ಬಾಗಲಕೋಟೆ : 1999ರ ಚುನಾವಣೆಯ ಶಾಸಕರ ಆಯ್ಕೆ ಅನೂರ್ಜಿತ

ಬೆಂಗಳೂರು : ಅತ್ತ ಅಮೆರಿಕ ಅಧ್ಯಕ್ಷರ ಚುನಾವಣೆಯು ಮರು ಎಣಿಕೆಗಳ ಗೊಂದಲದಲ್ಲಿ ಗಿರಕಿ ಹೊಡೆಯುತ್ತಿದ್ದರೆ, ಇಲ್ಲಿ ಶಾಸಕರಾಗಿ ಆಯ್ಕೆಗೊಂಡ ಒಂದು ವರ್ಷದ ನಂತರ ಆಯ್ಕೆಯನ್ನು ರದ್ದು ಪಡಿಸಿ, ಮರುಎಣಿಕೆಗೆ ಹೈಕೋರ್ಟ್‌ ಆದೇಶ ನೀಡಿದೆ.

ಬಾಗಲಕೋಟೆ ವಿಧಾನಸಭೆ ಕ್ಷೇತ್ರದಿಂದ 1999ರ ಚುನಾವಣೆಯಲ್ಲಿ ಭಾರತೀಯ ಜನತಾ ಪಕ್ಷದ ಪಿ.ಎಚ್‌. ಪೂಜಾರ್‌ ಅವರು ಆಯ್ಕೆಗೊಂಡಿರುವುದನ್ನು ಅನೂರ್ಜಿತಗೊಳಿಸಿ, ಮರು ಎಣಿಕೆಗೆ ರಾಜ್ಯ ಹೈಕೋರ್ಟ್‌ ಸೋಮವಾರ ಆದೇಶಿಸಿದೆ. ಪೂಜಾರ್‌ ಅವರ ಆಯ್ಕೆಯ ಕ್ರಮಬದ್ಧತೆಯ ವಿರುದ್ಧ ಅವರ ಚುನಾವಣೆಯ ಎದುರಾಳಿ ಕಾಂಗ್ರೆಸ್‌ನ ಡಾ.ರಾಜಶೇಖರ ಕೆ. ಕಂಠಿ ಅವರು ತಕರಾರು ಅರ್ಜಿ ಸಲ್ಲಿಸಿದ್ದರು. ಕೇವಲ 138 ಮತಗಳ ಅಂತರದಿಂದ ಸೋತಿದ್ದ ಕಂಠಿ ಅವರು ಮರುಎಣಿಕೆಗೆ ಒತ್ತಾಯಿಸಿದ್ದರು.

ತಕರಾರು ಅರ್ಜಿಯನ್ನು ಪುರಸ್ಕರಿಸಿರುವ ನ್ಯಾಯಮೂರ್ತಿ ಜಿ.ಸಿ. ಭರೂಕ ಅವರು ನಿಯಮಗಳ ಅನುಸಾರ ಮರುಎಣಿಕೆ ಮಾಡಬೇಕೆಂದು ಚುನಾವಣಾಧಿಕಾರಿಗಳಿಗೆ ತಿಳಿಸಿದ್ದಾರೆ. ಅನುಮಾನಾಸ್ಪದ 59 ಮತಗಳ ಬಗ್ಗೆ ಚುನಾವಣಾಧಿಕಾರಿಗಳು ಯಾವುದೇ ಅಭಿಪ್ರಾಯ ವ್ಯಕ್ತಪಡಿಸದಿರುವುದು ಸರಿಯಲ್ಲ ಎಂದು ನ್ಯಾಯಮೂರ್ತಿ ಅಭಿಪ್ರಾಯಪಟ್ಟರು.

(ಇನ್ಫೋ ವಾರ್ತೆ)