ನ್ಯಾಯನಿರ್ಣಯ ವ್ಯವಸ್ಥೆಯ ಆಮೆ ನಡಿಗೆ

ಬೆಂಗಳೂರು : ಭಾರತೀಯ ನ್ಯಾಯಾಲಯಗಳಲ್ಲಿ ಈ ಹೊತ್ತು ಇತ್ಯರ್ಥವಾಗದೇ ಬಾಕಿ ಉಳಿದಿರುವ ಪ್ರಕರಣಗಳು ಎಷ್ಟು ? ಈ ಬಾಕಿ ಉಳಿದಿರುವ ಪ್ರಕರಣಗಳು ಈಗಿನ ವೇಗದಲ್ಲೇ ತೀರ್ಮಾನವಾಗಬೇಕಾದರೆ ಎಷ್ಟು ವರ್ಷ ಬೇಕು ?

ರಾಷ್ಟ್ರೀಯ ಕಾನೂನು ಶಾಲೆಯ ನಿರ್ದೇಶಕ ಡಾ. ಜಿ. ಮೋಹನ್‌ ಗೋಪಾಲ್‌ ಅವರ ರೀತ್ಯ ಬಾಕಿ ಉಳಿದಿರುವ ಪ್ರಕರಣಗಳ ಸಂಖ್ಯೆ 38 ದಶಲಕ್ಷಕ್ಕೂ ಹೆಚ್ಚು. ಈಗಿನ ವೇಗದಲ್ಲೇ ಈ ಪ್ರಕರಣಗಳು ಇತ್ಯರ್ಥವಾಗಲು ಹಿಡಿಯುವ ಸಮಯ ಕನಿಷ್ಠ 324 ವರ್ಷಗಳು.

ಸಂಸದೀಯ ವ್ಯವಹಾರಗಳ ಸಂಸ್ಥೆ ನಗರದಲ್ಲಿ ಏರ್ಪಡಿಸಿದ್ದ ದಿ. ಎಸ್‌. ನಿಜಲಿಂಗಪ್ಪ ಸ್ಮಾರಕ ಉಪನ್ಯಾಸ ಕಾರ್ಯಕ್ರಮದಲ್ಲಿ ಅವರು ಈ ವಿಷಯವನ್ನು ತಿಳಿಸಿದ್ದಾರೆ. ಕಾನೂನು ಮತ್ತು ಶ್ರೀಸಾಮಾನ್ಯ ಎಂಬ ವಿಷಯದ ಬಗ್ಗೆ ತಮ್ಮ ವಿಚಾರ ಮಂಡಿಸಿದ ಅವರು, ನಮ್ಮ ದೇಶದ ಕಾನೂನು ವ್ಯವಸ್ಥೆ ಪಾಶ್ಚಾತ್ಯ ದೇಶಗಳ ಕಾನೂನು ವ್ಯವಸ್ಥೆಯ ಅನುಕರಣೆಯಾಗಿದೆ ಎಂದೂ ಹೇಳಿದರು.

761 ವರ್ಷದ ನಂತರ ಇತ್ಯರ್ಥ : ಪುಣೆಯಲ್ಲಿ 761 ವರ್ಷಗಳ ನಂತರ ಪ್ರಕರಣವೊಂದು ಇತ್ಯರ್ಥವಾಯಿತು. 1205ರಲ್ಲಿ ಆರಂಭವಾದ ಪ್ರಕರಣ 1966ರಲ್ಲಿ ಇತ್ಯರ್ಥವಾಯಿತು ಎಂದು ಅವರು ಹೇಳಿದಾಗ ಸಭಿಕರು ನಿಬ್ಬೆರಗಾದರು.

