ವೀರಪ್ಪನ್‌ ವಿರುದ್ಧ ಕಾರ್ಯಾಚರಣೆ: ಚೆನ್ನೈಗೆ ರಾಜ್ಯದ ಉನ್ನತಾಧಿಕಾರಿಗಳ ತಂಡ

ಚೆನ್ನೈ : ಡಾ. ರಾಜ್‌ಕುಮಾರ್‌ ಬಿಡುಗಡೆಯ ನಂತರ ವೀರಪ್ಪನ್‌ ಶಿಕಾರಿಯಲ್ಲಿ ತೊಡಗಿರುವ ಕರ್ನಾಟಕ ಸರಕಾರ, ಈ ಕಾರ್ಯಾಚರಣೆಯಲ್ಲಿ ಅನುಸರಿಸಬೇಕಾಗಿರುವ ಮಾರ್ಗಗಳ ಬಗ್ಗೆ ಚರ್ಚೆ ನಡೆಸಲು ಚೆನ್ನೈಗೆ ಉನ್ನತಾಧಿಕಾರಿಗಳ ತಂಡವನ್ನು ಕಳುಹಿಸಿದೆ.

ಕರ್ನಾಟಕದ ಗೃಹಕಾರ್ಯದರ್ಶಿ ಎಂ.ಬಿ. ಪ್ರಕಾಶ್‌, ರಾಜ್ಯ ಪೊಲೀಸ್‌ ಮಹಾನಿರ್ದೇಶಕ ಸಿ. ದಿನಕರ್‌ ಅವರನ್ನೊಳಗೊಂಡ ಉನ್ನತಾಧಿಕಾರಿಗಳ ತಂಡ ತಮಿಳುನಾಡಿನ ಅಧಿಕಾರಿಗಳೊಂದಿಗೆ ಸಮಾಲೋಚಿಸಿ ಕಾರ್ಯತಂತ್ರ ರೂಪಿಸಲು ಶನಿವಾರ ಚೆನ್ನೈಗೆ ಆಗಮಿಸಿದ್ದಾರೆ.

ವೀರಪ್ಪನ್‌ ವಿರುದ್ಧದ ಕಾರ್ಯಾಚರಣೆ ಕುರಿತು ಚರ್ಚೆಸಲು ದೆಹಲಿಗೆ ತೆರಳಿದ್ದ ಈ ಇಬ್ಬರು ಉನ್ನತಾಧಿಕಾರಿಗಳು, ಬೆಂಗಳೂರಿಗೆ ಹಿಂತಿರುಗುವ ಮಾರ್ಗದಲ್ಲಿ ಚೆನ್ನೈಗೆ ಭೇಟಿ ಇತ್ತಿದ್ದಾರೆ. ಕೇಂದ್ರ ಸರಕಾರ ವೀರಪ್ಪನ್‌ ಬಂಧನಕ್ಕೆ ಆಸಕ್ತಿ ತೋರಿದ್ದು, ಕೇರಳ ಮತ್ತು ಕರ್ನಾಟಕ ಗಡಿಯ ಸಮುದ್ರ ತೀರದ ಚಟುವಟಿಕೆಗಳ ಮೇಲೆ ವಿಶೇಷ ನಿಗಾ ಇಡಲು ನೌಕಾಪಡೆಗೆ ಸೂಚನೆ ನೀಡಿದೆ.

ಸಂಸದರಿಗೆ ಬೆದರಿಕೆ : ಈ ಮಧ್ಯೆ ವೀರಪ್ಪನ್‌ ವಿರುದ್ಧ ಕಾರ್ಯಾಚರಣೆ ನಡೆಸದಂತೆ ಕೇಂದ್ರ ಸರಕಾರದ ಮೇಲೆ ಒತ್ತಡ ಹೇರುವಂತೆ ಆಗ್ರಹಿಸಿ, ತಮಿಳುನಾಡಿನ ಸಂಸತ್‌ ಸದಸ್ಯರೊಬ್ಬರನ್ನು ಅಪಹರಿಸುವ ಬೆದರಿಕೆಯನ್ನು ವೀರಪ್ಪನ್‌ ಸಹಚರರು ಹಾಕಿದ್ದಾರೆ ಎಂದು ತಿಳಿದುಬಂದಿದೆ. ಈ ವಿಷಯವನ್ನು ಸಂಸತ್‌ ಸದಸ್ಯ ಕಾಳಿಯಪ್ಪನ್‌ ತಿಳಿಸಿದ್ದಾರೆ.

ಮುಖಪುಟ / ವೀರಪ್ಪನ್‌ ಶಿಕಾರಿ