ಒಂದೇ ಸೂರಿನಡಿ ಬೂಟು ಬಟ್ಟೆ , ಇದು ಪುರುಷರ ಲೋಕ!
ಬೆಂಗಳೂರು : ಎಲ್ಲಾ ಷಾಪಿಂಗ್ ಹೌಸ್ಗಳಲ್ಲೂ ಮಹಿಳೆಯರ ಅಧಿಕ್ಯವನ್ನೇ ಕಂಡು ಬೇಸತ್ತವರಿಗೆ ಈ ಸುದ್ದಿ ವಿಶೇಷವಾದದ್ದು. ಪುರುಷರಿಗೆ ಮಾತ್ರ ಸೀಮಿತವಾದ, ವಿಶೇಷ ಅನ್ನಬಹುದಾದ ಷಾಪಿಂಗ್ ಹೌಸ್ ಕೆಂಪರರ್ ಇದೀಗ ನಗರದಲ್ಲಿ ಕದ ತೆರೆದಿದೆ.
ವಿಮಾನನಿಲ್ದಾಣ ರಸ್ತೆಯಲ್ಲಿರುವ ರೆಡ್ಫೋರ್ಟ್ನ ಎರಡನೇ ಮಳಿಗೆಯಲ್ಲಿ ಕೆಂಪರರ್ ಬುಧವಾರದಿಂದ ಕಾರ್ಯಪ್ರವೃತ್ತವಾಗಿದೆ. ಸುಮಾರು 50 ಸಾವಿರ ಚದರ ಅಡಿ ವ್ಯಾಪ್ತಿಯ ಅಂಗಳದಲ್ಲಿ ಪುರುಷರಿಗೆ ಬೇಕಾದ ಅಂಗಿ, ಷರಾಯಿ, ಕೊರಳಪಟ್ಟಿಯಿಂದ ಹಿಡಿದು ಬೂಟು, ಕ್ಷೌರದ ಸಾಬೂನು, ಸುಗಂಧದ ಸೀಸೆವರೆಗೆ ಎಲ್ಲವೂ ಲಭ್ಯ. ಈ ವಿನೂತನ ಮಾದರಿ ಅಂಗಡಿಯ ಪಾಲುದಾರ ರವಿ ವಿ. ಮೇಲ್ವಾನಿ ಅವರು ಹೇಳುವಂತೆ, ಇಷ್ಟೊಂದು ದೊಡ್ಡ ಚಿಲ್ಲರೆ ಮಾರಾಟ ಮಳಿಗೆ ದೇಶದಲ್ಲಿ ಮತ್ತೊಂದಿಲ್ಲ .
ಪುರುಷರು ಬಳಸುವ ಎಲ್ಲಾ ವಸ್ತುಗಳನ್ನು ಒಂದೇ ಸೂರಿನಡಿ ತರುವುದು ಕೆಂಪರರ್ನ ಗುರಿ. ಆದರೆ, ನಾವು ಯಾವುದೇ ಕಾರಣಕ್ಕೂ ಗುಣಮಟ್ಟದೊಂದಿಗೆ ರಾಜಿ ಮಾಡಿಕೊಳ್ಳುವುದಿಲ್ಲ ಅನ್ನುತ್ತಾರೆ ಮೇಲ್ವಾನಿ. ಗ್ರಾಹಕರನ್ನು ಸೆಳೆಯುವ ಉದ್ದೇಶದಿಂದ ಮಳಿಗೆಯಲ್ಲಿ ಕ್ಯಾಂಟಿನ್ ಹಾಗೂ ಇ-ಮೇಲ್, ಫ್ಯಾಕ್ಸ್ ಸೌಲಭ್ಯವನ್ನೂ ಕಲ್ಪಿಸಲಾಗಿದೆ.
(ಇನ್ಫೋ ವಾರ್ತೆ)