ಮಾರುತಿ 800 ಗುಣಮಟ್ಟದಲ್ಲಿ ಶೇ. 28.75 ರಷ್ಟು ಪ್ರಗತಿ

ನವದೆಹಲಿ : ಇದು ಮಾರುತಿ ಕಾರುಗಳಿಗೆ ಸಂಬಂಧಿಸಿದಂತೆ ಹೊಸ ಸುದ್ದಿ. ಬೆಲೆ ಏರಿಕೆ ಇಳಿಕೆಗೆ ಸಂಬಂಧಿಸಿದ್ದಲ್ಲ ವಾದ್ದರಿಂದ ನೀವು ಸಮಾಧಾನ ವದನರಾಗಿ ಸುದ್ದಿ ಓದಬಹುದು.

ಸಮೂಹದ ಕಾರು ಎಂದೇ ಹೆಸರಾದ ಮಾರುತಿ 800 ತನ್ನ ಗುಣಮಟ್ಟದಲ್ಲಿ ಗಣನೀಯ ಪ್ರಗತಿ ಸಾಧಿಸಿದೆಯಂತೆ. ಗ್ರಾಹಕ ಸರ್ವೆಯಲ್ಲಿ ಅಮೆರಿಕೆಯಲ್ಲಿ ಎತ್ತಿದ ಕೈ ಎನ್ನಿಸಿದ ಜೆಡಿ ಪವರ್‌ ನಡೆಸಿದ ಮೂಲಭೂತ ಗುಣಮಟ್ಟ ಅಧ್ಯಯನದಲ್ಲಿ ಮಾರುತಿ 800 ಕಾರಿನ ಗುಣಮಟ್ಟ ಕಳೆದ ವರ್ಷಕ್ಕಿಂತ ಪ್ರತಿಶತ 28.75 ರಷ್ಟು ಪ್ರಗತಿ ಸಾಧಿಸಿದೆ ಎಂದು ತಿಳಿದು ಬಂದಿದೆ.

ಕಾರಿನ ಗುಣಮಟ್ಟ ವರ್ಷದಿಂದ ವರ್ಷಕ್ಕೆ ಉತ್ತಮವಾಗುತ್ತಿರುವುದು ಗಮನಾರ್ಹ. 1998 ರಲ್ಲಿ ಸರಾಸರಿ 100 ಕಾರುಗಳಲ್ಲಿ 413 ಸಮಸ್ಯೆಗಳು ಕಂಡುಬಂದರೆ, ಈ ಸಂಖ್ಯೆ 99 ರಲ್ಲಿ 313ಕ್ಕೆ ಕುಸಿಯಿತು. ಪ್ರಸಕ್ತ ವರ್ಷ ಸಮಸ್ಯೆಗಳ ಸಂಖ್ಯೆ 223 ಕ್ಕೆ ಕುಸಿದಿರುವುದು ಕಾರಿನ ಗುಣಮಟ್ಟವನ್ನು ಸೂಚಿಸುತ್ತದೆ ಎಂದು ಅಧ್ಯಯನ ತಿಳಿಸಿದೆ.

1983 ರಲ್ಲಿ ಮಾರುಕಟ್ಟೆ ಪ್ರವೇಶಿಸಿದ ಮಾರುತಿ 800, ಮಾರುತಿ ಸಮೂಹದಲ್ಲಿಯೇ ಅತ್ಯಂತ ಕಡಿಮೆ ಬೆಲೆಯ ಕಾರು. ಅದರ ಜನಪ್ರಿಯತೆಯಲ್ಲಿ ಬೆಲೆಯ ಪಾತ್ರ ಪ್ರಮುಖವಾಗಿದೆ. ಇದೊಂದೇ ಮಾಡೆಲ್‌ ಭಾರತೀಯ ಕಾರು ಮಾರುಕಟ್ಟೆಯ ಶೇ.30 ರಷ್ಟನ್ನು ಆಕ್ರಮಿಸಿರುವುದು ಇದರ ಜನಪ್ರಿಯತೆಯ ದ್ಯೋತಕವಾಗಿದೆ.

(ಯುಎನ್‌ಐ)