ಕಲುಷಿತ ನೀರು : ಮತ್ತೆ 17 ಮಂದಿ ಆಸ್ಪತ್ರೆಗೆ

ಕೊರಟಗೆರೆ : ಪಟ್ಟಣದಲ್ಲಿ ಸರಬರಾಜಾಗುತ್ತಿರುವ ಕಲುಷಿತ ನೀರನ್ನು ಕುಡಿದ ಮತ್ತೂ 17ಮಂದಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ನೀರು ಕುಡಿದ ಗ್ರಾಮಸ್ಥರು ವಾಂತಿ - ಭೇದಿಯಿಂದ ಅಸ್ವಸ್ಥರಾಗಿದ್ದಾರೆ. ಶನಿವಾರದಿಂದಲೇ ಪಟ್ಟಣದಲ್ಲಿ ಕಲುಷಿತ ನೀರು ಸರಬರಾಜಾಗುತ್ತಿದ್ದು, ಈಗಾಗಲೇ 75ಕ್ಕೂ ಹೆಚ್ಚು ಮಂದಿ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದರು.

ಶನಿವಾರದಿಂದ ಕಲುಷಿತ ನೀರು ಕುಡಿದು ಆಸ್ಪತ್ರೆಗೆ ದಾಖಲಾದವರು ಸಂಖ್ಯೆ ಹತ್ತಿರ ಹತ್ತಿರ ನೂರಕ್ಕೆ ಮುಟ್ಟಿದೆ. ಖಾಸಗಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದವರ ಬಗ್ಗೆ ವಿವರಗಳು ಸಿಕ್ಕಿಲ್ಲ. ನೀರನ್ನು ಕುದಿಸಿ ಕುಡಿಯುವಂತೆ ಕರಪತ್ರ ಹಂಚಿದ್ದರೂ, ಪ್ರಚಾರ ಕಾರ್ಯ ನಡೆದಿದ್ದರೂ ಏನೂ ಪ್ರಯೋಜನ ಆಗಿಲ್ಲ. ಹೊಟೆಲ್‌ಗಳಲ್ಲಿ ಕಡ್ಡಾಯವಾಗಿ ಬಿಸಿ ನೀರನ್ನೇ ಕೊಡಬೇಕು ಎಂದು ಪಟ್ಟಣ ಪಂಚಾಯ್ತಿ ಅಧ್ಯಕ್ಷೆ ಲಕ್ಷ್ಮೀದೇವಮ್ಮ ಆದೇಶಿಸಿದ್ದಾರೆ.

ಸಂತೆಯಲ್ಲಿ ನೀರು ಕುಡಿದ ಕೆಲವರು ಆಸ್ಪತ್ರೆಗೆ ದಾಖಲಾಗಿದ್ದಾರೆ ಎಂದು ತಾಲೂಕು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ. ತಹಶೀಲ್ದಾರ್‌, ಪ.ಪಂ. ಅಧ್ಯಕ್ಷರು ಪಟ್ಟಣದಾದ್ಯಂತ ಸಂಚರಿಸಿ, ತೆರೆದ ಬಾವಿಗಳ ನೀರನ್ನು ಕುಡಿಯದಂತೆ, ಹಾಗೂ ಬಿಸಿ ನೀರನ್ನೇ ಬಳಸುವಂತೆ ನಾಗರಿಕರಲ್ಲಿ ಮನವಿ ಮಾಡಿದ್ದಾರೆ.

ಮುಖಪುಟ / ಊರು ಕೇರಿ