ವಿಶ್ವದ ಅತಿ ದೊಡ್ಡ ಹೃದಯ ಚಿಕಿತ್ಸೆ ಆಸ್ಪತ್ರೆ ಬೆಂಗಳೂರಿನಲ್ಲಿ ತಲೆಯೆತ್ತಲಿದೆ

ಬೆಂಗಳೂರು : ವಿಶ್ವದ ಅತ್ಯಂತ ದೊಡ್ಡ ಹೃದಯ ಚಿಕಿತ್ಸೆ ಆಸ್ಪತ್ರೆ ಬೆಂಗಳೂರಿನಲ್ಲಿ ತಲೆಯೆತ್ತಲಿದ್ದು, ಮುಂದಿನ ವರ್ಷದ ಜನವರಿ ತಿಂಗಳ ಕೊನೆಗೆ ಆಸ್ಪತ್ರೆ ಆರಂಭವಾಗಲಿದೆ.

ರವೀಂದ್ರನಾಥ್‌ ಠಾಗೋರ್‌ ಇಂಟರ್‌ ನ್ಯಾಷನಲ್‌ ಇನ್ಸ್ಟಿಟ್ಯೂಟ್‌ ಆಫ್‌ ಕಾರ್ಡಿಯಾಕ್‌ ಸಾೖನ್ಸಸ್‌ನ ಅಧ್ಯಕ್ಷ ಡಾ. ದೇವಿ ಶೆಟ್ಟಿ ಈ ವಿಷಯವನ್ನು ಮಂಗಳವಾರದಂದು ತಿಳಿಸಿದ್ದಾರೆ. ಅವರು ಸಾಮಾಜಿಕ ಕ್ಷೇಮದ ಬಗ್ಗೆ ಕಾರ್ಪೊರೇಟ್‌ ಜಗತ್ತಿನ ಜವಾಬ್ದಾರಿಗಳು ಎಂಬ ವಿಷಯದ ಬಗ್ಗೆ ನಡೆದ ವಿಚಾರ ಸಂಕಿರಣವೊಂದರಲ್ಲಿ ಮಾತನಾಡುತ್ತಿದ್ದರು.

ಏಷ್ಯಾ ಹಾರ್ಟ್‌ ಫೌಂಡೇಷನ್‌ ಈ ಹೊಸ ಆಸ್ಪತ್ರೆಯನ್ನು ಆರಂಭಿಸಲಿದ್ದು, ಆಸ್ಪತ್ರೆಗೆ ನಾರಾಯಣ ಆಸ್ಪತ್ರೆ ಎಂದು ಹೆಸರಿಡಲಾಗುವುದು. ಒಂದು ದಿನದಲ್ಲಿ 25 ಹೃದಯ ಶಸ್ತ್ರ ಚಿಕಿತ್ಸೆ ನಡೆಸುವ ಸಾಮರ್ಥ್ಯವಿರುವ ಈ ಆಸ್ಪತ್ರೆಯಲ್ಲಿ 700 ಹಾಸಿಗೆಗಳಿರುತ್ತವೆ. ಸುಮಾರು 200 ಕೋಟಿ ರೂಪಾಯಿ ವೆಚ್ಚದಲ್ಲಿ ಆಸ್ಪತ್ರೆಯನ್ನು ನಿರ್ಮಿಸಲಾಗುತ್ತಿದೆ ಎಂದು ದೇವಿ ಶೆಟ್ಟಿ ವಿವರಿಸಿದರು.

ದೇಶದ ಏಳು ಈಶಾನ್ಯ ರಾಜ್ಯಗಳಿಗೆ ಟೆಲಿಮೆಡಿಸಿನ್‌ ಸೌಲಭ್ಯಗಳನ್ನು ಕಲ್ಪಿಸುವ ಯೋಜನೆ ಕೂಡ ಏಷ್ಯಾ ಹಾರ್ಟ್‌ ಫೌಂಡೇಷನ್‌ ಮುಂದೆ ಇದ್ದು, ತಂತ್ರಜ್ಞಾನಕ್ಕಾಗಿ ಇಸ್ರೋವನ್ನು ಸಂಪರ್ಕಿಸಲಾಗಿದೆ . ಭಾರತದಲ್ಲಿ ವರ್ಷಕ್ಕೆ 20 ಲಕ್ಷ ಹೃದಯ ಶಸ್ತ್ರ ಚಿಕಿತ್ಸೆಗಳನ್ನು ನಡೆಸಬೇಕಾದ ಅಗತ್ಯವಿದೆ. ಆದರೆ ಕೇವಲ 45 ಸಾವಿರ ಶಸ್ತ್ರ ಚಿಕಿತ್ಸೆ ನಡೆಸುವುದು ಸಾಧ್ಯವಾಗುತ್ತಿದೆ. ಈ ಅಂತರವನ್ನು ಕುಗ್ಗಿಸಲು ಹಾರ್ಟ್‌ ಫೌಂಡೇಷನ್‌, ಪ್ರತಿ ರಾಜ್ಯದ ರಾಜಧಾನಿಯಲ್ಲಿ ಹೃದ್ರೋಗ ಆಸ್ಪತ್ರೆಗಳನ್ನು ತೆರೆಯಲು ಉದ್ದೇಶಿಸಿದೆ ಎಂದು ಡಾ. ಶೆಟ್ಟಿ ಹೇಳಿದರು.

(ಇನ್ಫೋ ವಾರ್ತೆ)