ವಿಶ್ವ ಎಟಿಪಿ ಡಬಲ್ಸ್ : ಪೇಸ್- ಭೂಪತಿ ಜಯಾರಂಭ
ಬೆಂಗಳೂರು : ಕೆಲ ಕಾಲದ ಮುನಿಸಿನಿಂದ ಹೊರ ಬಂದು ಮತ್ತೆ ಒಗ್ಗೂಡಿ ಆಡುತ್ತಿರುವ ಲಿಯಾಂಡರ್ ಪೇಸ್- ಭೂಪತಿ ಜೋಡಿ ಬುಧವಾರ ಶುರುವಾದ ಗೋಲ್ಡ್ಫ್ಲೇಕ್ ವಿಶ್ವ ಎಟಿಪಿ ಡಬಲ್ಸ್ ಟೆನಿಸ್ ಟೂರ್ನಿಯಲ್ಲಿ ಶುಭಾರಂಭ ಮಾಡಿದೆ.
ಹಾಲೆಂಡ್ನ ಹಾರ್ಹುಯಿಸ್ ಮತ್ತು ಆಸ್ಟ್ರೇಲಿಯಾದ ಸ್ಯಾಂಡನ್ ಸ್ಟೋನ್ ವಿರುದ್ಧ 7-5, 6-4 ಸೆಟ್ಟುಗಳಲ್ಲಿ ಪೇಸ್- ಭೂಪತಿ ಜೋಡಿ ಟೂರ್ನಿಯ ತನ್ನ ಮೊದಲ ಜಯ ದಾಖಲಿಸಿತು. ಕ್ಲಿಷ್ಟವಾಗಿದ್ದ ಈ ರೌಂಡ್ ರಾಬಿನ್ ಲೀಗ್ ಪಂದ್ಯದಲ್ಲಿ ಭಾರತದ ಯಶಸ್ವಿ ಜೋಡಿ ಕೆಲವು ಪ್ರಮಾದಗಳನ್ನು ಎಸಗಿದರೂ, ಅವನ್ನು ಬೇಗ ತಿದ್ದಿಕೊಂಡು ಜಯ ಸಾಧಿಸಿತು. ಕೊರೆವ ಚಳಿಯಲ್ಲಿ ನಡೆದ ಪಂದ್ಯದಲ್ಲಿ ಭಾರತ ಗೆಲ್ಲಲು 1 ತಾಸು 25 ನಿಮಿಷ ತೆಗೆದುಕೊಂಡಿತು.
ಕಬ್ಬನ್ ಪಾರ್ಕ್ನಲ್ಲಿ ನವ ವಧುವಿನಂತೆ ಅಲಂಕೃತವಾಗಿರುವ ಕೆಎಸ್ಎಲ್ಟಿಎ ಅಂಕಣದಲ್ಲಿ ನೆರೆದಿದ್ದ ನಗರದ ಹಾಗೂ ದೇಶ- ವಿದೇಶಗಳ ಟೆನಿಸ್ ಅಭಿಮಾನಿಗಳಿಗೆ ರಸದೌತಣ. ಭಾರತದ ಜೋಡಿ ಗೆದ್ದ ಪಂದ್ಯಕ್ಕೆ ಮುನ್ನ ನಡೆದ ಇನ್ನೊಂದು ಪಂದ್ಯದಲ್ಲಿ 4ನೇ ಶ್ರೇಯಾಂಕದ ಆಸ್ಟ್ರೇಲಿಯಾ ಜೋಡಿ ಜೋಷ್ ಈಗಲ್- ಆ್ಯಂಡ್ರು ಫ್ಲಾರೆಂಟ್, 6ನೇ ಶ್ರೇಯಾಂಕದ ಬ್ರೆಜಿಲ್ನ ಜೈಮಿ ಆನಿನ್ಸ್- ಅರ್ಜೆಂಟಿನಾದ ಡೇನಿಯಲ್ ಅರ್ಸಾನಿಕ್ ವಿರುದ್ಧ 6-1, 3-6, 6-4ರಲ್ಲಿ ಗೆದ್ದಿತು.
ಮತ್ತೊಂದು ಪಂದ್ಯದಲ್ಲಿ ಅಮೆರಿಕದ ಡಾನ್ ಜಾನ್ಸನ್ ಹಾಗೂ ದಕ್ಷಿಣ ಆಫ್ರಿಕದ ಪಿಯಟ್ ನಾರ್ವಲ್ ಜೋಡಿಯು ಅಮೆರಿಕದ ಅಲೆಕ್ಸ್ ಓ ಬ್ರಿಯಾನ್ ಹಾಗೂ ಜೇರ್ಡ್ ಪಾಮರ್ ಜೋಡಿಯನ್ನು 7-5, 7-6(9-7) ರಲ್ಲಿ ಸೋಲಿಸಿತು.
(ಇನ್ಫೋ ವಾರ್ತೆ)
ವಾರ್ತಾ
ಸಂಚಯ
ಮುಖಪುಟ
/
ಆಟದ
ಅಂಗಳ