ಮೈಸೂರಿನಲ್ಲಿ ಡಿ. 1ರಂದು ಚಾವುಂಡರಾಯ ಪ್ರಶಸ್ತಿ ಪ್ರದಾನ

ಬೆಂಗಳೂರು : ಕನ್ನಡ ಸಾಹಿತ್ಯ ಪರಿಷತ್ತು ನೀಡುವ ಅತ್ಯುನ್ನತ ಪುರಸ್ಕಾರವಾದ ಚಾವುಂಡರಾಯ ಪ್ರಶಸ್ತಿಯನ್ನು ಡಿಸೆಂಬರ್‌ 1ರಂದು ಮೈಸೂರಿನಲ್ಲಿ ನ್ಯಾಯತೀರ್ಥ ಎಂ.ಸಿ. ಪದ್ಮನಾಭ ಶರ್ಮರಿಗೆ ಪ್ರದಾನ ಮಾಡಲಾಗುವುದು. 1999-2000 ಸಾಲಿನ ಈ ಪ್ರಶಸ್ತಿಗೆ ಜಿನವಾಣಿ ಮಾಸಪತ್ರಿಕೆಯ ಮೂಲಕ ಸಾಹಿತ್ಯ ಸೇವೆ ಮಾಡುತ್ತಿರುವ ಪದ್ಮನಾಭ ಶರ್ಮರನ್ನು ಸರ್ವಾನುಮತದಿಂದ ಆಯ್ಕೆ ಮಾಡಲಾಗಿತ್ತು.

ಡಿಸೆಂಬರ್‌ ಒಂದರ ಶುಕ್ರವಾರ ಸಂಜೆ 6 ಗಂಟೆಗೆ ಜಾನ್ಸಿರಾಣಿ ಲಕ್ಷ್ಮೀಬಾಯಿ ರಸ್ತೆಯಲ್ಲಿರುವ ಇಂಡಿಯನ್‌ ಇನ್‌ಸ್ಟಿಟ್ಯೂಷನ್‌ ಆಫ್‌ ಎಂಜಿನಿಯರ್ಸ್‌ ಸಂಸ್ಥೆಯಲ್ಲಿ ರಾಜ್ಯ ಪ್ರಾಥಮಿಕ ಶಿಕ್ಷಣ ಸಚಿವ ಎಚ್‌. ವಿಶ್ವನಾಥ್‌ ಅವರು, ಶರ್ಮರಿಗೆ ಪ್ರಶಸ್ತಿ ಪ್ರದಾನ ಮಾಡಲಿದ್ದಾರೆ. ಡಾ. ಕೆ. ಅನಂತರಾಮು ಅವರು ಅಭಿನಂದನಾ ಭಾಷಣ ಮಾಡಲಿದ್ದು, ಸಾಹಿತ್ಯ ಪರಿಷತ್ತಿನ ಅಧಕ್ಷ ಬಸವಾರಾಧ್ಯರು ಅಧ್ಯಕ್ಷತೆ ವಹಿಸಲಿದ್ದಾರೆ ಎಂದು ಕಾರ್ಯದರ್ಶಿ ಚಂದ್ರಣ್ಣಗೌಡರು ತಿಳಿಸಿದ್ದಾರೆ.

ಶರ್ಮರ ಬಗ್ಗೆ : ಕಾಶಿಯಲ್ಲಿ ವಿದ್ಯಾಭ್ಯಾಸ ಮಾಡಿದ ಎಂ. ಸಿ. ಪದ್ಮನಾಭ ಶರ್ಮರು ನ್ಯಾಯತೀರ್ಥ ಪದವಿ ಪಡೆದವರು. ಮೈಸೂರು ಪ್ರಾಚ್ಯ ವಿದ್ಯಾ ಸಂಶೋಧನಾ ಕೇಂದ್ರದಲ್ಲಿ ಸಂಶೋಧನಾ ಸಹಾಯಕರಾಗಿ ನಿವೃತ್ತರಾದ ತರುವಾಯ 1951ರಲ್ಲಿ ಜಿನವಾಣಿ ಪತ್ರಿಕೆ ಆರಂಭಿಸಿ ಹಲವಾರು ಕೃತಿಗಳನ್ನು ರಚಿಸಿದರು.

ಸನ್ಮತಿ ಗ್ರಂಥ ಮಾಲೆ ಎಂಬ ಪ್ರಕಾಶನ ಸಂಸ್ಥೆ ಮೂಲಕ ಯೋಗಾಮೃತ ಶತಕ, ಯಶೋದರ ಕಾವ್ಯ, ಕಾಲಜ್ಞಾನ ಪ್ರಕಾಶಕ, ಅಭಿನವ ವಾಗ್ದೇವಿ ಕಂತಿ, ಧರ್ಮನಾಥ ಪುರಾಣಂ, ಅಜಿತ ತೀರ್ಥಂಕರ ಪುರಾಣಂ, ಪುರಾಣ ತಿಲಕಂ, ಚಾವುಂಡರಾಯ ಪುರಾಣಂ, ಅಂಜನಾ ಪವನಂಜಯ ಪದಾರ್ಥ ಸಾರ ಮುಂತಾದ ಕೃತಿಗಳನ್ನು ಪ್ರಕಟಿಸಿದ್ದಾರೆ.

ರತ್ನನಂದಿ ವಿರಚಿತ ಪತ್ರಬಾಹು ಚರಿತಂ ಮುಂತಾದ ಗ್ರಂಥಗಳನ್ನೂ ಸಂಪಾದಿಸಿದ್ದಾರೆ. ಪ್ರಸ್ತುತ ಮೈಸೂರಿನಲ್ಲಿ ನೆಲೆಸಿರುವ ಅವರಿಗೆ ಎರಡೂ ಕಣ್ಣುಗಳ ದೃಷ್ಟಿ ಮಂಕಾಗಿರುವ ಕಾರಣ, ಅವರ ಊರಿನಲ್ಲೇ ಪ್ರಶಸ್ತಿ ಪ್ರದಾನ ಮಾಡಲು ಸಾಹಿತ್ಯ ಪರಿಷತ್ತು ನಿರ್ಧರಿಸಿದೆ.