ವಲಸೆ ಪಕ್ಷಿಗಳ ಅಸಹಜ ಸಾವು : ಸ್ಥಳಕ್ಕೆ ತಜ್ಞರ ಭೇಟಿ

ಮೈಸೂರು : ಕಳೆದ 10 ದಿನಗಳಿಂದ 40 ವಲಸೆ ಪಕ್ಷಿಗಳು ಅಸುನೀಗಿದ ಹಿನ್ನೆಲೆಯಲ್ಲಿ ಸಮೀಪದ ಲಿಂಗಾಂಬುಧಿಕೆರೆಗೆ ಸೋಮವಾರ ಐವರು ತಜ್ಞರ ತಂಡ ಭೇಟಿ ನೀಡಿ ಪರಿಶೀಲನೆ ನಡೆಸಿತು.

ಕೆರಯ ನೀರು ಕಲುಷಿತಗೊಂಡಿರುವುದರಿಂದ ಪಕ್ಷಿಗಳು ಸತ್ತಿರಬಹುದೆಂಬ ಶಂಕೆಯ ಹಿನ್ನೆಲೆಯಲ್ಲಿ ಭೇಟಿ ನೀಡಿದ್ದ ತಂಡದಲ್ಲಿ ಒಬ್ಬ ಪಶು ವೈದ್ಯರು ಮತ್ತು ಅರಣ್ಯ ಇಲಾಖೆಯ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಇದ್ದಾರೆ. ಹವ್ಯಾಸಿ ಪರಿಸರವಾದಿಗಳ ಸಂಘ ಲಿಂಗಾಂಬುಧಿ ಕೆರೆಯ ಬಳಿ ಪಕ್ಷಿಗಳು ಸತ್ತು ಬಿದ್ದಿದ್ದನ್ನು ಭಾನುವಾರ ಆಕಸ್ಮಿಕವಾಗಿ ಪತ್ತೆ ಹಚ್ಚಿತ್ತು ಎಂದು ಉಪ ಅರಣ್ಯ ಸಂರಕ್ಷಣಾಧಿಕಾರಿ ರಾಜು ಯುಎನ್‌ಐಗೆ ತಿಳಿಸಿದ್ದಾರೆ.

ಸತ್ತಿರುವ ಪಕ್ಷಿಗಳು ವಲಸೆ ಬಂದಿರುವವುಗಳು ಎಂದು ಸ್ಪಷ್ಟಪಡಿಸಿರುವ ರಾಜು, ಪರೀಕ್ಷೆಗಾಗಿ ನೀರನ್ನು ಮೈಸೂರಿನ ಕೃಷಿ ಸಂಸ್ಥೆಗೆ ಕಳಿಸಲಾಗಿದೆ. ಪಕ್ಷಿಗಳ ಮೃತ ದೇಹಗಳನ್ನು ಪರೀಕ್ಷೆಗಾಗಿ ಬೆಂಗಳೂರಿಗೆ ಕಳಿಸಲಾಗುವುದು ಎಂದು ತಿಳಿಸಿದ್ದಾರೆ. ಪಕ್ಷಿಗಳು ಕಲುಷಿತ ನೀರಿನ ಒಂದೇ ಕಾರಣದಿಂದ ಸತ್ತಿರಲಿಕ್ಕಿಲ್ಲ ಎಂದು ಪ್ರಶ್ನೆಯಾಂದಕ್ಕೆ ಉತ್ತರಿಸಿದ ಅವರು ಕಳೆದ ವಾರದಿಂದ ಇದ್ದಕ್ಕಿದ್ದಂತೆ ಬದಲಾದ ವ್ಯತಿರಿಕ್ತ ಹವಾಮಾನವೂ ಕಾರಣವಿರಬಹುದೆಂದು ಹೇಳಿದ್ದಾರೆ.