ಹಕ್ಕಿ ಹಾರುತಿದೆ ನೋಡಿದಿರಾ? ದೇವರ ರುಜುವೀಗ ವೆಬ್‌ಸೈಟಿನಲ್ಲಿ

ತುಮಕೂರು : ಸಂಜೆಯಾಯಿತೆಂದರೆ ಮನೆ ಸೇರುವ ಬಣ್ಣಬಣ್ಣದ ತರಾವರಿ ಹಕ್ಕಿಗಳು ನಿಮ್ಮ ಕಂಗಳನ್ನು ಒಮ್ಮೆಯಾದರೂ ಸೆಳೆದಿರದೇ ಇರದು. ಹಾಗೆಯೇ ನಾನು ಇಂಥ ಹಕ್ಕೀನ ನೋಡೇ ಇರ್ಲಿಲ್ವೆ ಅಂತ ಅನಿಸಿರುವುದೂ ಉಂಟು. ಈ ಪ್ರಶ್ನೆ ಇರುವವರಲ್ಲಿ ನೀವೂ ಒಬ್ಬರಾಗಿದ್ದರೆ, ಬೆಳ್ಳಕ್ಕಿ- ಕಳ್ಳಕ್ಕಿಗಳ ಬಗ್ಗೆ ಕುತೂಹಲ ಇದ್ದರೆ http://karnatakabirds.homestead.com/home.html ವೆಬ್‌ಸೈಟ್‌ಗೆ ಭೇಟಿ ಕೊಡಿ.

ಬೆಂಗಳೂರು ಅರಣ್ಯ ಭವನದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಡಾ. ಉದಯವೀರ್‌ ಸಿಂಗ್‌ ಮತ್ತು ತುಮಕೂರಿನ ಹಕ್ಕಿ ಪ್ರೇಮಿ ಡಾ.ಅಮೀನ್‌ ಅಹ್ಮದ್‌ ಸೇರಿ ಹತ್ತು ವರ್ಷಗಳ ಕಾಲ ರಾಜ್ಯದ ಅರಣ್ಯ ಪ್ರದೇಶಗಳಲ್ಲಿ ಸುತ್ತಿ, ಕಲೆ ಹಾಕಿದ ಮಾಹಿತಿಗಳು ಈ ವೆಬ್‌ಸೈಟ್‌ನಲ್ಲಿ ಲಭ್ಯ.

ಈ ಇಬ್ಬರೂ ಸಾಧಕರು ಬುಧವಾರ ಸುದ್ದಿಗೋಷ್ಠಿ ನಡೆಸಿ ಕರ್ನಾಟಕದ ಪಕ್ಷಿಗಳು ಎಂಬ ಈ ಹೊಸ ವೆಬ್‌ಸೈಟ್‌ನ ಕಿರು ಪರಿಚಯ ಮಾಡಿಕೊಟ್ಟರು. ರಾಜ್ಯದಲ್ಲಿ 522 ಪ್ರಭೇದದ ಪಕ್ಷಿಗಳಿವೆ ! ಬಹುತೇಕರಿಗೆ ಗೊತ್ತಿರದ ಈ ವಿಷಯವನ್ನು ಸಿಂಗ್‌- ಅಹ್ಮದ್‌ ಪತ್ತೆ ಹಚ್ಚಿದ್ದಾರೆ. ಎಂಟು ವಿಭಾಗಗಳಿರುವ ವೆಬ್‌ಸೈಟ್‌ನಲ್ಲಿ ಕರ್ನಾಟಕದ ಭೌಗೋಳಿಕ ಪರಿಸರ, ರಾಜ್ಯದ ಪ್ರದೇಶಗಳು, ಸ್ಥಳೀಯ ಪಕ್ಷಿಗಳ ಪ್ರಭೇದಗಳು, ಪಕ್ಷಿ ವೀಕ್ಷಣೆ ಸ್ಥಳಗಳು, ವೀಕ್ಷಕ ಸಂಘಟನೆಗಳು, ಪಕ್ಷಿ ಸಂರಕ್ಷಕ ಸಂಸ್ಥೆಗಳು, ಪಕ್ಷಿ ಮಾಹಿತಿಗಳ ವೆಬ್‌ಸೈಟ್‌ಗಳ ವಿವರ ಹಾಗೂ 40 ಪಕ್ಷಿಗಳ ಚಿತ್ರ ಸಹಿತ ವಿವರಣೆ ಎಲ್ಲವನ್ನೂ ನೋಡಬಹುದಾಗಿದೆ.

(ಇನ್ಫೋ ವಾರ್ತೆ)