ತವರೂರಿಗೆ ಬಂದ ನಾಗಪ್ಪ ಮಾರಡಗಿ

ಹುಬ್ಬಳ್ಳಿ : ನಮ್ಮೂರಿಗೆ ಬಂದ ಮೇಲೆ ನನಗೆ ಸಂತೋಷ ಉಕ್ಕುತ್ತಿದೆ. ನನಗೆ ಮರು ಜನ್ಮ ಪಡೆದಷ್ಟು ಸಂತೋಷ ಆಗ್ತಿದೇರೀ... ಇದು ಕಾಡು -ನಾಡಿನ ಬಂಧನದಲ್ಲಿ ಒಟ್ಟು 122 ದಿನ ಕಳೆದ ಹಾಗೂ ವೀರಪ್ಪನ್‌ ಕಬಂಧ ಬಾಹುಗಳಿಂದ ತಪ್ಪಿಸಿಕೊಂಡು ನಾಡಿಗೆ ಓಡಿಬಂದ ನಾಗಪ್ಪ ಶುಕ್ರವಾರ ತಮ್ಮ ಸ್ವಗ್ರಾಮ ಮಾರಡಗಿಯಲ್ಲಿ ಆಡಿದ ಮಾತುಗಳು.

ಕಾಡುಗಳ್ಳ ವೀರಪ್ಪನ್‌ ಹಾಗೂ ಆತನ ಜತೆಯವರ ಚಲನವಲನ ನೋಡಿ ನನಗೆ ಕಾಡಿನಲ್ಲಿ ಭಯ ಹುಟ್ಟುತ್ತಿತ್ತು. ವೀರಪ್ಪನ್‌ನಿಂದ ನನಗೆ ಪ್ರಾಣ ಭಯನೂ ಇತ್ತು. ಅಲ್ಲದೆ ರೇಡಿಯೋದಲ್ಲಿ ಪಾರ್ವತಮ್ಮನೋರು ಅತ್ತಿದ್ದು ಕೇಳಿ ದುಃಖ ಆಯ್ತು ರಾತ್ರಿ ತಪ್ಪಿಸಿಕೊಂಡು ಓಡಿಬಂದೆ. ನನ್ನ ಯಾರೂ ಕಾಡಿನಿಂದ ತಂದು ಬಿಡಲಿಲ್ರೀ ಎಂದು ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದರು.

ಕಾಡಿನಲ್ಲಿ ಅನುಭವಿಸಿದ ಯಾತನೆ ಸಾಕಾಗಿತ್ತು. ಜೊತೆಗೆ ಪ್ರಾಣ ಭಯನೂ ಇತ್ತು ಎಂಬುದನ್ನು ನಾಗಪ್ಪ ಒಪ್ಪಿಕೊಂಡ ನಾಗಪ್ಪ ಆ ವೀರಪ್ಪನ್‌ನ ಮಟ್ಟ ಹಾಕಲೇ ಬೇಕ್ರೀ ಎಂದಾಗ ಮುಖದಲ್ಲಿ ಕೋಪ ಉಕ್ಕುತ್ತಿತ್ತು. ಮುಖ್ಯಮಂತ್ರಿಗಳು ಹಾಗೂ ಮಲ್ಲಿಕಾರ್ಜುನ ಖಗ್ರಪ್ಪನ್ನೋರು ನನಗೆ ರಕ್ಷಣೆ ಕೊಟ್ಟಿದ್ರು. ನನಗೆ ಯಾವುದೇ ಹೆದರಿಕೆ ಇಲ್ಲ. ಇಷ್ಟು ದಿನ ರೆಸ್ಟ್‌ ತಗೋತ್ತಿದ್ದೆ ಎಂದೂ ನಾಗಪ್ಪ ಹೇಳಿದರು.

ಕಾಡಿಗೆ ಬಹಳ ಜನ ಸಂಧಾನಕ್ಕೆ ಬಂದರು, ಆದರೆ ಅಲ್ಲಿ ಬ್ರೀಫ್‌ಕೇಸ್‌ಗಳು ಬಂದ ಬಗ್ಗೆ ನನಗೆ ಗೊತ್ತಿಲ್ಲ ಎಂದೂ ನಾಗಪ್ಪ ಹೇಳಿದರು. ಪೊಲೀಸ್‌ ಬೆಂಗಾವಲಿನಲ್ಲೇ ಇದ್ದ ನಾಗಪ್ಪ ಅವರು, ನನಗೆ ಈಗೇನೂ ಭಯ ಇಲ್ಲ. ಒಂದೆರಡು ದಿನ ಅಪ್ಪ - ಅಮ್ಮನ ನೋಡಿಕೊಂಡು ಮತ್ತೆ ಬೆಂಗಳೂರಿಗೆ ವಾಪಸ್‌ ಆಗ್ತೀನಿ ಎಂದಷ್ಟೇ ಹೇಳಿದರು.

ಮುಖಪುಟ / ಊರು ಕೇರಿ