ಗುಡ್ಡಗಾಡು ಜನರಿಗೆ ಸಂದೇಶಕಾರರಾಗಲು ಒತ್ತಾಯಿಸುತ್ತಿರುವ ಎಸ್‌ಟಿಎಫ್‌

ಚೆನ್ನೈ : ವೀರಪ್ಪನ್‌ ಶಿಕಾರಿಯಲ್ಲಿ ತೊಡಗಿರುವ ತಮಿಳುನಾಡು ಮತ್ತು ಕರ್ನಾಟಕ ರಾಜ್ಯಗಳ ವಿಶೇಷ ಕಾರ್ಯಪಡೆಯ ಪೊಲೀಸರು, ಸತ್ಯಮಂಗಲಂ ಅರಣ್ಯ ವಲಯದ ಗುಡ್ಡಗಾಡು ಜನರನ್ನು ಸಂದೇಶಕಾರರಾಗುವಂತೆ ಒತ್ತಾಯಿಸುತ್ತಿದ್ದಾರೆ ಎಂದು ನಾಗರಿಕ ಸ್ವಾತಂತ್ರ್ಯ ಒಕ್ಕೂಟ (ಪಿಯುಸಿಲ್‌) ಆರೋಪಿಸಿದೆ.

ತಮಿಳುನಾಡು ಹಾಗೂ ಪಾಂಡಿಚೆರಿ ಘಟಕಗಳ ಅಧ್ಯಕ್ಷ ರವಿಕುಮಾರ್‌ ಅವರು ಸೋಮವಾರ ಚೆನ್ನೈನಲ್ಲಿ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ಈ ಆರೋಪ ಮಾಡಲಾಗಿದೆ. ಪೊಲೀಸರು ಗುಡ್ಡಗಾಡು ಜನರ ಮೇಲೆ ಒತ್ತಡ ಹೇರದಂತೆ ಉಭಯ ರಾಜ್ಯ ಸರ್ಕಾರಗಳು ತಕ್ಷಣವೇ ಮಧ್ಯ ಪ್ರವೇಶಿಸಬೇಕು ಎಂದು ಭಾನುವಾರ ನಡೆದ ಪಿಯುಸಿಎಲ್‌ನ ಕಾರ್ಯ ನಿರ್ವಾಹಕ ಸಮಿತಿಯ ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಗಿದೆ ಎಂದು ಹೇಳಿಕೆ ತಿಳಿಸಿದೆ.

ಪ್ರಸ್ತುತ ಎಸ್‌ಟಿಎಫ್‌ನಲ್ಲಿರುವ ಅಧಿಕಾರಿಗಳು ಈಗಾಗಲೇ ಮಾನವ ಹಕ್ಕುಗಳ ಉಲ್ಲಂಘನೆಯ ಆಪಾದನೆ ಹೊತ್ತಿದ್ದು, ಅಂತಹವರನ್ನು ಕಾರ್ಯಪಡೆಯಿಂದ ಪ್ರತ್ಯೇಕಿಸಬೇಕು. ವೀರಪ್ಪನ್‌ ಬಂಧನ ಕಾರ್ಯಾಚರಣೆಯ ನೆಪದಲ್ಲಿ ನಡೆದ ಹಿಂಸಾತ್ಮಕ ಕೃತ್ಯಗಳ ಕುರಿತು ವಿವರವಾದ ತನಿಖೆ ನಡೆಸಿ, ಅಪರಾಧಿಗಳನ್ನು ಶಿಕ್ಷಿಸಬೇಕು ಎಂದು ರವಿಕುಮಾರ್‌ ಹೇಳಿಕೆಯಲ್ಲಿ ಒತ್ತಾಯಿಸಿದ್ದಾರೆ.

(ಯುಎನ್‌ಐ)

ವಾರ್ತಾ ಸಂಚಯ
ಮುಖಪುಟ / ವೀರಪ್ಪನ್‌ ಶಿಕಾರಿ