ಬಳ್ಳಾರಿಯಲ್ಲಿ ರೈತರಿಂದ ಸಚಿವರ ಘೕರಾವ್‌, ಮೆಕ್ಕೆಜೋಳಕ್ಕೆ ಬೆಂಕಿ

ಬಳ್ಳಾರಿ : ಮೆಕ್ಕೆಜೋಳ ಬೆಳೆದ ರೈತರ ಹತಾಶೆ ಸೋಮವಾರ ಭುಗಿಲೆದ್ದು ಕ್ರುದ್ಧತೆಗೆ ಕಾರಣವಾಯಿತು. ರೈತರು ರಾಜ್ಯ ತೋಟಗಾರಿಕೆ ಸಚಿವ ಅಲ್ಲಂ ವೀರಭದ್ರಪ್ಪ ಅವರನ್ನು ಘೕರಾವ್‌ ಮಾಡಿದ್ದಲ್ಲದೆ, ಕೆಲವು ಕ್ವಿಂಟಾಲ್‌ ಮೆಕ್ಕೆಜೋಳವನ್ನು ಪೆಟ್ರೋಲ್‌ ಹಾಕಿ ಸುಟ್ಟು ಪ್ರತಿಭಟನೆ ವ್ಯಕ್ತಪಡಿಸಿದರು.

ರಾಜ್ಯ ತೋಟಗಾರಿಕಾ ಸಚಿವ ಅಲ್ಲಂ ವೀರಭದ್ರಪ್ಪ ಅವರು ಎಪಿಎಂಸಿಗೆ ಭೇಟಿ ಕೊಡುತ್ತಾರೆಂಬ ವಿಷಯ ತಿಳಿದಿದ್ದ ರೈತರು ಮುಂಜಾನೆಯಿಂದಲೇ ಅವರ ಬರವಿಗೆ ಕಾಯುತ್ತಿದ್ದರು. ಮಧ್ಯಾಹ್ನ 12.45ರ ಸುಮಾರಿನಲ್ಲಿ ಸಚಿವರು ಬಂದೊಡನೆ ಅವರನ್ನು ಮುತ್ತಿದ ರೈತರು ಸರ್ಕಾರದ ರೈತ ವಿರೋಧಿ ನೀತಿಗಳನ್ನು ಖಂಡಿಸಿ, ಜಿಲ್ಲೆಯ ಮೂವರು ಸಚಿವರು ಹಾಗೂ ಇಬ್ಬರು ಸಂಸದರ ವಿರುದ್ಧ ಘೋಷಣೆಗಳನ್ನು ಕೂಗಿದರು.

ಜಿಲ್ಲೆಯಲ್ಲಿ ರೈತರು 2.8 ಲಕ್ಷ ಟನ್‌ನಷ್ಟು ಮೆಕ್ಕೆಜೋಳ ಬೆಳೆದಿದ್ದಾರೆ. ಈವರೆಗೆ ಸರ್ಕಾರಿ ಅಧಿಕಾರಿಗಳು ಖರೀದಿಸಿರುವುದು ಕೇವಲ 30 ಸಾವಿರ ಟನ್‌. ಉಳಿದ ಬೆಳೆಗೆ ಬೆಂಬಲ ಬೆಲೆ ಸಿಗದಿದ್ದರೆ ನಮ್ಮ ಗತಿ ಏನು? ಆವರ್ತ ನಿಧಿಯನ್ನು ಕಣ್ಣೊರೆಸಲೋ ಎಂಬಂತೆ ಸ್ಥಾಪಿಸಿರುವ ಸರ್ಕಾರ ಅದಕ್ಕೆ ಈವರೆಗೆ ಒಂದು ಪೈಸೆಯನ್ನೂ ಜಮಾ ಮಾಡಿಲ್ಲ ಎಂದು ಸಚಿವರ ಮುಂದೆ ರೈತರು ತಮ್ಮ ಅಳಲನ್ನು ತೋಡಿಕೊಂಡರು.

ಪರಿಸ್ಥಿತಿಯ ತೀವ್ರತೆಯನ್ನು ಮನಗಂಡ ಸಚಿವರು ಜಿಲ್ಲಾಧಿಕಾರಿಗಳಿಗೆ ಫೋನಾಯಿಸಿ ತಕ್ಷಣವೇ ಎ.ಪಿ.ಎಂ.ಸಿ.ಗೆ ಬರ ಮಾಡಿಕೊಂಡರು. ಎಫ್‌ಸಿಐನಲ್ಲಿ ಸಿಬ್ಬಂದಿ ಕೊರತೆ ಇರುವುದನ್ನು ಅರಿತು ಇತರೆ ಇಲಾಖೆಗಳಿಂದ ಅಲ್ಲಿಗೆ ಅಧಿಕಾರಿಗಳನ್ನು ನಿಯೋಜಿಸುವಂತೆ ಆದೇಶಿಸಿದರು. ಸ್ಥಳೀಯ ಅಧಿಕಾರಿಗಳ ಪರವಾಗಿ ರೈತರಲ್ಲಿ ಕ್ಷಮೆ ಕೇಳಿದ ಸಚಿವರು, ಪ್ರತಿನಿತ್ಯ ಕನಿಷ್ಠ 10 ಸಾವಿರ ಟನ್‌ ಮೆಕ್ಕೆಜೋಳ ಖರೀದಿ ಮಾಡಿ, ವಾರದೊಳಗೆ ದೂರದೂರುಗಳಿಂದ ಬರುವ ರೈತರ ಮಾಲನ್ನು ಕೊಂಡುಕೊಳ್ಳುವಂತೆ ಆದೇಶ ಕೊಟ್ಟರು.

(ಇನ್ಫೋ ವಾರ್ತೆ)