ಭಾರತ ಪ್ರವಾಸಕ್ಕೆ ಒಲ್ಲೆ ಎನ್ನುತ್ತಿರುವ ಇಂಗ್ಲೆಂಡ್‌ ಕ್ರಿಕೆಟಿಗರು

ಲಂಡನ್‌ : ಈ ವರ್ಷದ ಕ್ರಿಸ್‌ಮಸ್ಸನ್ನು ತಮ್ಮೂರಲ್ಲಿ ಆಚರಿಸುವುದರಿಂದ ವಂಚಿತರಾಗಿರುವ ಇಂಗ್ಲೆಂಡಿನ ಕ್ರಿಕೆಟಿಗರು ಮುಂದಿನ ವರ್ಷದ ಚಳಿಗಾಲದಲ್ಲಿ ಭಾರತ ಪ್ರವಾಸ ಕೈಗೊಳ್ಳಲು ಸಿದ್ಧರಿಲ್ಲ. ಈಗ ಪಾಕಿಸ್ತಾನ ಟೂರ್‌ನಲ್ಲಿರುವ ಇಂಗ್ಲೆಂಡ್‌ನ ಬಹುತೇಕ ಆಟಗಾರರಿಗೆ ಮುಂದಿನ ವರ್ಷವೂ ಕ್ರಿಸ್‌ಮಸ್ಸನ್ನು ಮಿಸ್‌ ಮಾಡಿಕೊಳ್ಳಲು ಇಷ್ಟವಿಲ್ಲವಂತೆ.

ಈಗ ರೂಪಿಸಲಾಗಿರುವ ಕಾರ್ಯಕ್ರಮದಂತೆ ಮುಂದಿನ ವರ್ಷಾಂತ್ಯದಲ್ಲಿ ಇಂಗ್ಲೆಂಡ್‌ ಭಾರತ ಪ್ರವಾಸ ಕೈಗೊಳ್ಳಲಿದೆ. ಆದರೆ ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಮಂಡಳಿ (ಇಸಿಬಿ) ಗೆ ಅನೇಕ ಆಟಗಾರರು ಈ ಕಾರ್ಯಕ್ರಮವನ್ನು ರದ್ದು ಮಾಡುವಂತೆ ಒತ್ತಡ ತರುತ್ತಿದ್ದಾರೆ. ನಿಗದಿಯಾಗಿರುವಂತೆ ಭಾರತದ ವಿರುದ್ಧ ಇಂಗ್ಲೆಂಡ್‌ 3 ಟೆಸ್ಟ್‌ ಪಂದ್ಯಗಳನ್ನಾಡಲಿದೆ. ನಂತರ ನ್ಯೂಜಿಲೆಂಡ್‌ ಪ್ರವಾಸ.

ಭಾರತ ಪ್ರವಾಸ ಕೈಗೊಳ್ಳಲು ತಂಡದ ನಾಯಕ ಅಲೆಕ್‌ ಸ್ಟುವರ್ಟ್‌, ಗ್ರಹಾಂ ಥೋರ್ಪ್‌, ಆ್ಯಂಡ್ರೂ ಕ್ಯಾಡಿಕ್‌ ಹಾಗೂ ಡೆರಿನ್‌ ಗಾಫ್‌ ಸುತಾರಾಂ ಒಪ್ಪುತ್ತಿಲ್ಲ. ಭಾರತಕ್ಕೆ ಹೋಗುವುದೊಂದು ರಿಸ್ಕು. ಜೊತೆಗೇ ಸಿಗೋ ದುಡ್ಡೂ ಕಡಿಮೆ ಎನ್ನುವುದು ಅವರು ಕೊಡುವ ಕಾರಣ. ಮುಂದಿನ ವರ್ಷ ಆಸ್ಟ್ರೇಲಿಯಾ ಪ್ರವಾಸ ನಂತರ ಕ್ರಿಕೆಟ್‌ನಿಂದ ನಿವೃತ್ತಿ ಯಾಗುವುದಾಗಿ ಮೈಕೆಲ್‌ ಆರ್ಥಟನ್‌ ಹೇಳಿ ಬಿಟ್ಟಿದ್ದಾರೆ. ಬಾಂಗ್ಲಾ ಪ್ರವಾಸವನ್ನು ರದ್ದು ಪಡಿಸುವುದರಲ್ಲಿ ಸ್ಟುವರ್ಟ್‌ ಯಶಸ್ವಿಯಾಗಿದ್ದರು.

ಕಳೆದ ವರ್ಷ ಭಾರತ ಪ್ರವಾಸ ಕೈಗೊಂಡಿದ್ದ ಇಂಗ್ಲೆಂಡ್‌ ಆಡಿದ ಮೂರೂ ಟೆಸ್ಟ್‌ಗಳನ್ನೂ ಸೋತಿತ್ತು. ಮೊದಲೇ ನಯೋ ಎನ್ನುತ್ತಿರುವ ಇಂಗ್ಲೆಂಡ್‌ ಕ್ರಿಕೆಟ್‌ನಲ್ಲಿ ಕೇಳಿ ಬರುತ್ತಿರುವ ಆಟಗಾರರ ಇಂಥ ನಿರ್ಣಯಗಳು ಮಂಡಳಿಯ ಅಧಿಕಾರಿಗಳು ತಲೆ ಮೇಲೆ ಕೈ ಹೊತ್ತು ಕೂರುವಂತೆ ಮಾಡಿವೆ. ಒತ್ತಡ ಕಡಿಮೆ ಮಾಡಲು ಒಂದು ದಿನದ ಪಂದ್ಯಗಳಿಗೇ ಒಂದು, ಟೆಸ್ಟ್‌ಗಳಿಗಾಗಿ ಮತ್ತೊಂದು ಪ್ರತ್ಯೇಕ ತಂಡಗಳನ್ನು ರಚಿಸುವ ಬಗೆಗೆ ಮಂಡಳಿ ಯೋಚಿಸುತ್ತಿದೆ.

(ಐಎಎನ್‌ಎಸ್‌)