ವೀರಪ್ಪನ್‌ ಭೇಟೆಗೆ ಕಾಡಿಗೆ ನುಗ್ಗಲಿರುವ ಎರಡು ಸಾವಿರ ಶಸ್ತ್ರಸಜ್ಜಿತ ಪೊಲೀಸರು

ಬೆಂಗಳೂರು : ಗಡಿ ಭದ್ರತಾಪಡೆಯ ಸಾವಿರ ಯೋಧರು ಹಾಗೂ ಸೇರಿದಂತೆ ಕರ್ನಾಟಕ ಮತ್ತು ತಮಿಳುನಾಡುಗಳಿಗೆ ಸೇರಿದ ಎರಡು ಸಾವಿರ ಯೋಧರು ನರಹಂತಕ ವೀರಪ್ಪನ್‌ ಹಾಗೂ ಆತನ ಸಹಚರರ ಭೇಟೆಗೆ ಕಾಡಿಗೆ ನುಗ್ಗಲಿದ್ದಾರೆ ಎಂದು ಕರ್ನಾಟಕದ ಪೊಲೀಸ್‌ ಮಹಾ ನಿರ್ದೇಶಕ ಸಿ. ದಿನಕರ್‌ ಶನಿವಾರ ಹೇಳಿದ್ದಾರೆ.

ವೀರಪ್ಪನ್‌ ವಿರುದ್ಧದ ಜಂಟಿ ಕಾರ್ಯಾಚರಣೆಗೆ ಅಂತಿಮ ರೂಪ ಕೊಡುವ ನಿಟ್ಟಿನಲ್ಲಿ ತಮಿಳುನಾಡು ವಿಶೇಷ ಕಾರ್ಯಪಡೆಯ ನೇತೃತ್ವ ವಹಿಸಿರುವ ಐ.ಜಿ.ಪಿ. ಬಾಲಚಂದ್ರನ್‌ ಅವರು, ಶನಿವಾರ ಬೆಂಗಳೂರಿನಲ್ಲಿ ರಾಜ್ಯದ ಹಿರಿಯ ಪೊಲೀಸ್‌ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಿದ ನಂತರ ದಿನಕರ್‌ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದರು.

ಮುಗಿದ ಸಮಾಲೋಚನೆ : ವೀರಪ್ಪನ್‌ ವಿರುದ್ಧದ ಕಾರ್ಯಾಚರಣೆಗೆ ಕೇಂದ್ರ ಸರಕಾರವು ನುರಿತ ಸಿಬ್ಬಂದಿ ಹಾಗೂ ಆತ್ಯಾಧುನಿಕ ಶಸ್ತ್ರಾಸ್ತ್ರಗಳ ನೆರವು ನೀಡುತ್ತಿರುವ ಹಿನ್ನೆಲೆಯಲ್ಲಿ ಜಂಟಿ ಕಾರ್ಯಪಡೆಯ ಕಾರ್ಯಾಚರಣೆ ಹೇಗಿರಬೇಕು ಎಂಬು ಬಗ್ಗೆ ಬಾಲಚಂದ್ರನ್‌ ಅವರು ಕರ್ನಾಟಕ ಪೊಲೀಸ್‌ ಮಹಾ ನಿರ್ದೇಶಕ ಸಿ. ದಿನಕರ್‌ಹಾಗೂ ಕರ್ನಾಟಕ ವಿಶೇಷ ಕಾರ್ಯಪಡೆಯ ನೇತೃತ್ವ ವಹಿಸಿರುವ ಸಾಂಗ್ಲಿಯಾನ ಅವರೊಂದಿಗೆ ಸಮಾಲೋಚನೆ ನಡೆಸಿದರು.

ಕಾರ್ಯಾಚರಣೆ ಈಗಾಗಲೇ ಆರಂಭವಾಗಿದ್ದು, ಕೇಂದ್ರದ ಗಡಿ ಭದ್ರತಾಪಡೆಯ ನೆರವಿನಿಂದ ಕಾರ್ಯಾಚರಣೆಯನ್ನು ಬಿಗಿಗೊಳಿಸಲಾಗುವುದೆಂದು ವಿ. ಬಾಲಚಂದ್ರನ್‌ ಅವರು ತಿಳಿಸಿದರು. ವೀರಪ್ಪನ್‌ ಬಂಧನದ ಕಾರ್ಯಾಚರಣೆಗೆ ಕಾಲಮಿತಿ ಬಗ್ಗೆ ಪ್ರತಿಕ್ರಿಯಿಸಲು ನಿರಾಕರಿಸಿದ ಅವರು ವೀರಪ್ಪನ್‌ ತನ್ನ ಸುಮಾರು 15 ಬೆಂಬಲಿಗರೊಂದಿಗೆ ಕಾಡಿನಲ್ಲೇ ಇದ್ದಾನೆ ಎಂದು ಪ್ರಶ್ನೆಯಾಂದಕ್ಕೆ ಉತ್ತರಿಸಿದ ಅವರು ವೀರಪ್ಪನ್‌ ಜೊತೆಗೆ ಕೆಲವು ತಮಿಳು ಪ್ರತ್ಯೇಕತಾವಾದಿಗಳು ಕೈಜೋಡಿಸಿರಬಹುದು ಆದರೆ ಎಲ್ಟಿಟಿಈ ವೀರಪ್ಪನ್‌ ನೆರವಿಗೆ ಬಂದಿದೆ ಎಂಬ ಬಗ್ಗೆ ಖಚಿತ ಮಾಹಿತಿ ಇಲ್ಲ ಎಂದರು.

ಮುಖಪುಟ / ವೀರಪ್ಪನ್‌ ಶಿಕಾರಿ