ಸ್ವಾಗತಾರ್ಹ : ನ್ಯಾಯದಾನದಲ್ಲಿ ಆಗುತ್ತಿರುವ ವಿಳಂಬವನ್ನು ತಪ್ಪಿಸಲು, ಬಾಕಿ ಉಳಿದಿರುವ ಪ್ರಕರಣಗಳ ಶೀಘ್ರ ವಿಲೇವಾರಿಗೆ ಸುಪ್ರೀಂಕೋರ್ಟ್‌ ಕ್ರಮ ಕೈಗೊಂಡಿರುವುದು ಸ್ವಾಗತಾರ್ಹ ನಿಲವು ಎಂದ ಅವರು, ಸುಪ್ರೀಂ ಕೋರ್ಟ್‌ನ ಸುವರ್ಣ ಮಹೋತ್ಸವ ಸಂದರ್ಭದಲ್ಲಿ ಮಾತನಾಡಿದ ರಾಷ್ಟ್ರಪತಿ ಕೆ.ಆರ್‌. ನಾರಾಯಣನ್‌ ಅವರು ‘ಭಾರತದಲ್ಲಿ ಕಾನೂನು ಸಾಮಾನ್ಯ ಜನರಿಗೆ ಕೈಗೆಟುಕದ ವಸ್ತುವಾಗಿದ್ದು, ಜನರೇ ಕಾನೂನನ್ನು ಕೈಗೆತ್ತಿಕೊಳ್ಳುತ್ತಿರುವ ಬಗ್ಗೆ ವಿಷಾದ ವ್ಯಕ್ತಪಡಿಸಿದರು’ ಎಂಬುದನ್ನೂ ಉಲ್ಲೇಖಿಸಿದರು.

ಕಂಪ್ಯೂಟರೀಕರಣದಿಂದ ಪರಿಹಾರ : ರಾಷ್ಟ್ರದ ಎಲ್ಲ ನ್ಯಾಯಾಲಯಗಳಲ್ಲಿ ಕಂಪ್ಯೂಟರ್‌ಗಳನ್ನು ಅಳವಡಿಸುವುದರಿಂದ, ನ್ಯಾಯಾಲಯಗಳ ಸಂಖ್ಯೆಯನ್ನು ಹೆಚ್ಚಿಸುವುದರಿಂದ ಹಾಗೂ ಶ್ರೀಸಾಮಾನ್ಯರಲ್ಲಿ ಕಾನೂನಿನ ಬಗ್ಗೆ ಅರಿವು ಮೂಡಿಸುವ ಮೂಲಕ ಬಾಕಿ ಪ್ರಕರಣಗಳ ಶೀಘ್ರ ವಿಲೇವಾರಿ ಸಾಧ್ಯ ಎಂದೂ ಅವರು ಅಭಿಪ್ರಾಯಪಟ್ಟರು.

ಬ್ರಿಟನ್‌, ಅಮೆರಿಕವೂ ಹೊರತಲ್ಲ : ಇದು ಕೇವಲ ಭಾರತಕ್ಕೆ ಮಾತ್ರ ಸೀಮಿತವಾಗಿಲ್ಲ. ಅಮೆರಿಕದಲ್ಲಿ ಕೂಡ ತಮ್ಮ ಮೇಲಿರುವ ಪ್ರಕರಣ ನಿಭಾಯಿಸಲಾರದ 25ಲಕ್ಷಕ್ಕೂ ಹೆಚ್ಚು ಮಂದಿ ಸೆರೆಮನೆಯ ಕಗ್ಗತ್ತಲಲ್ಲಿ ಕೊಳೆಯುತ್ತಿದ್ದಾರೆಂದ ಅವರು, ಇದಕ್ಕೆ ಬ್ರಿಟನ್‌ ಕೂಡ ಹೊರತಾಗಿಲ್ಲ ಎಂದರು.

ಕಾರ್ಯಕ್ರಮದಲ್ಲಿ ರಾಜ್ಯ ವಾರ್ತಾ ಸಚಿವ ಪ್ರೊ. ಬಿ.ಕೆ. ಚಂದ್ರಶೇಖರ್‌, ಸಂಸದೀಯ ವ್ಯವಹಾರಗಳ ಸಂಸ್ಥೆಯ ಕಾರ್ಯದರ್ಶಿ ಪ್ರೊ. ಶಾಂತಮೂರ್ತಿ ಇದ್ದರು.

(ಇನ್‌ಫೊ ವಾರ್ತೆ)