಂಟ್ರೋಲ್ಡ್‌ ಹೌಸ್‌ ಚೇಂಬರ್‌ನಿಂದ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಲಿದ್ದಾರೆ ಎಂದು ಅಲ್ಲಿನ ಪ್ರಕಟಣೆ ತಿಳಿಸಿದೆ.

ಅಲ್‌ಗೋರ್‌ ಅವರು ಔಪಚಾರಿಕವಾಗಿ ಬುಷ್‌ ಅವರನ್ನು ಅಭಿನಂದಿಸಿರುವುದರಿಂದ ಕಳೆದ ಐದು ವಾರಗಳ ಕಾಲ ಅಮೆರಿಕಾದಲ್ಲಿ ನಡೆದ ಕಾನೂನು ಸಮರಕ್ಕೆ ತೆರೆ ಬಿದ್ದಿದೆ. ಬುಷ್‌ ಅವರ ಮುನ್ನಡೆಯನ್ನೇ ಖಚಿತ ಪಡಿಸಿದ ಅಲ್ಲಿನ ಸರ್ವೋಚ್ಛ ನ್ಯಾಯಾಲಯ, ಮತಗಳ ಮರು ಕೈ ಎಣಿಕೆಯನ್ನು ನಿರಾಕರಿಸಿತ್ತು. ಇದಾದ 24 ಗಂಟೆಗಳ ನಂತರ ಅಲ್‌ಗೋರ್‌ ಅವರು ತಾವು ರೇಸಿನಿಂದ ಹಿಂದೆ ಸರಿದಿರುವುದಾಗಿ ಘೋಷಿಸಿದ್ದಾರೆ.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...